Viewport width =
July 26, 2015 | by  | in Opinion |
Share on FacebookShare on Google+Pin on PinterestTweet about this on Twitter

He aha taku māramatanga ki taku ao?

Ko te reo te mouri o te mana Māori.

Arā anō te tūāpapa o taku ao, mohoa nei. Nōku e tamariki ana, tē paku aro i a au ki te reo Māori me ōna tikanga. I kuraina kētia au ki tētehi kura auraki kāore i aro pū nei ki te tuakiri o te tauira. Heoi anō, kua tupu ake, kua āhua puāwai ake, kua hinātore ki te ao e ora anō ai tō tātou reo kāmehameha, nei ka ora anō ia ki tōna kounga, ki tōna haumāuiuitanga, ki tōna reka e tika ana.

Kāti, he kaiako au ki te kura kaupapa Māori o Ngā Uri a Māui ki Tūranga i ēnei rā, ā, kua tahuri taku ngākau, taku kaha, taku ao ki te Aho Matua me te reo Māori. I a au e noho nei, e whakaaro ake nei ki tō tātou ahurea, ka taka a roto i te korenga o Ngāi Māori mā i tahuri mai, i ngākau nui mai, i paku aha mai ki tōna reo. Tērā anō ōku huahuatau e kōrorirori mai nei, ka toko ake te whakaaro ki roto i a au,‘ki te kore tō tātou reo, he aha i rerekē ai tātou i tētehi atu, i ētehi atu rānei?’ Nā whai anō taku tūranga mahi e whakakipakipa mai nā i ngā whakatupuranga e haere ake nei, e haere ake nei, kia ahatia? Kia whakamanahia ai ngā mahi i tutuki rā anō i ō tātou tūpuna, kia whakamanahia anō ai te riaka i whakapaua e kui mā, e koro mā, mō te reo te take.

Ko taku ao mārama, ko te ao Māori. Kua ora rawa atu nei au i te reo Māori, ā, kua ora anō au i taku kura, i te Aho Matua. Ao te pō, pō te ao, kei te kōrero Māori au, ko te mutunga kē mai nei o te pai, ko tēnā. Nei ka paku ngana, ka paku whakaaro hoki tātou katoa te iwi Māori ki te reo, ko wai ka mōhio ki ngā taumata e taea ai e ia?

Ahakoa tēnā, e whakamānawa tonu ana au ki te hunga pīkoko e hiakai nei ki te reo. Ki te kore ko koutou, otirā tātou, kua karawhiua kētia te reo i te pari, ki te rua, mate, mate, mate rawa, tē kōrerohia anō!

I te otinga atu, e ora anō ai te reo, kōrerohia! Ehara i te mea me whai pūtea, me whai aha rānei e kōrero ai koe. Ko te mea nui, me kōrero tō reo ahakoa te iti, ahakoa te nui. Mā te kōrero e waia ai koe ki te reo. Mā te kōrero e taunga ai te reo ki tūmatawhānui. Mā te kōrero e pakari ai tō kōrero.

E hoa mā, tēnā nau mai haere mai ki taku ao mārama ki te reo Māori me ōna tikanga. Whakamanahia tō reo mā te whiu o te kupu ki wī, ki wā, ki tua o te rā e whiti ana.

Tū whitia te hopo mairangatia te angitū!

Tihei mouri ora ki te whai ao, ki taku ao mārama!

Nā Rongomai Smith

Kupu Hou:

Kura auraki – mainstream school

Hinātore – glow

Kāmehameha – precious

Kounga- quality

Huahuatau – thoughts

Kōrorirori – stirring

Riaka – effort

Tūmatawhānui – wider community

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. From within the fallout zone
  2. Access Denied
  3. SWAT
  4. Ngāi Tauira
  5. The Party Line
  6. Eight Things I Hate About Call of Duty
  7. Horoscope
  8. Protests against rape culture draw hundreds
  9. Capital C
  10. The Sellout — Paul Beatty

Editor's Pick

Flat out of options — what’s going on with Wellington’s rental madness?

: The words “renting crisis” have been thrown about a fair bit over the last few weeks. But do commentators and politicians get what this actually means for students and other renters struggling to find a place to live?