Viewport width =
August 5, 2013 | by  | in Features |
Share on FacebookShare on Google+Pin on PinterestTweet about this on Twitter

Toku Haerenga

E ai ki ētehi tangata, ehara te mea nui i te wāhi haere, engari ko te haerenga kē. E whakapono rawa ana au ki tēnei whakaaro, engari he aha tēnei mea te haerenga? He hekenga ki tāwāhi, ōrite ana ki te taenga mai o ngā waka o ō tātou tūpuna? He hekenga mā raro, ōrite ana ki Te Heke-Mai-i-Raro o Ngāti Toa? Kāore e kore, engari ka taea e te hinengaro hoki te haere. I ētehi wā, ko ēnei haerenga, ngā haerenga a te hinengaro, a te ngākau rānei, ngā mea nui o ō tātou oranga. Koirā te take ehara te mea nui i te wāhi haere, engari ko te haerenga kē.

Ko tētehi o ōku tino haerenga ko te haerenga ki te ako i te reo Māori. I tipu ake au ki Ōtaki, ā, he kaha rawa atu te reo Māori me ngā tikanga Māori ki reira, nā te kaha o tōku iwi ki reira, arā ko Ngāti Raukawa ki te Tonga. I rauna au i te reo – ki tōku kura, ki tōku marae, ki te taone hoki – engari kāore au i ako i te reo; ruarua noa iho ngā kupu, ngā rerenga Māori i mōhiotia e au. Nō reira, i ahau e noho ana i roto i te wharenui, whakarongo ana ki te whaikōrero o ngā kākā waha nui a Ngāti Raukawa, ka whakaaro au me ako au i te reo o ōku tūpuna, ki te hāpai i ngā kupu o tōku tūpuna ko Wī Parata te Kākākura: “Whakarongo ki ngā kupu o ngā kaumātua, kākahutia i runga i a koe, mau hei hoatu ki te ao hou”.

Nō reira, ka tae mai au ki Te Whare Wānanga o Wikitoria, ka uru au i te pepa MAOR 101 Te Timatanga ki te Reo Māori. Nā taku whanaketanga, i mārama au i ngā mea māmā noa iho o te reo – te whakahua tika, ngā rerenga māmā – otirā te iti hoki o taku mātauranga o te reo i taua wā! Ko taku tino hiahia i taua wā ki te whakapakari i tōku reo ki te tū hei kaikōrero pai, hei kaituhi pai hoki, engari i mua i tērā, he nui taku mahi. I roto i tērā tau tuatahi, i mōhio au he tino roa rawa atu te huarahi o te reo.

Pōturi rawa te whakapakaritanga o tōku reo, heoi i mahi tonu au. I ahau e ako ana i te reo, ka ako hoki au i ngā mea hōhonu o te mātauranga Māori. Ka taea e au te ako ēnei mea nā te whakapakaritanga o tōku reo; nā te reo anō i whakaako i ahau. He mea nui tēnei, nā te mea e rua ngā hua o te akoranga o te reo; ko te reo anō, me te mātauranga Māori, ngā tikanga tuku iho i ō tātou tūpuna. Koinei te take ka hāpai au i te Māori Studies hei kaupapa matua tuarua mō tōku tohu i roto i taku tau tuarua ki te Whare Wānanga. Kua huri taua kaupapa ki taku tino kaupapa.

I muri mai i tērā, ka haere tonu te haerenga o te reo; i tū au hei kaitūruki o te pepa MAOR 101 – i te whakaako au i ngā tauira atu o te reo, rite tonu ana ki ahau! Te rerekētanga hoki o te whakaako o te reo ki te akoranga o te reo, nō reira he akoranga nui hoki tēnei mōku. I ahau e ako ana i te reo, ka whakaako au i te reo hoki, nō reira ka whakanui tonu taku mātauranga – o te reo, o ōna tikanga, o te Ao Māori hoki.

Kua mutu taku tohu ināianei, ā, ka whakapōtae au hei te mutunga i te tau, engari ka haere tonu te haerenga. Kāore i ārikarika ngā hua kua puta; kātahi tonu au ka timata i tētehi mahi ki Te Tari Whakatau Take e pā ana ki te Tiriti o Waitangi (Office of Treaty Settlements), ā, kāore e kore, kua whiwhi au i tēnei mahi nā tōku mātauranga me tōku reo hoki. Engari kore rawa taku haerenga o te reo e mutu; e ako ana au i ngā wā katoa! Koirā te take, ehara te mea nui i te wāhi haere, engari ko te haerenga kē, ā, ko tērā te wairua o te whakataukī hoki: “Ko tōku reo tōku ohooho, ko tōku reo tōku matapihi mauria.”

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Cuttin’ it with with Miss June
  2. SWAT
  3. Ravished by the Living Embodiment of All Our University Woes
  4. New Zealand’s First Rainbow Crossing is Here (and Queer)
  5. Chloe Has a Yarn About Mental Health
  6. “Stick with Vic” Makes “Insulting” and “Upsetting” Comments
  7. Presidential Address
  8. Final Review
  9. Tears Fall, and Sea Levels Rise
  10. It’s Fall in my Heart
Website-Cover-Photo7

Editor's Pick

This Ain’t a Scene it’s a Goddamned Arm Wrestle

: Interior – Industrial Soviet Beerhall – Night It was late November and cold as hell when I stumbled into the Zhiguli Beer Hall. I was in Moscow, about to take the trans-Mongolian rail line to Beijing, and after finding someone in my hostel who could speak English, had decided