Viewport width =
Waka Hourua
May 31, 2014 | by  | in Features Homepage |
Share on FacebookShare on Google+Pin on PinterestTweet about this on Twitter

Waka Hourua

E tū ana ki runga i tōku maunga tapu a Kahuranaki

E titiro ana ki raro ki tōku awa a Ngaru-roro ki te whenua rā i te Roto Pounamu. Ko Tānenuiarangi te whare tūpuna e tū nei, he whare mō ngā uri o Ngamihi, o Ngāti Hori, tae noa ki a Toaharapaki, me Ngāti Hinemoa e. Ko Te Tahatuoterangi tēnā hei whakaruruhau mō ngā uri e!

E ngā tiratū e ngā pou mārō, o tēnā tai, o tēnā tai tēnā rā kōutou katoa. Ko ngā tai a Kupe wēnei e whakaohooho, e whakaaraara ana i Te Moananui-a-Kiwa kia anga te titiro whakamua ki ngā rā o ngā mātua tūpuna e hira mai nei, e kapokapohia ana e te hau a Tāwhirimatea. E whakaterea ana i ngā moana o Tangaroa, e maua ana ki ngā mātauranga a Tānenui-a-Rangi, kia puta tātau ki te whai ao, ki te ao mārama! Tihei mauri ora!

E hika mā, kua tae te wā e nekeneke ana ngā tai, he tai hou he tai pari e haeremai nei ki muri i a tātau, tēnā kauaka e mahue i tēnei waka.

Ko te waka e kōrero nei au ko te waka hourua. Koinei rā te timatanga o mātau ngā tāngata o Te Moananui-a-Kiwa ahakoa Māori mai, Tahiti mai, Hawaiki mai, Satawal mai rānei, koianei tō tātau nei whakapapa.

Nā kua tīmata kētia te huringa mai o te tai kia whakaoho anō aua mātauranga whakatere waka i roto i a tātau te hunga Māori o Aotearoa, heoti anō he whakaterenga tawhitinui, tawhitiroa, tawhitipāmamao tonu kei te haere, kia kore ai e ngaro anō āmoa nei.

Nā, ko ahau tētahi e manakotia ana, e wawatahia ana kia tae atu tātau ki Tawhitinui, ki Tawhitiroa, ki Tawhitipāmamao. Ehara mā te whai ake ko Manako-uri, Manako-tea anake, kāhore! Engari mā te nanaiore, mā te whawhai tonu atu (ake ake ake) hoki.

Ko tēnei he whakanui i te mātauranga. Te mātauranga nō mua rā anō i te whakatō i te kakano i Rangiatea, ā, waimarie ana tātau kāhore i ngaro āmoa atu nei. Engari aua kākano kei te pakapaka, kei te mimiti haere. Kia whakahua anō i taua whakataukī “Ehara taku toa i te toa takitahi, engari taku toa i te toa takitini!” Hei wero i a kōutou kia hāpai i te kaupapa nei.

Nā wā mātau whanaunga o Hawai’i i whakaoho anō nei i tēnei kaupapa, nō reira ka mihi ake ki a rātau, ki te waka Hōkūle’a. Heoi ano nā te ngarongaro haere o ngā tohunga kaiwhakatere o Te Moananui-a-Kiwa ka huri ake rātau ki te motu o Satawal, ki te tohunga rā a Papa Mau Piailug hei whakaako anō i a tātau o wēnei tai. Nā ko Hekenukumai Puhipi, ko Jack Thatcher, ko Hoturoa Kerr, Ko Stanley Conrad wētahi me mihi atu. Nā ki te waka Te Aurere, ki te waka Ngahiraka-mai-Tawhiti, ki te waka Haunui,a, ki te waka Aotearoa. Mei kore ake ko rātau ko mātau tērā kei raro e putu ana. Ko mātau o te waka Te Matau a Māui tēnei e mihi ake ki te tipua rā a Papa Mau, tae atu ki ngā mātāwaka e rere nei i runga i a Hinemoana.

Tae noa atu ki tēnei wā, 40 tau ki muri, ko rātau tērā e nanaiore ana kia ora anō wā tātau Ao waka. Nā, ka tīmata tēnei te whakatere waka mō te 4 tau anake, nō reira ko tēnei he pia noa iho i waenga i ngā tōtara whakahae. Ko Te Matau a Māui tōku waka, ko Ngāti Kahungunu te iwi, he kaihautū hoki ahau i runga i tōku waka.

Ki tā te nuinga he tino rerekē te Ao o te kau moana, o te amo tawa. Waihoki, kei te tika pea taua whakapae. Waiho māku hei whakatauira atu ki a koutou he pēwhea nei tēnei ao, kia manako ai koutou ki tēnei kaupapa. Kia whakataukī ngā wawata a rātau mā.

Nō reira, ko tēnei e whai ake nei hei tauira i tētahi rā i runga i te waka.

0230haora – Nā te aukaha o ngā ngaru whakapiki ka whakaara ahau, me te mārama pai te kaha hoki a Tawhirimatea ki te pupuhi, ki te tīehuehu i a Tangaroa. Nā te tata mai o te wā māku hei matapopore, hei tiaki i te waka ka tikina e au I āku kakahu mahana. Tēra he poraka wūru, he tarau wūru, he poraka wūru anō, he koti ua,a, he tarau ua anō hoki.

