Viewport width =
August 5, 2013 | by  | in Features |
Share on FacebookShare on Google+Pin on PinterestTweet about this on Twitter

Iron Maori

E ngā iwi o te motu
E takahi ai i te nukuroa o te pane o te motu
Ki Te Moana-i-Raukawakawa
Tumutumu parea, rākau parea
Whānui te ara ki a Tāne
Tāpiki ai rā, e rarau.

Kua roa te wā te ngaru o IronMāori e whakarahi ake. Ko tōna ia kua papaki ki ngā whanga o te motu. Kua kitea e te iwi te māreparepa nei, ā, kua aro mai ētahi.

Nā tēnei kaupapa anō te tokomaha i hiamo ai kia whakapakari i ō rātau tinana otirā kia whakatenatenahia te whānau whānui kia whakamatua i ō rātau ake hauora. I tēnei tau tonu i papaki atu te ngaru hira nei ki ngā takutai ki Te Pāpaka a Māui (Ahitereria).

I te rā 22 o Pipiri i whakatū i te whakataetae tuatahi o IronMāori ki Runaway Bay, Te Pāpaka a Māui. I rere atu ētahi o mātau nō te whānau TriPōneke kia tautoko i tēnei kaupapa hauora. He nui noa atu ngā momo whakataetae hākina i haerehia i taua rā – arā, ko te hāwhe oma taumano (21km – ei, i tawhiti ake engari he kōrero anō tērā), ko te oma tekau kirometa, te oma rima kirometa, me ngā hākinatoru tāwhitinga poto (a-tangata, a-tima rānei).

Ki ahau he whakataetae tēnei kaupapa ka rua, he hui whakawhanaunga ka tahi. Nō taku tirohanga atu ki ngā kaihākina ko te painga nui, he tino rerekē te tūāhua o ngā kaihākina o te rā. Ehara i te mea he tūpuhi te katoa, ehara hoki i te mea he mārōrō te nuinga. Ko ngā kaihākina he upoko hina, he mātāpuputu, he mātātahi hoki. Me kī i haere mai ngā reanga katoa o te whānau.

I te ata o te whakataetae i puta te hīhī, i haere mai te mano. I whakarite ētahi o ngā kaihākina i ā rātau taputapu, ā, whakaarohia hoki ā rātau nā mahere mō te rā, engari ko ētahi atu te kōrerorero me te mihimihi ki ngā whanaunga kē ā rātau nā whakaritenga. I pērā au.

Haere ake te wā ahakoa ko wai ka patua e te āmaimai, tē karo. Kia tīmata rawa ia whakataetae kātahi ka puta a hari, a koa hoki. Kei oma ana au ka rongo ki ngā kupu whakaaki o tēnā kaihākina, o tēnā ki a rātau anō. Te mutunga rawa o te hari kia rongohia.

Hātakehi rawa mō te hawhe oma taumano, i te timatanga he nui ngā kōrero nā wai rā, nā wai rā, ā, ka kore he mihimihi, tokoiti o mātau e menemene ana, kaha rawa ana kē mātau e kimi i te hā kei taka nō te pau kaha. Hei aha te āmaimai kātahi te ngau mai o mamae me te tūmanako kia tere tae atu ki te whakaotinga o te whakataetae nei. Kitea ana te whakaotinga e ngā kaihākina me te rongo anō ki te iwi e whakaharihari mai ana kātahi ko te manawareka, ka tere ake, ā, ka tutuki.

I manahau te minenga kia tutukihia ngā whāinga e ngā kaihākina. Kāore he painga kei tua atu i te whakahīhī nei o te tangata ki tōna ake hoa, whanaunga rānei kua ekengia tōna ake maunga.

I muri tata mai i te whakataetae i paku wānanga te whānau o TriPōneke ina kia hoki atu ki Te Pāpaka a Māui ā tērā tau. Kotahi te whakautu, ‘Āe’. He hiahia nōu, he wawata nōu kia whakapakari ake i a koe, whakahiamo rānei i tō whānau ki tēnei kaupapa tirohia ki a FB ‘TriPōneke’, ‘IronMāori’ rānei.

Me mihi ka tika ki te whānau IronMāori – Tīmatanga Ararau Trust. Mahia kia whāia, hei whāinga mā te iwi.

Ka mihi rā hoki ki te kapa whakahaere o te rā.
Kātuarehe.

Timoti B

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge