Viewport width =
August 13, 2012 | by  | in Features |
Share on FacebookShare on Google+Pin on PinterestTweet about this on Twitter

He Waka Ianei E Herea

Rātou kua wehe atu

I TE TAU KUA PAHURE, KUA TAU MAI TE KAPUA PŌURI I RUNGA I NGĀ TAUIRA, NGĀ KAIMAHI, NGĀ MĀORI O WIKITŌRIA. I NGARO ATU RĀ TE IERE O NGĀ MANU NEI, ARĀ KO ROB DOWNES, KO AUNTY PAE RĀTOU KO BOO (LINDA) PEARLESS. NEI NGĀ MAIMAI AROHA MŌ RĀTOU.

Aunty Pae
nā Te Whanau o Te Herenga Waka

E pā tō reo, e Te Tairāwhiti e
pākatokato ai te aroha i ahau.
Tākiri ko te ata kia kōrihi ko te manu,
ka tahuri, ka tahuri
ka ngātoro i te whenua!
He pōkēao tātaka mai ki te whenua takareko mai ai,
he māwakerangitahi hei ngaki i te mate.

He wharekura, he maraekura, he reo tūnohunohu
he ringatōhao nui ki te whakapeto ngoi kia tino kore tō tātou reo rangatira
e ngaro ki te Whanga-nui-ā-Tara
otira i te mata o te whenua.
kia kore anō hoki e eke te wā manawakiore ai te reo

Maiea maiangi te whare tāhūhū kōrero kōkewa atu, kōkewa mai.
He marutuna, he maruwehi e noho ai ko ia hei pou whakawhirinakitanga
mō te Whānau o Te Herenga Waka.
He manu tītakataka o Te Whānau-a-Apanui me Ngāti Porou i te oinga kōtore o te marae mai i te whānautanga mai o Te Herenga Waka Marae.

He kanohi i kitea ki te marae i ngā wā i kōkiritia ai e te marae me Te Kawa a Māui i āna kaupapa whakangungu, whakamātautau i ngā tauira. Ko ia tonu i noho ki tā te kanohi hōmiromiro aromatawai ai i ngā tauira kia kite atu ai he aha ngā kai i roto i ō rātou hirikapo, he aha rā ngā kai i roto i ō rātou ngākau i roto hoki i ō rātou hinengaro. Tae noa ki ngā kaupapa hoki i whakahaeretia e Ngāi Tauira mō Te Wiki o Te Reo.

He kanohi i kitea anō hoki i ngā hui whakapūmau a ngā tauira. Ko ia anō hoki tēnei i taunaki i ngā tauira i whakawhiwhia ki te raukura. He ngākau mahaki he ngākau makere, he puna mātauranga, he ika a Whiro,

he kete whakatihi a kura mahora, a kura huna i noho ai a Pae Ruha hei whaea, hei kuia mō Te Whānau o Te Herenga Waka. He maire parepare, he pākairiri he manawa ora.

Ko koe tēnā e te onge kāmehameha kua nunumi atu ki te pō.
E kōmanawa ake te whakaingoingo mōu te kura ka riro
ka rehu atu ai koe te whetu kukume ata
kia whitawhita te moe i te moenga te rea
i te moenga te au,
i te moenga te whakaarahia,
ki te takapou wharanui o tō tātau tīpuna a Hinenuitepoo.

Rob Downes
nā Tere Harrison

I ā au e tuitui kōrero ana mōhau e Rob kā pāpōuri mai tō iwi
Kua hinga tō amokapua, kua riro ā Timi, aue Tuwharetoa e

Tō oranga katoa, he ringa tupono koe ki te whare o Te Heuheu
Nā, i ā tātou e poroāki nei koe, e tika ana kia mihia, kia tangihia tō Ariki

Mōhau rā
Ahakoa kua hura te tau
E ua e te ua, te ua i aku kamo
Wai ka rere, mehe tāheke e rere
He puna roimata, he tohu aroha mōhau
E te hua ō manaaki, ō aroha, ō rangimārie, Nāhau rā tātou o Te Herenga Waka i whiri, i here, i pipiri
Kia eke ki te pae poto ā Rangiāhuta,
Kia hora te marino i ngā ngaru wānanga
Koe hei tumu, koe hei tuara, koe hei tuwata Nei tātou ka tangi
Nāu tonu te reo Māori i pāhō ki ngā tai ā Tara, ki ngā awa ō Kairangi
Me te wawata o te ngākau, ka pā mai anō tō reo
Hoi, tē taea e ngākau te aha

Kua mū te koro tui o Korohe
Ana tō pukenga, tō koha ki te ao, ko tō reo Nōhau te reo waiata e hika e
Kei pōhēhē tātou kua ea ā mamae, kua māhea ā riri – e kao, ka ngau kino tonu nei
He aha ai? Te wā i tau heke, i tau wehe ai tō tinana, kihai tō reo e tau maha, e tau toro
Tō tātou tangata manaaki kāore tātou i manaaki, te pūmanawa i hē manawa
Ko taku tangi, ko taku whakamā he rite! Kātahi ka rere mai tō reo ngāwariwari, E tau e te hoa, e tau
Ā ka noho koe, ka waiata i tō waiata E Ihoa o ngā mano te Matua…
Ka whakatoi atu au, Ko tō reo waiata nō tō taha Kahungunu e hoa ā ka pakaru mai tō katakata
I ō pukukata, i ō kupu rongopai, ka tipu taku ngākau hou…
Ā tēnā e te hoa, waiho māua ko mahara nui i te poho o Te Herenga Waka
Kia tirohia koe, kia tirohia o hoa haere ā Tukaki, Raniera, Anipera mā
Kua ngaro atu koe, koutou i te kitenga kanohi Engari kei whatumanawa koutou mau tonu ē He aroha nui mōhau Rob, takato, e moe, okioki e
I runga i te ingoa o te Matua, te Tama, te Wairua Tapu me ngā Anahera Pono me te Māngai, Ae.

A ha Te Herenga Waka iii eee!

Boo (Linda) Pearless
 David Jones 

E rere ngā wai o Tongariro kia waimeha i te mamae e haehae nei i ahau
Ko ngā maharatanga mōu kua mokopapa ki te kokonga ngākau
He reo pākura ki te pō he reo tuitui i te tokomaha
he wai kei te rangi he wai kei ngā kamo, E hine moe mai rā.

 

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Cuttin’ it with with Miss June
  2. SWAT
  3. Ravished by the Living Embodiment of All Our University Woes
  4. New Zealand’s First Rainbow Crossing is Here (and Queer)
  5. Chloe Has a Yarn About Mental Health
  6. “Stick with Vic” Makes “Insulting” and “Upsetting” Comments
  7. Presidential Address
  8. Final Review
  9. Tears Fall, and Sea Levels Rise
  10. It’s Fall in my Heart
Website-Cover-Photo7

Editor's Pick

This Ain’t a Scene it’s a Goddamned Arm Wrestle

: Interior – Industrial Soviet Beerhall – Night It was late November and cold as hell when I stumbled into the Zhiguli Beer Hall. I was in Moscow, about to take the trans-Mongolian rail line to Beijing, and after finding someone in my hostel who could speak English, had decided