0300haora – Ka tīmataria tōku wā matapopore, tokotoru o mātau e whakatere ana i te waka, katahi ko te rōpū o mua ka haere ki te moe. Mā ngā tangata tokotoru e manaaki I te haerenga o te waka. Waimarie ana mātau i o mātau koti ua. He kaha rawa ngā ngaru ki te whakamāku i a mātau, ka pēnei mō te roanga o te ata

0400haora – Kei te kaha tonu a Tawhiri. Heoti anō kua mutu te ua, he kāpuapua kē.Kei te āwangawanga te kaiwhakatere, i te mea kua rua rā mātau kāhore anō ia kia kitea he whetū, i te Marama, i a Tamanuiterā rānei. Tōna whakapae kei te aro tonu mātau ki te moutere. He rua ngā rā tēnei kāre he paku tohu o te whenua.

0600haora – Kua tata te aranga mai o te ata nō reira me tīmata mātau ki te tunu i te Parakuihi. Nā te kaha o te hau ka tunu Hakareti, Pāreti noa iho, te wītipiki hoki. Ka ara ake ngā karakia i te kōmarutanga mai o Tamanuitera, mō te wā kai hoki.

0700haora – Kua mutu tā mātau wā i runga i te hoe, ka huri ki te rōpū whai ake. E toru ngā rōpū whakahaere i te waka, ao noa, pō noa, tae atu ki te moutere e whakaterea ana te waka. He whā ngā haora o te mahi, he waru ngā haora mo te whakatā,he whā ngā haora mo te mahi,a, he whā ngā haora mo te whakatā. Anikā te tūmanako, heoi i roto mai i ngā wā whēuaua kāre pea he wā whakatā, he rahi ngā mahi inā kei te riri a Tawhirimātea rāua ko Tangaroa

1000 haora– Kei te kaha ake te hau, nā reira mātau ka whakaritea i ngā rā. Ka whakahekea ngā rā kia iti iho, kia kore ai e tīhaehae, kia kore rānei te tira e whati. Ka aroha atu ki te tangata nāna te mahi here i te rā ngongohau, koirā te mahi uaua rawa, te mahi e tōpunitia ai te tangata.

1200 haora – Ka kai anō mātau. He reka te kai, ahakoa kaha pupuhi a waho. Te waimārie mātau i runga i te moana, kārekau tētahi Makitanara, Pūreka Kingi, Pīha Hata rānei o te moana. He kai ora anake kei runga i te waka (hāunga i te paku tiakarete, rare hoki!)

1500 haora –Kua rere te wā, ko tēnei te wā ka whakahaeretia ana I te waka e tātou. Ko au ki runga i te hoe, ko Poi hei karu ki mua, ko Rai hei whakarite kai. Nā te kaha o te hau, me tino aro ahau ki te mahi o te urungi. Me titiro ki mua, me titiro ki muri, me titiro ki ngā tahataha hoki. Kia tūpato atu ki wētahi atu waka, me mātua mōhio ko tēwhea ara tērā e whaia ana tātau.

1700 haora– Ka hoki ahau ki runga i te hoe, katahi rā ka kitea atu i tētahi ngaru whakapuke rawa e haramai nei ki te whakararu i a mātau. Ka tīwaha atu “NGARU!” me te mau atu i te hoe. Arā ko Poi tērā e mau ana i tāna aho ki te waka, ko Rai tērā e noho ana i te whare. Ka haeremai te ngaru ka tuki ki te taha o te waka, ka haruru mai ngā riu,a, ka piki te ngaru i ngā rauawa. Waihoki ka waipukehia te katoa o te kaupapa, ko mātau tērā e kaukau ana ki runga i te waka! Waimarie ana mātau i ngā aho whakaora!

1900 haora – Katahi anō ka kai mātou, ā, I tenei wā kei te tō haere a Tamanuitera. Ka tuku anō ngā karakia ki te mahana i whiwhi, kia pai hoki te pō e ara ake. Kua mimiti haere te hau. Akuni pea he pō tiahoaho? Nā te ngēngē haere ka hoki ki te moe.

2100 haora – Kei raro ahau e moemoeā ana. Nā te nekeneke haere o te waka me te rangona hoki o te tai e tuki ana i te waka he rerekē te moemoeā o te waka. He kaha ake ngā moemoeā i te maruāpō. He ngāwari ki te maumahara hoki.

0000 haora – Ka oho ake ahau me te mea nei kua kōhengihengi te hau, he mahana te pō. Ka piki ake ki waho o ngā riu, ka kite ahau i te Marama, ko Rakaunui, i ngā whetū e pīataata ana. Ka rongo i te wairua tau o te rōpū mahi, me te mōhio mai kua tau te kaiwhakatere, kua kitea e ia i ngā tohu ara hei whakamōhio atu i te ara tika hei whai. Kua koa te katoa, kua Ngākau Aotea!

Tiratū, pou = Mast

Rā = sail

Satawal = te moutere o Papa Mau

Manako-uri, Manako-tea = Magellan Clouds (he kohinga whetū tata atu ki a Maahutonga)

Tohunga whakatere = Navigator

Kaihautū = Captain/Skipper

Kau moana = voyager

Amo tawa = voyager

Aukaha = currents

Tīehuehu = stirring

Wā matapopore = watch system

Hakareti = watties spaghetti

Pāreti = porridge

Rā ngongohau = head sail(s)

Tōpuni = waipuketia

Urungi = steering paddle/rudder

Riu = hulls

Rauawa = upper sides of the waka

Kaupapa = deck

Mahana = kupu anō mō te rangi/rā

Ngakau Aotea = state of content

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge