Viewport width =
August 5, 2013 | by  | in Features |
Share on FacebookShare on Google+Pin on PinterestTweet about this on Twitter

Te Reo Maori: He Reo Whakaiti Tangata?

Hei kōrero whakarewatanga māku kia tukuna taku maimai aroha. Taku aroha nui ki taku tuahine a Hinerangi Ngārimu i wehe atu i ahau ki ōna tīpuna i te takahanga mai o tēnei tau – kei te ngau tonu te mamae, e kare. Ahakoa pēhea te ātaahua o te kōrero e tāreia ana mōu, e kore e eke, e kore e rite ki tōu ātaahua, ki te taumata e tika ana mōu. Me taku tuahine, Boo Boo. Kua roa koe e ngaro ana i te tirohanga kanohi. Engari ko tō menemene, ko tō katakata, ko tō reo wainene kua titia ki taku manawa –e kore e ngaro i ahau, engari ka noho kē ki roto e tōiriiri ai, e kapakapa tonu ai te whatu manawa, haere ake nei.

Ko te reo Māori te kaupapa o tēnei tuhinga (mātua, me reo Māori ko te wiki o te reo Māori tēnei!). Engari, ko tōna kaupapa kē, ko tā tātou manaaki, ko tā tātou āwhina i a tātou anō i tēnei haerenga ki te ako i te reo Māori. I kōwhiria ai tēnei kaupapa nā te mea he nui ngā wā kua noho māua ko tētahi o aku tauira ki te wānanga i te whakaaro he reo whakaiti te reo Māori, he reo takahi mana, he reo patu tangata. Kia whakamahukitia ake tēnei kōrero āku. I roto i taku ako i te reo, kotahi tonu te āhuatanga e riri nei ahau, ko tā tātou tere ki te whakaiti i ā tātou hoa kōrero, hoa ako. Ko aku tauira me aku hoa e haere mai ana ki ahau me te auē ki ō rātou whanaunga, kaimahi, hoa ako rānei e kaha ana te whakaiti i a rātou mō te hē, te hapa, te aha rānei o ō rātou reo Māori. Me taku whakaaro ake, i takea mai tēnei āhuatanga i hea? He aha e hua mai mō te kaiwhakaweti i tana whakaiti pēnei? Me te pātai nui katoa: he aha e hui mai mō te reo Māori i te whakaiti pēnei?

Kia waiho i te pātai tuatahi me te pātai tuarua, hei aha māku ērā. Kia tōtika ki te pātai tuatoru me te ui atu mēnā kei te whakamahia te reo Māori hei whakaiti i te tangata, he aha rawa te hua ka puta mai mō tō tātou reo hei ngā tau kei te pihi ake? Katoa tātou e mōhio ana ko te reo Māori he reo e kōrerotia ana e te tokoiti, ā, me mātua whakapau kaha kia tokomaha ake ai tā tātou rahi.

Ā, e tokomaha ake ai tā tātou rahi me rata mai ētahi atu ki te kōrero Māori. Kāti, ko te tangata e rite tonu ana tana whakaiti, tana tūkino i tētahi atu mō tōna reo Māori te take, he patu taua tangata rā i tō tātou reo, he kaiwhakamate taua tangata, ehara ia i te kaiwhakaora. Kāore i kō atu i kō mai.

O ngā tāngata kua patapataihia e au mō tēnei take, kua kī mai ētahi, ‘āe, he iwi whakatoi te iwi Māori. Ki te kore koe e hiahia kia whakatoia koe, kaua e akona te reo. Kaua rānei e aro mai.’ Engari kāore au i te kōrero mō te whakatoi, he wairua anō tō te whakatoi, he wairua ngahau. Ā, i roto i ngā mahi ako reo – ahakoa te reo – me ngahau, me matua ake te tauira ki te katakata ka hapa ana ia, kei whakamā. Kei te kōrero kē au mō te whakaiti, whakaiti kino nei, mō te patu tangata te take, mō te patu wairua te take. Kua kite au he nui ngā tāngata kua tīmata te ako i runga i tō rātou aroha nui ki te reo, engari kua mutu te ako ka whiua mai ana ngā kupu matangerengere e tētahi atu. ‘Ki te kore te tangata e rite mō te wera, me puta atu i te kīhini!’ E kī, e kī, ko te mutunga kē mai o te whakahīhī ko tēnā whakaaro! Ehara tēnei i te whakataetae tunu kai, ehara tēnei i te hākinakina o te Hatarei, he reo kē tēnei. He whakapapa Māori ō rātou, ko te here kei waenganui i a rātou me ō rātou tīpuna ko te reo Māori tonu. He reo Māori tōu, me whakapau koe i ō kaha kia whāngaihia ētahi atu ki te kai mārō i tukuna mai rā ki a koe. He wā anō mō te whakaiti tangata – kāore he tauira i tua atu i ngā kaioraora me ngā oriori i titoa e ō tātou tīpuna. Engari mō te tangata e ako ana i te reo Māori, kia ngāwari te āhua, e hoa mā, kia āhua matatau tēnā tangata. Hei reira pea ka tika tō whakatoi i te tangata. Hei aua wā hoki me whakaaro ake koe i mua i te takahanga o āu nā kupu, he aha ka pahawa i tēnei kōrero āku? Ko wai ka kata mai, ā, kei te katakata ki te aha, ki a wai?

Ko tēnei āhuatanga i waenganui i a tātou me mutu. Tukuna tērā āhuatanga kia mate. Inā rā te kōrero: “Kapo atu koe i te kai i ngā ringaringa o te tamaiti, e taea rānei e koe te whai i ngā turanga o ā tīpuna?”

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge