Viewport width =
July 18, 2011 | by  | in Features |
Share on FacebookShare on Google+Pin on PinterestTweet about this on Twitter

Wairua Tangata, Wairua Renetia

I te Pipiri i haere au ki ‘Sapmiland’ ki Te Porowhita Mātaratara hei māngai mō Ngāi Māori ki te ‘Indigenous Terra Madre’. Ko te ‘Indigenous Terra Madre’ te huihuinga, e whiriwhiria ai te kōrero mō te kai a ngā tangata whenua o te ao.

Nā te roopu ‘Slow Food’ i whakahaere i ngā hui. Ko te kaupapa o te roopu Slow Food, ko te kai ‘Reka, Parakore, Pono.’ I tēnei tau, nā te iwi Sapmi i karanga ai te hui ki tā rātou tāone matua o Jokkmokk. I haere āhau hei kanohi mō Te Waka Kai Ora, te Mana Hua Parakore o Aotearoa. Tōku waimarie hoki i te manaakitanga o te iwi Sapmi.

Ko te rohe o Sapmiland mai i te raki o Nōwei, Wītana me Whinirana ki te rāwhiti o Haipīria, ā, ko te nuinga o te rohe kei te raki o Te Porowhita Mātaratara. He iwi tawhito te Sapmi; kua tū te maungārongo i Sapmiland mō ngā manomano tau. Ko te whenua tō rātou kainga, ko ngā kararehe tō rātou whānau. Ko te kararehe tino whakahirahira ki a rātou ko te renetia. E kī ai rātou i te whakataukī, “ka āpiti hono te wairua o te tangata ki te wairua o te renetia.”

Engari, i te rautau tekau mā ono, ka taumanu ngā whenua kaikai a ngā renetia ki Sapmiland. I te timatanga o te rautau rua tekau, e kāwanatia ana te iwi Sapmi e ngā tikanga o ngā momo tauiwi. I whakawaimeha i ngā tikanga Sapmi ki tā te Pākehā. He mea pouri hoki, kua ngaro ētehi o ngā tikanga Sapmi mō te manaakitanga. Nā ngā mihinare i whakatū atu ngā tikanga Karaitiana hei whakakapi. Nō reira, i te hui, i whakaputa ai te Sapmi i te manaakitanga nā ngā tikanga Karaitiana mō te nuinga o te wā.

Heoi anō, he whakatauki anō tā te iwi Sapmi: “Ka ngaro te tumanako i ngā kaiwhakangau, ka ngaro te kai.” Kua mau tonu rātou ki te tumanako; ka whakahaumanu ngā whakatipuranga hou i tō rātou ake tikanga. Kua whakatutukia taua tumanako nā te mahi kai tuku iho. Kua whakatūwhera anō te iwi Sapmi i ngā roopu hēpara renetia. I ēnei rā, ka angitu te mahinga renetia. Nā, ia rā ia rā, ka whakaratohia he mīti renetia hei kai, kia whakamana i a mātou ngā manuwhiri. Ko te mutunga kē mai nei o te pai te mīti renetia nā te mea ka kai te renetia i te kai parakore anake a Tāne-Mahuta. Anō hoki, ehara te mīti i te hinuhinu, a, kī tonu ki ngā huaora A, B, C me te E. Te reka rawa atu hoki!

I te pō whakangahau o te hui, ka waimarie mātou ngā manuwhiri ki te kai i te kai motuhake, tapu hoki. I waenganui pō, ka arahina mātou e ngā tangata whenua ki tētehi waerenga i te ngahere. Kei Te Porowhita Mātaratara i te raumati, pou tū tonu te rā i te waenganui pō. He mea whakamīharo tēnei. Nā, i tēnei pō ka whiti tonu te rā. Katahi ka tae mai mātou ki te waerenga, ka whaikōrero te rangatira o te hapū nō Jokkmokk. Ka whakamōhio ia i a mātou, kua patu ia i tētehi pea, ina hoki, kua whakamate tēnei pea i ngā reneti maha. Ki tō te rangatira whakaaro, he tohu tino pai te whakahere o te pea, hei kai whakamana i a mātou ngā manuwhiri. E ai ki ngā pūrākau, he uri tēnei hapū nō ngā pea. Nō reira, he tino tapu te kaipatu o te pea, te tinana o te pea hoki. Nā, ka tukuna e te hapū he rīngi mō tētehi, mō tētehi. Ka tohutohu te rangatira, me titiro ki a ia ma roto i te rīngi, me kai i te mīti pea ma roto i te rīngi, hei whakanoa i te tapu. He mea hou tēnei ki a au! Heoi, a ngā ra e heke mai nei, ka maumahara tonu āhau i te koha o aua tāngata, i te tino reka o te mīti o te pea hoki, i whakamana ai i a mātou ngā manuwhiri.

Nō reira, ahakoa kua ngaro ētehi o ngā tikanga Sapmi o te manaakitanga, kaore e kore, nā te reka o te kai e whakaratohia ai e ngā tangata whenua, ka pāngia te manuwhiri i te aroha o te tangata whenua, ā, ka mau tonu te iwi Sapmi i te mana o ō rātou mātua tūpuna. Tēnei te mihi ki a koutou te iwi Sapmi, mō te kai, te aroha, me te manaakitanga.

Mahina-a-rangi Baker

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. SWAT
  2. Ravished by the Living Embodiment of All Our University Woes
  3. New Zealand’s First Rainbow Crossing is Here (and Queer)
  4. Chloe Has a Yarn About Mental Health
  5. “Stick with Vic” Makes “Insulting” and “Upsetting” Comments
  6. Presidential Address
  7. Final Review
  8. Tears Fall, and Sea Levels Rise
  9. It’s Fall in my Heart
  10. Queer Coverage: Local, National, and International LGBTQIA+ News
Website-Cover-Photo7

Editor's Pick

This Ain’t a Scene it’s a Goddamned Arm Wrestle

: Interior – Industrial Soviet Beerhall – Night It was late November and cold as hell when I stumbled into the Zhiguli Beer Hall. I was in Moscow, about to take the trans-Mongolian rail line to Beijing, and after finding someone in my hostel who could speak English, had decided