Viewport width =
July 18, 2011 | by  | in Features |
Share on FacebookShare on Google+Pin on PinterestTweet about this on Twitter

He Hokinga Mahara, He Anga Whakamua

Kua roa nei tātou te iwi Māori e whawhai ana mō te whenua, ā, kua pakaru upoko tātou ki te totohe ki ngā mahi raupatu o ngā rautau o mua.
Ko tērā hononga a tātou ki whenua, e kore e ngaro, engari, me whai whakaaro hoki ki tō tātou hononga ki te moana. Ehara i te mea me waiho ki te kohi kaimoana, ki te hī ika, ka mutu, ka hoki ki te kainga. I ngā rā o mua ko te moana me ona kawenga te ara a o tātou tipuna. Anō hoki, arā ngā mahi kimi puna hinu a te kāwanatanga me ngā kamupene pene hinu. Me pēhea tātou e tiaki, e manaaki i a Tangaroa me ana tamariki ina e kore tātou e mōhio me pēhea?
Koinei te wā ki te whai whakaaro atu ki te mātauranga i takea mai i tuawhakarere mō te whakatere waka hourua, waka moana hoki. Pērā ki to tātou reo, he mea ngarongaro noa iho tēnei momo mahi i ēnei rā o ngā mīhini Pākehā. Pērā ki to tātou whenua, he kaupapa tēnei hei hiki ki te mau tonu i tēnei hononga a tātou ki te Moana nui a Kiwa.

Ngā Mahi Whakatere Waka a Ngā Tipuna
Ko ngā waka ēnei i hoea mai rā i te nuku o te whenua i Hawaiki-pāmamao
Whakawhiti mai rā te Moana-nui-ā-Kiwa ki Aotearoa
Hiki nuku, hiki rangi!

I ngā rā o mua, ko ngā ia wai o te Moana-nui-a-Kiwa ngā ara haere a o tātou mātua tīpuna, ā, i riro mā ngā āhuatanga o te moana, o ngā hau e whā, o te rangi hoki e aratakina i a rātou ki ngā moutere, ki Aotearoa hoki. Nā te eke o ngā ngaru, te pupuhi o ngā hau, te ara o ngā whetū, me te hurihanga o Tama-nui-te-rā rātou i arataki. I aua rā ko te reo o te taiao, o te moana e rite pēnei ki te reo Māori. He reo i mōhio whānuitia.

I ēnei rā kua memeha haere te mātauranga o tēnei mahi whakatere waka, ā, nā tērā i puta te huatau ki te whai whakaaro anō ki ēnei tūmomo mahi. Ko tētahi whakatinanatanga o ēnei whakaaro ko te haerenga tuatahi o te waka Hokule’a i te tau 1976. Na Mau Piailug i whakatere te waka hourua, Hokule’a, na runga anō i te mātauranga i heke iho mai i ona matua tipuna. I riro atu ngā mīhini Pākehā ki rahaki, a, nana anō i whai atu i ngā tohutohu a Tāwhirimātea, a Tangaroa, a Ranginui hoki, tae atu ki Tahiti.
Nō ngā moutere o Micronesia a Mau, engari i tona kitenga atu i ngā āhuatanga o tauiwi e uru ana ki ngā tikanga o tona iwi, ka tīmata ia ki te whakaako i ngā mahi whakatere waka ki ngā iwi whānui o te Moana nui a Kiwa. Ko tētahi o ana tino tauira ko Nainoa Thompson, nō Hawaii, a, tatu mai ki ēnei ra, kua whakaora ēnei tokorua i ngā mahi whakatere waka.
Mō Aotearoa, ko te tuatahi o ngā waka hourua i whakatere atu ko Te Aurere. Na Hekenukumai Busby tēnei kaupapa i whakahaere, a, i ea tēnei kaupapa i te tau 1992 i te ūtanga atu o te waka o Te Aurere ki Rai’atea.
Heke mai ki ēnei rangi, he mātauranga ‘hou’ tēnei ki ētahi. Ahakoa ngā rautau kua hipa, he pihipihinga tonu tēnei kaupapa ki ngā iwi whānui. Heoi, kei te haere tonu ngā mahi pērā ki te haerenga o Te Mana o te Moana.

Te Mana o te Moana
Ko Te Mana o Te Moana he haerenga o ngā waka hourua e whitu mai i Aotearoa ki ngā moutere o te Moana nui a Kiwa, tae noa ki Hawaii, ki Amerika hoki. E ai ki te paetukutuku, he haerenga tēnei hei whakanui i ngā take taiao e pā ana ki te moana kia puta ki ngā tini tangata o waho. He haerenga hei whakaora, hei whakatauira hoki i te mātauranga a o tātou tīpuna mō te mahi whakatere waka, ka mutu, hei poipoi i te hononga o ngā iwi taketake o ngā moutere ki Tangaroa.
Ko Faafaite (Tahiti), ko Gaualofa (Samoa), ko Haunui (Pan-Pacific), ko Hine Moana (Pan-Pacific), ko Marumaru Atua (Cook Islands), ko Te Matau a Maui (Aotearoa), ko Uto Ni Yalo (Fiji) ngā waka e whitu. I wehe ēnei waka mai Aotearoa i te timatanga o te marama o Paenga-whāwhā. Kua toru marama neke atu rātou ki te moana, a, i ngā wiki e rua kua pahure i tae atu rātou ki Hawaii.

Anei tētahi o ngā tuhinga mai i tō rātou paetukutuku:
Rangi 60 – Rāpare 16th Pipiri 2011/ Taenga ki Hawai’i

Ko te po i mua i to matou taenga atu ki te moutere o Hawai’i. Kua puta mai ko Rakaunui, ka puta hoki te ihiihi, te wehiwehi me te wanawana i te kitenga o te kōpere o te po. Ko tona piko e tohu ana i Hawaiki nui, i Hawaiki roa, i Hawaiki pāmamao. Mīharo katoa matou i tēnei kōpere.
Ka ao ka ao ka awatea.
Whiti ana ko Tama-nui ko tana he tohu i te ara ki Kainga ki Whakararo, ki Tokerau. Horahia ko kura-hau-awatea i te rangi. He tohu o te marangai me te hau pupuhi. Heke ana te ua hei tohu atu kua tata to matou taenga atu ki Hawai’i, whai mai ka tāwhana mai te rangi Āniwaniwa. Ko tana he wero i te maumaharatanga o rātou ma kua wehe ki tua, a, he tohu pai kia whakarite mō te taenga ki to matou pae tawhiti.
I te ata tonu tātou i tae atu ki Hawai’i. Ko matou ko Marumaru Atua, ko Haunui tera te hāpai o ki muri e arahina i ngā teina whakatere waka ki roto i te whanga o Hilo. I reira wā tātou kaumātua a Hekenukumai Busby e waerea wā matou huarahi ki Hawai’i.

(http://www.pacificvoyagers.org/voyaging-societies/te-matau-maui/news-5/day-60-thursday-16th-june-2011.html)

He kitenga tuatahi tēnei mō te nuinga o ngā kaiwhakatere o ēnei waka, engari, arā ngā momo mahi whakangungu hei whakariterite i a rātou anō. Nā ngā mahi whakangungu a ngā kaiako pera ki ērā o te waka Hokule’a, i whakaako ēnei o ngā tauira ki tēnei mahi onamata. Hei kīnaki hoki ko ngā mātauranga pūtaiao e whakawhirinaki ana i a rātou mā hei whakakī i o rātou kete mātauranga. Ara, ko ngā take taiao o te moana ērā, ngā āhuatanga kino o ngā momo ngē (noise pollution), ngā wahanga o te moana e kore ai te hau te aha ranei e ora (dead zone), me te ngau o te waikawa ki te moana (ocean acidification).
Mai i ngā tōpito katoa o te Moana nui a Kiwa ēnei kaiwhakatere. Nō ngā moutere o Tahiti ētahi, nō Hāmoa ētahi atu, nō Aotearoa hoki ētahi atu. Ko tētahi o ngā kaiwhakatere waka o Te Matau a Maui ko Taawhana Chadwick. He tauira tawhito ia o tēnei whare wananga, ka mutu, i tū ia hei māngai mō Ngai Tauira i ngā tau i a ia e whai tohu ana ki konei.
Ko ia tētahi o ngā kaituhi mō tēnei haerenga a Te Mana o te Moana, a, ka taea koe te haere ki te paetukutuku ki te kite atu i a rātou nekehanga mai moutere ki moutere ki whenua kē. I tēnei wā tonu kua wehe ēnei waka mai Hawaii, a, kua tāpirihia atu ko tētahi waka hourua anō, ko Ohana Waa (Hawaii).
Anei ngā mihi maioha ki ēnei waka e waru e tere haere ana i ngā wai pukepuke o te Moana nui a Kiwa. Ko ngā kaupapa e pīkau ana rātou mō te taiao, he kaupapa e taea ai tātou katoa te hiki. Ko ngā mahi whakaora i te mātauranga o ngā iwi taketake o te Moana nui a Kiwa, he oranga tikanga, he oranga tangata.

Tēnā, tau atu ki tō rātou paetukutuku: http//:www.pacificvoyagers.org.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Interview with Dr Rebecca Kiddle
  2. The Party Line
  3. Te Ara Tauira
  4. Robotic Legs, “Inspiration”, and Disability in Film
  5. VICUFO
  6. VUWSA
  7. One Ocean
  8. Steel and Sting
  9. RE: Conceptual Romance
  10. Voluntary WOF a Step in the Right Direction
redalert1

Editor's Pick

RED

: - SPONSORED - I have always thought that red was a sneaky, manipulative colour for Frank Jackson to choose in his Black and White Mary thought experiment. It is the colour of the most evocative emotions, love and hate, and symbolises some of the most intense human experiences, bi