Viewport width =
July 27, 2009 | by  | in Arts |
Share on FacebookShare on Google+Pin on PinterestTweet about this on Twitter

Te Matatini

Rā ko Mauao

Ka tauhere ki ngā hīhī o te rā
Te tihi ki Maunganui
Hōmai kia mihia
Ko Pūkenga
Te Rangihouhiri
Ko Ranginui e

I runga i te karanga o Mataatua waka, i te marama o Hui-Tānguru i karapinepine mai rā te mano me te tini ki Tauranga moana ki te tirohia i ngā kapa e whakatūtū ana i te puehu ki te papa whakatūwaewae o te Matatini 2009. Kātahi te mea ataahua nei ko te kitenga i a Ngai Māori e kaha whakanui ai i ngā mahi ha kui mā, ha koro mā. Hāunga, he āhuatanga tēnei i nanea ai te whatumanawa, te rangona i te tīoro o ngā manu, te kitea te wiri o te ringa, te pīkarikari o te tīnana, te whetē o ngā whatu, te ngangahu o te kanohi, te whētero o te ārero. Haka mai, haka atu, waiata mai, waiata atu, kīkī katoa te wairua o te hunga mātaki i te koa me te ohorere o ngā mahi ā i a roopu.

Ko tēnei nā, i tū mō te kapa o Whāngara-mai Tawhiti, ko te tikanga i taua wā kia tū mātou i te Rāmere o ngā rā o te Matatini. Tēra pea kāre a Tāwhirimātea i whakaae ki aua whakaritenga, ka tukua mai i a ia tōna riri kia rongo ai, kia kitea ai te katoa i tōna wehi. Ahakoa tēnei i waho tonu te hunga mātaki e tatari ana, i te tāheke mai te ua me te uira. Tē taea a Whāngara-mai-Tawhiti te eke ki runga i te ātamira. Waihoki ko mātou e tatari ana ki muri i te ātamira e whakamahana ana i te tinana, i te korokoro hoki. Whā haora mātou e tatari ana kātahi ka tukuna mai te whakatau o ngā kaiwhakarite kia aukati ngā mahi katoa o taua rā. Kātahi te taniwha o pukuriri i puta mai i taku kapa! Ahakoa te kaha o tō mātou kaiarahi ki a whakaāio i a mātou anō, mai i te tina tae noa ki te kai o te pō i noho pukuriri mātou ko taku kapa. Ka tau te rangimarie, ka paku whakaharatau anō me te whakarite hoki ko wai ka tū hai te Rāhoroi. Ka mutu, ka heke te mahunga ki te pira. Āo ake i te ata ka oho mōata anō, ka eke ki te ātamira, mahi ai te mahi.

Ahakoa te ngēngē rawa o tēnei i hoki atu au ki te mātaki i ētahi o ngā roopu i tū ai, moteko mai. He nui ngā kapa i rata ki a au, heoi anō ko te kapa tua atu i ngā kapa katoa i tēnei whakataetae, ki ahau nei ko te kapa-haka o Te Whānau-a-Apanui. Reka katoa ngā waiata, ataahua rawa atu te mahi tinana, kātahi te whakaaro tōkeke ko tēnei. Heoi anō, ko wai i eke ki te panekiretanga o te whakataetae? Ko wai atu ko Waka Huia, tuarua mai ko Whāngara-mai-Tawhiti, ā, tuatoru mai ko Te Whānau-a-Apanui.

Nā reira, ahakoa kei te huri ngā tau, ka huri anō Te Matatini! E haere tonu ana ngā mihi ki ngā kapa e haka nei, e waiata nei; ki ngā iwi anō mō rātau e takatū nei ki te whakaoreore, ki te whakakipakipa i a tamawahine, i a tamatāne kia eke ki runga i te papa whakatūwaewae i raro i te maru o Mauao; Tauranga Moana, Tauranga Iwi, Mataatua whānui tonu, nau i poipoi te iwi whānui ki tēnei o ngā Matatini. Inaianei ka tukua te mauri ki taku hau kāenga, ki te riu o Horouta, ki te Tai-Rāwhiti. Tēnei te whakaeke a te motu hei te tau 2011, kotahi noa te whakaaro ki te iwi katoa;

“Haramai koe, ki te pōhiritanga o taku manu
Haere mai ki taku hui aue
Hī!!!”

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. ONCE: A captivating collection of solo dance works
  2. Matilda the Musical — Matthew Warchus
  3. Rant with Grant
  4. A Fairer Aotearoa
  5. VUWSA Constitutional Changes
  6. The Politics of Caring: Interview with Max Harris
  7. Yes We Care
  8. Not Enough to Begin With
  9. On the Fence
  10. Policy for Policies

Editor's Pick

FUCK ENGLISH, VOTE POEM

: - SPONSORED - The layer of mist over paddocks, delicate and cold; the layer of cows under a silver sun-bleached tree; the hills rising over them and in the distance the whole countryside demarcated by accidental hydrangeas or a gentle river.   All of these layers upon layers