Viewport width =
May 24, 2015 | by  | in Ngāi Tauira |
Share on FacebookShare on Google+Pin on PinterestTweet about this on Twitter

Me kaupapa here te reo Māori mō ngā ākonga katoa i te kura tuarua?

E toru ngā reo matua o te whenua nei, arā, ko te reo Ingarihi, te reo Rotarota o Aotearoa me te reo Māori. Ahakoa tana tū hei reo matua o Aotearoa nei, kāore a te reo Māori e noho ana hei kaupapa here mō ngā ākonga katoa o ngā kura tuarua, pēnei i te reo Ingarihi. Hei tā ētahi me ōrite te taumata mō ēnei reo e rua ki te kura tuarua, eaoia hei tā ētahi atu kāore he take o te ako reo Māori. I tēnei wā tonu nei ko tēnei kaupapa he kaupapa whakawehewehe ka tautohetia e te tokomaha, ā, ko tēnei kaupapa te tāhūhū o te tuhinga nei.

Ki te tū te reo Māori hei kaupapa here mō ngā ākonga katoa i te kura tuarua ka puta he reanga reorua. Koinei tētahi take matua mō rātou e whakaae ana ki te kaupapa nei nō te mea he maha ngā painga ka pā atu ki te tangata reorua. Kāore ēnei hua e pā ana ki te āhua o te ako anake, engari e hāngai ana hoki ki te rapu mahi me te kōrero a te tangata ki tangata kē atu .Anei ētahi painga ka riro i a rātou:

  • He māmā ake te ako anō i tētahi atu reo. He mea tino pai rawa atu tēnei, i ēnei rā, nō te mea ko tēnei ao he ao reomaha.
  • He maha ake ngā āheinga ki te rapu mahi mō rātou nā te mea he pūkenga anō tā rātou, arā, ko ngā “Pūkenga Ako Reo”.
  • Ka āhei rātou ki te kōrero ki te tini o ngā tāngata nā te mea e rua ngā reo ki ā rātou kete. Nā reira, ki te kore tētahi tauhou e mōhio ana ki te reo a te marea, tērā pea ka mōhio ia ki te reo tuarua a te tangata reorua.
  • I a rātou e ako ana i te reo o tētahi atu ka ako hoki rātou i te ahurea o taua reo, ā, nā taua āhuatanga, i te nuinga o te wā he hūmārika tō te tangata reorua ki ngā ahurea kē atu.

He patanga anō tā te tū a te reo Māori hei kaupapa here i tua atu i aua e hāngai ana ki te tikanga reorua.

“He reo e kōrerotia ana, he reo ka ora”

Koinei whakataukī he whakataukī kua puta i te rīpoata: “Te Rautaki Reo Māori”. Ka kōrero tēnei whakataukī mō te oranga o tō tātou reo rangatira, arā, kia ora ai te reo, me kōrero te reo. I ngā tau kua pahure ake nei e hia kē nei ngā parekura e tū ki te pēhipēhi, ki te whakangaro atu i tō tātou nei reo rangatira. Engari, kāore a te reo Māori mō te tuohu mō te mate rānei. Hei taupaepae i aua mea e ngana ana ki te whakamate i tō tātou reo, i whakaritea ētahi rautaki ki te whakaora i te reo Māori. Ko tētahi atu rautaki e hāngai ana ki te whakaora i te reo Māori ko tēnei kaupapa. Mēnā ka tū te reo Māori hei kaupapa here kāore e kore ka whānui ake te rahi o te hunga e āhei ana ki te kōrero Māori. Hei tāpirihanga ki taua kōrero, ko te reo Māori me ōna tikanga ētahi āhuatanga o te tuakiri me te hītori o Aotearoa. Mēnā ka tū te reo Māori hei kaupapa here, ka ako hoki ngā tauira i ngā tikanga Māori. He aha ngā painga o tērā? Hei tauira; whakaarohia tēnei mea o tātou te pōhiri. Ka haere mai tētahi manuhiri motuhake, ia wā, tū ai te pōhiri. Ki te kore he tangata e ahei ana ki te kōrero Māori, ka raru ngā tāngata katoa ki te mōhio he aha ngā whakaritenga mō te pōhiri, he aha ngā kōrero ka kōrerohia, ā, ko tēhea te waiata pai e hāngai ana ki te whaikōrero me te kaupapa anō hoki. Nā te ako o Ngāi Pākehā i ā tātou tikanga, tō tātou ahurea, ka whakaiti te hemanga i waenganui i a tātou anō, ā, koia tētahi āhuatanga o te whakakaha whanaunga ā-iwi.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge