Viewport width =
Screen shot 2012-08-14 at 2.50.46 PM
August 13, 2012 | by  | in Features |
Share on FacebookShare on Google+Pin on PinterestTweet about this on Twitter

Ka Ora Te Reo I Te Aha?

Ko te reo te mauri o te mana Māori*

 

KUA 25 TAU I TE KŌKIRITANGA MAI O WAI11, TE KERĒME REO MĀORI NĀ NGĀ KAIWHAKAPŪMAU I TE REO MĀORI I TUKU. I TĒNEI WĀ NEI E TIKA ANA KIA HOKI WHAKAMURI Ō TĀTOU WHAKAARO KI TAUA WĀ, I ĒNEI TAIKURA E WHAKAPAU KAHA ANA KIA TANGATA WHENUA TŌ TĀTOU REO MĀORI I TŌNA AKE WHENUA, AHAKOA HE TIKA RĀ KIA PĒRĀ.

Me whakamihi i ēnei kaiwhakaihuwaka i puta ai te ihu o tō tātou waka whakaora reo Māori ahakoa te pukepuke o te moana i rere ai rātou kia tata mai te one o koiora. Kia hoki atu tātou ki te kerēme titiro ai i ōna ekenga, kātahi ka anga atu ki te ara whakamua e ora ai tō tātou reo Māori, ko te kerēme o WAI11 kei te ringaringa e mau ana. E 25 tau ki muri nei, e hia kē nei ngā miriona tāra e pau ana i tēnei kaupapa, kāore anō kia tangata whenua te reo i roto i te tokomaha, kāore e rangona ana te reo i ngā wāhi matawhānui, kāore pea e tino rangona ana i ngā marae haunga ko te wā pōhiri. Ka mutu, kāore e taea te kī kua ora anō te reo Māori engari kē ko tāna he mate haere tonu. Nā reira taku pātai ki a tātou, ka ora te reo Māori i te aha?

Mauri tū, mauri ora—Te Kerēme

I ngā tau i mua tonu i a WAI11, aro tōtika ai a Ngāi Māori ki tōna reo e ngoikore haere ana, nā te Kāwanatanga me āna mahi patu reo i hēmanawa ai. Nā Ngā Kaiwhakapūmau i te reo Māori tēnei kerēme i kōkiri. E rua ngā hui i tū, ko tētahi i Te Awakairangi, ko tētahi atu i roto i te uma a Te Tumu Herenga Waka, arā, tō tātou whare nui.
I te marae nei, ka whakapuakihia te tatau kōrero i te 8 o Oketopa, i te 12 katia anō
ai. Matanga reo atu, tohunga atu, pononga reo atu, kaitōrangapū atu, roia Māori atu, a wai atu rānei i tae atu hei whakatakoto iho i ō rātou whakaaro ki mua i te Taraipiunara o Waitangi. Ko tō tātou kuia a Aunty Pae tētahi, nōna i roto i Te Rōpū Wāhine Māori Toko i te Ora.

E toru ngā hua nui i puta mai i te kerēme:

  1. 1. Ko te whakamanawatanga ā-ture o te reo Māori
  2. 2. Ko te whakaaetanga mai kia kōrerohia te reo ki rō kōti
  3. 3. Ko te whakatūnga mai o Te Taura Whiri i Te Reo Māori – te hanga māna te whakaoratanga o te reo e whakahaere
    1. Kua takoto te mānuka! Mauri oho, mauri ake!

      Ehara a WAI11 i te mutunga atu o ā tātou mahi hei whakaora i te reo engari kē ia he tīmatanga noa. Mārakerake ana te kitea kāore i te ōrite te mana o te reo Māori ki tō te reo Pākehā, ahakoa te whakahau a te ture kia pērā. Ko te nuinga o Ngāi Māori e tipu Pākehā mai ana me tana reo hei kawe i ōna whakaaro: he tūāporoporo noa iho tō tātou mōhio ki tō tātou reo. Āe mārika he tīmatanga noa iho tēnei kerēme – mā tātou tonu e hiki ake te mānuka i whakatakotohia iho e rātou. Engari anō he uaua pea te whakatau ko tēhea te ara tika hei whakaora i tō tātou reo kia rangona ai tōna waitī, tōna wainene i ngā wāhi katoa. Me waiho mā te Kāwanatanga e kawe? Me waiho mā ngā tamariki o ngā Kōhanga Reo, o ngā kura kaupapa rānei? Me whakahau rānei kia akona katoatia ngā tauira o Aotearoa ki te reo? Mōku ake nei, kotahi tonu te hopo nui e aukati ana i tā te reo whai wāhi i tērā e manakohia ai—ko ngā waiaro a te tangata, Māori mai, Pākehā mai hoki. E kara mā, taihoa e whakatinanahia ake tāku e kōrero nei! Ia te tau, takihuri mai ai ētahi ki te whakatakē, ki te whakaiti i Te Ao Marama, he kore nō rātou e mārama ki āna kōrero. Ka whakapāhotia tana koretake, tana kore whai hua rānei, ka rangona te mauāhara ki te reo Māori, ki te tangata Māori. E hoa mā, waingōhia ana te kī kei te mataku tēnei hunga ki te reo Māori, ā, mā ēnei momo whakaaro e kore ai tō tātou reo Māori i te mata whānui o tēnei whenua. Ka taka mai pea te pātai he aha e whai wāhi nei ētahi atu reo i tēnei whenua? Tiapana mai, Hainamana mai, aha mai rānei. Kōrerotia ai ēnei i ngā wāhi katoa o te whenua me te kore aha mai o te tangata (haunga ko te kaikiri!) Ko te rerekētanga o ēnei ki te reo Māori, ehara ko ēnei reo i te reo rangatira, i te reo motuhake o tēnei whenua – koia tonu te ‘kāri hai’ kei te whatingaringa a te Māori. Kei te pakanga tonu te reo Pākehā ki te reo Māori, engari mō ērā atu reo.

      Heoi anō rā taku pātai, ka ora te reo Māori i te aha? Ki ahau nei, e kore e ora i te aroha, i te whakapau pūtea, i te whai whakaaro noa, i te whakaaro pai ki ngā tāngata katoa (amine!) rānei. Ka ora tō tātou reo i te āta whakatau ā-hinengaro nei ka taea te reo Māori i ēnei wāhi, e tika ana hoki kia pērā, me te tahuri atu ki te whakatiketike ake i tō tātou reo kei ngā wāhi matawhānui e kōrerohia nei. Ina huri mai te tangata ki te whakaiti i a koe me tō kōrero Māori, kia tū tekoteko koe i runga i tō mōhio kua whakatangata whenuatia e koe tō reo rangatira, tō reo motuhake i tōna ake whenua. Anō te mahi rangatira!

      * Hei whakamōhio noa, ko tēnei kōrero nā Hēmi Hēnare i te kerēme o WAI11 e rangona ana. Katoa ngā kaupapa whakaora reo o naianei e tōāi ana i te whakataukī nei hei tūāpapa mā rātou. 

 

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. SWAT
  2. Ravished by the Living Embodiment of All Our University Woes
  3. New Zealand’s First Rainbow Crossing is Here (and Queer)
  4. Chloe Has a Yarn About Mental Health
  5. “Stick with Vic” Makes “Insulting” and “Upsetting” Comments
  6. Presidential Address
  7. Final Review
  8. Tears Fall, and Sea Levels Rise
  9. It’s Fall in my Heart
  10. Queer Coverage: Local, National, and International LGBTQIA+ News
Website-Cover-Photo7

Editor's Pick

This Ain’t a Scene it’s a Goddamned Arm Wrestle

: Interior – Industrial Soviet Beerhall – Night It was late November and cold as hell when I stumbled into the Zhiguli Beer Hall. I was in Moscow, about to take the trans-Mongolian rail line to Beijing, and after finding someone in my hostel who could speak English, had decided