Viewport width =
Screen shot 2012-08-14 at 2.52.47 PM
August 13, 2012 | by  | in Features |
Share on FacebookShare on Google+Pin on PinterestTweet about this on Twitter

He Tuhinga Whakaaro

Ka pēhea kia mau ai ngā āhua Māori

Kua Pākehā kē te ao Māori ā-reo, ā-tikanga, ā-whakaaro, ā-wairua nō reira he aha te hua o te whai tonu i te reo me ngā tikanga kia ū, kia mau, kia tika?

Ka auraki ki ngā rā o pēperekōu, kurupākara ana tōku maunga, a Pirongia i te kō, i te ngō a te kōkako. He wā tōna, keakea ana te taringa i te wheko o tāna tangi. Āianei nā, ka rongo kē i a makipae e tioro ana, he hau noa e kōkihi mai nei i ngā rau. Waihoki, he pakara rerenga tahi taua werewere kahurangi. He tangi, he haku, tērā e tawetawē anō ai te huhua o tēnei tipua.

Inā wāwau nei au i tēnei take, ka rāhuitia atu ki ōna mata, ki ōna tirohanga e rua. Kei reira ngā whakaaro e whakaae ana, ā, kei reira anō ngā whakaaro e ātete ana. Nei rā aku oruoru mahara kua kohia mai hei wherawhera i te kaupapa.

Tērā te hira ka tūngou atu, āe, kua titia kētia ngā niho ki te kiko o te ao Pākehā, ā, kua Pākehā kē te ao Māori ā-reo, ā-tikanga, ā-whakaaro, ā-wairua. Āe mārika, ka kawa ki te taringa ngā reo o tapepe mā, o kūare mā. Kāore rawa he paku hua o te whai tonu i te reo me ngā tikanga kia ū, kia mau, kia tika. Kua mārō kē te haere, te tū o ngā hanga o tauiwi, ā, kua horapa ki ngā wāhi katoa. Ahakoa ki whea koe titiro ai, kua riro mā iwi kē tō tātou reo, kua mau i a iwi kē ā tātou tikanga, ā, e kore a muri e hokia.

Mō te taha ki ngā tikanga, he hokinga mahara ki te wā o taku taenga tuatahi ki Ōtautahi noho ai, i te wā o te pōwhiri mō te whakatūwheratanga o Hikurangi, te tari Māori i Te Whare Wānanga o Waitaha. I reira, ka tū mai tētehi koroua o Ngāi Tahu hei kaiwawāhi mō te paepae. Kātahi ka huatakina tana whaikōrero ki te tauparapara, ā, ka whakaoti atu ki te reo Pākehā – nā konā te wherereinga tuatahi o kōtore. Ka rua, ka whai atu te kaiwhaikōrero tuarua, nō Ngāi Tahu hoki. Ina whakamōhio mai tōku whaene he tama tērā nā tautaia koroua rā, tū rawa mai a pewa! Ka tengi, i noho kē te tokorua nei hei māngai mō tā mātou manuwhiri, ahakoa ko rāua tonu te mana whenua. E hika e!

Arā noa atu ngā kaipupuri i te reo kairangi e tū pakari nei ki te waha i ōna whakaaro mō te reo Māori, ehake i te Māori. Kua roa hoki rātou e whakaako ana i te reo, ā, e hia kē nei ngā rauemi, ngā pukapuka, me ngā tuhingaroa hoki kua whakaputaina ki te reo. Me he korokoro tūī hoki ētehi kua rangona; ko ōku hoa mahi o mua ētehi, ko te koromatua o Tūranganui-a-Kiwa tētehi, ā, ko Murumāra anō tētehi. Ko te pātai ia, me pēwhea rā e mihi ki tērā momo tangata ina tū mai ia ki runga marae, whaikōrero ai? Ā, me te mea hoki, he pai ake tāna whakatakoto i te reo i tā te Māori? Mēnā rā ko ia kē kei te kawe tika i te kawa, ā, ko tangata whenua kē kei te whati i ēnei huia kaimanawa a rūruhi mā, a koroheke mā, me tino aha kē nei tātou? Kei te ngutu hoki o ētehi e kī ana, he pai atu tēnā i te kōhuru i te reo i runga i te pōhēhē kei te ora tonu te reo, tōna ora nei.

Kia kaua rā tātou e titiro ki te tangata ake e kōrero Māori ana ahakoa hē mai, ahakoa tika mai, engari ko te reo Māori tonu te reo e kōwhetewhete ana. Tērā pea te whakahau ki tēnei hunga, tukuna tō reo Māori, tukuna ō tikanga Māori kia mate rangatira atu.

Kia hoki noa ake nei au ki te taha whakahē i te kaupapa, arā, inā te hua o te whai tonu i te reo me ōna tikanga. He reo rangatira tō tātou reo, me whai tonu kia kounga rawa, kia eke ki ōna tihitihi ki tua rawa o kapenga. Ka riro mā te tokoiti e ngākau nui ana, e pīkoko rawa ana hei kawe. Mā wai kē atu e whakatika, e hāpai? Nei hoki mātou te hikuroa o ngā taniwha o Tūhoe e kai momotu nei kia whakahokia mai te reo ki te mata o te arero. Mā te mana o arero ka kōrero ai, ka whakapuaki ai. Ko te mate o te reo kei roto i ō mātou ringaringa. Kei riro kē mā te tauiwi, mā te ipurangi hoki rānei tō tātou reo e pupuri.

He aha hoki te hua o te whai tonu i te reo me ngā tikanga kia ū, kia mau, kia tika? Nei rā pea te urupare, hei pupuri mā tātou mō ake tonu atu, hei koha ki ā tātou uri whakaheke. Whakaruapūtahanga i a koe! Hei kōpaki i te tokānuku, i a Tā Kingi Ihaka i inoi atu ai,

‘Kaua e te Matua e tukua tēnei tino taonga kia rite ki te moa ka ngaro, engari whakakahangia mātou katoa ki te ako, ki te pupuri kia mau, kia ita, hei koha mā mātou ki te ao…’

Koia i toko ake ai, i rongo ai, ‘ko te taonga tino rangatira hei koha ki te tamaiti, ko tōna reo. Mā tōna reo anō ka taea e ia te nanao atu ngā taonga a ōna mātua tīpuna kia taunga ai tana tū i mua i tōna iwi whānui o tēnei ao, me ā rātou tikanga hoki’. Tēnā te mana o Rehua, tēnā te mana o te tākoha. Ka mutu.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Vic Beats a Dead Horse Named University of Wellington
  2. Issue 20, Vol 81: CW: Tits & Bits
  3. Food Sex
  4. A (Selective and By No-Means all-Encompassing) Look at Neo-Soul
  5. A Love Song
  6. Doing It
  7. Top 5 Sexiest TV Shows I I Was Too Young to be Watching But I Did Anyway
  8. My Dad Wrote A Porno
  9. NT: Te Ara Tauira
  10. Sexing up the Hub: Condoms, Clits & Suzy Cato
Website-Cover-Photo7

Editor's Pick

This Ain’t a Scene it’s a Goddamned Arm Wrestle

: Interior – Industrial Soviet Beerhall – Night It was late November and cold as hell when I stumbled into the Zhiguli Beer Hall. I was in Moscow, about to take the trans-Mongolian rail line to Beijing, and after finding someone in my hostel who could speak English, had decided