Viewport width =
July 21, 2008 | by  | in Opinion |
Share on FacebookShare on Google+Pin on PinterestTweet about this on Twitter

Kupu Whakataki Tumuaki Albert Tibble

Nā Tai Ahu rāua ko Haimona Waititi i whakamāori

Nei rā taku mihi maioha ki a koutou ngā iwi karangamaha, ngā maunga kōrero, ki tēnei pukapuka-ā-tau ko Te Ao Mārama. Ka taka te wā, ia tau ka kitea te hiratanga o tō tātou reo ki roto i tēnei pukapuka o Te Ao Mārama me ngā mahi-a-rēhia o Te Wiki o Te Reo. He reo e ora tonu ana mo ake tonu atu. Nō reira, ehara i te mea ko Te Ao Mārama he puna whakaaro Māori noaiho engari he waka pāpaoho o te reo Māori, he waka eke noa mo tātou.

pita_samuel.jpg

Ki tēnei pukapuka, he maha ngā pae kōrero me ngā take whakaaro mo Ngai Māori, mo ērā atu e hīkaka ana ki te ao tūturu, ki te ao Māori. I kōwhirihia ngā take kōrero o nainei, me ngā take kōrero e tau ana ki te ngākau o te hunga Māori mo ake tonu atu. Pērā ki ngā ope taua o te Kāwana ki Tūhoe i tēnei tau nā Tākuta Danny Keenan i tuhi ki roto nei. Tua atu i tērā, he take tōrangapū, he take hauora, he take ora mo te reo Māori ki ngā āhuatanga o ēnei rā, he pūrākau nā ngā tauira, he waiata anō hoki. Kei roto ētahi tuhinga e pā ana ki a Ngā Rangahautira, ki a Ngai Taura Ūmanga, ki te Rōpu Tauira Māhita me ētahi atu o ngā kanohi kitea, ngā kanohi Māori i kōnei.

He pukapuka tēnei e hāpaitia nei ngā mahi hirahira o ngā tauira Māori ki tēnei whare wānanga, me ngā mea whakangāhau ka whakatū mai nei! He māngai o Ngai Tauira ahau e huri ake ana ki a koutou ngā tauira o Te Whare Wānanga o te Ūpoko o te Ika a Māui, ka mihi. Ka piko te rae ki ngā kaiarahi o Ngai Tauira o mua rā, nō reira ki a Mary-Jane Waru, ki a Rob Downs, ki a Dee O’Carroll, ki a Matthew Gifford, tēnei te mihi kau ake. Ahakoa ngā piki me ngā heke, nā tā rātou kaha tēnei waka e hoe kia puta i ngā ngaru pōkākā. Katahi te mihi e kore e mutu.

Ka huri ake ahau ki ngā waewae tapu, ki ngā kaiarahi o naiatonu nei, he whānau kōtahi, he whānau ora! Ko Pania rātou ko Tai, ko Māhina-ā-rangi, ko Matt, ko Arama, ko Cherish, ko Haimona, ko Te Hiwi, ko Sonny, ko Tahu, ko Jessica, ko Kiritapu, ko Alan, tēnā koutou, tēnā koutou, tēnā koutou katoa. Kaore he māngaritanga i tua atu i tō koutou manaakitanga i tēnei wā. Ka tuku te raukura ki ngā tipuranga whakaheke, ka pū te ruha ka hao te rangatahi. Ā, mā rātou te waka e hoe, mā rātou ngā ngaru e tūtuki.

Engari kaore tō mātou pōrehurehu i te taumaha hārukiruki o te mahi ki mua i tā mātou aroaro. I tēnei wā ka whai wāhi atu te rōpu kia riro te taitara he Rōpu Whakapūmau (Incorporated Society). Tua atu i tērā, koinei te tau tonotono pūtea ki VUWSA. Ā, kei te tōiriiri mātou ki ngā mahi o Cherish rāua ko Te Hiwi, nā rāua te mahi whakarākai taitara, nā rāua te mahi whakarākai whārangi ipurangi kei te haere tata mai! Ngā mihi ki a kōrua!

Heio, ko tā mātou e hiahia nei, he kimi whakaaro mā koutou, he whakahihiko i ō koutou hinengaro, he whakatakoto pākirehua hei kōhurehure mō koutou. Kia whakakapi inaianei ki tētahi kōrero o tōku matua kēkē i te Hui Taumata i te tau 1984:

“Nā te ngutukura ko te hinengaro,
nā te hinengaro ko te māhara,
nā te māhara ko te whakaaro,
nā te whakaaro ko te kōrero,
mā te kōrero ka tū he tikanga,
he taonga nui te wareware.
I haere mai tātau i roto i o tātau mātua,
kai roto tātau i te ao ke,
kai mua i a tātau ko te mate
arā te tūturutanga o te ora.”

“Engaging the senses stirs the emotions,
engaging the emotions stimulates the intellect,
stimulating the intellect commissions the memory,
from the memory comes the thoughts,
from thoughts come the words,
from the words we construct customs,
forgetfulness is to be treasured.
We are of our parents,
we exist in another world,
before us lies death, the ultimate of life”.

Ki a Tai Ahu me tōna rōpu whakahaere o tēnei pukapuka, ko Sonny rātou ko Haimona, ko Tahu, nō koutou te ringa e huti punga ana, ngā mihi maioha! Ki a Pania me tōna rōpu whakahaere o Te Wiki o te Reo, kia kaha, kia maia, kia manawanui!

Nāku noa,
Nā Albert Tibble
Tumuaki – Ngai Tauira

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge