Viewport width =
July 23, 2007 | by  | in Features |
Share on FacebookShare on Google+Pin on PinterestTweet about this on Twitter

Te Karahipi Whakamaumaharatanga ki a Raaniera raaua ko Anihaka Higgins

I whaanau mai a Raaniera Terence Higgins i te 18 o Here-turi-kookaa 1974. Ko oona taatai whakapapa noo roto i ngaa hapuu o Te Urewera, Ngaati Rongo me Ngaati Koura o Ngaai Tuuhoe. Ko ia te pootiki a Te Ripowai raaua ko Daniel Higgins. Ahakoa i whaanau mai a Raaniera i Singapore, kaaore te whaanau i reira moo te waa roa ka hoki mai ki Aotearoa, ki Te Whanganui a Tara. Ka haere ia ki te Kura Tuatahi o Arakura i Wainuiomata, aa, i kuraina hoki ia i te Kura Tuarua o Hato Paora. Ka eke te waa, ka hau mai ia ki te Whare Waananga o Te UUpoko o Te Ika a Maaui ki te whai i tana Tohu Paetahi. He tauira i whai waahi ki ngaa whakahaere a Ngaai Tauira, aa, he manako nui hoki ki te tautoko i Te Herenga Waka Marae. Ko tana kupu nui ki a Grandma moo ngaa kai o te marae, ahakoa he aha aua kai: “Glorious Grannie!” Ko ana mahi pai ko te purei kirikiti, aa, ka uru hoki ia ki roto i te tiima tawhito o tana Paapaa i Waiwhetu, me te purei i te whutupooro riiki i te taha o ana paapaa i Upper Hutt moo ngaa Taika (Tigers). I a ia i te Whare Waananga ka noho ia i ngaa whare o Hinepuukohurangi ki Poomare, aa, i reira ka tuutaki ia i tana wahine. Ka moe a Raaniera i a Joanne Tioro, o Ngaa Rauru, ka puta ki waho ko tana tama a Te Ao O Te Rangi Tui Higgins i te 10 o Hakihea 1995. Ka huunuku raatou ki Wanganui ki te taha o ana hungarei, ka mutu ka mahi a Raaniera i te Koohanga Reo hai kaiaawhina. I te 6 o Kohitaatea 1997 ka whaanau mai tana tamaahine a Anihaka Rangimaarie Higgins. Ka uru tana mataamua ki roto i te hoohipera i Taamaki Makaurau kia whakatikahia tana manawa. Noo te putanga mai, ka rere a Te Ao O Te Rangi me tana maamaa ki Wanganui, aa, ka hoki mai a Raaniera, tana tamaahine me ana hungarei maa runga motokaa i te 27 o Whiringa-aa-rangi 1997. Kaaore i tino tawhiti atu i Meremere ka mate ika huirua raaua ko tana pepii. Muia ana te marae o Te Totara i Ruaatoki i ana hoa o Te Whare Waananga me Hato Paora ki te uuhunga moo raaua. I te tau o muri atu ka ara ake te kaupapa o te Karahipi whakamaumaharatanga i a raaua, aa, naa Ngaai Tauira i whakaaro nui kia tapaina ki oo raaua ingoa. Kua eke ki te tekau tau inaaianei te rirohanga atu o te tokorua nei; he tangata nui, ngaakau nui me tana puhi merito. Tangi tonu ana te ngaakau moo raaua kua ngaro atu nei ki te poo.


Panui: I ngaa koorero e whai ake nei ka hurihia matou i ngã tohutoo ki ngaa tohu oro e rua.
Notice: In all articles we have changed the macron into double vowels.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Second test
  2. test test
  3. Recipes from the Suffrage Cookbook
  4. Beneath Skin and Bone
  5. No Common Ground
  6. Chris Dave and the Drumhedz
  7. Good Girls
  8. Winter Warmers: Home Alone
  9. Winter Warmers: About Time
  10. Sex at Dawn
Website-Cover-Photo7

Editor's Pick

This Ain’t a Scene it’s a Goddamned Arm Wrestle

: Interior – Industrial Soviet Beerhall – Night It was late November and cold as hell when I stumbled into the Zhiguli Beer Hall. I was in Moscow, about to take the trans-Mongolian rail line to Beijing, and after finding someone in my hostel who could speak English, had decided