Viewport width =
raimona
July 26, 2015 | by  | in Features |
Share on FacebookShare on Google+Pin on PinterestTweet about this on Twitter

He māramatanga i tua i te Mātaurauga

Mai anō i taku taunga mai ki Te Upoko o te Ika, ki te Whare Wānanga nei, ko taku whāinga ko tēnei mea te mātauranga.  Ko te mātauranga o te ao Pākeha tēra hei oranga ā-tinana mōku me tōku whānau.  Ko tēnei rākau hei whakarākei, hei kīnaki i taku whatumanawa koia ko te reo Māori me tōna ao.  Tērā te pōhēhē i roto i au, ka kuhu mai au ki tēnei ao, ka whakakīkīa aku kete, katahi au ka hopa tere atu ki ngā raorao o te motu me te piupiu haere i te rakau mātauranga Pākeha nei.  Mā te mātauranga anakē ka hua ko te māramatanga.  Tērā pōhēhē tēra!

He māramatanga anō i tōku ao i ahu mai i ngā peka o te whare wānanga kāore e hāngai pū ana ki te taha mātauranga ā-tohu nei.  Ko ngā tini kaupapa i tua atu i ngā akoranga me ngā whakamātautau.

Ko te tuatahi, kāore i tua atu i te marae o Te Herenga Waka.  Ko ia tērā kua noho hei whakaruruhau, hei tāwharautanga mo ngai tauira Māori i tēnei ao kikokiko.  Nō taku tuatahitanga ki reira, tere tonu te rongo i te mahana me te tau o taku wairua ki tōna poho.  He whare tēnei ko tōna hanga, ko tōna wairua he whakamāmā, he whakatau i te ngākau o te tangata e noho mokemoke ana ki tōna ao Māori.  He mea whakamāhana i te whatumanawa te noho tahi i ōku tīpuna e tū poupou nei i roto i Te Tumu Herenga Waka me te mōhio anō hoki he tūhonohononga ā-whakapapa e here nei au ki te rangatira ka kaha kōrerotia i te marae, arā, a Te Rangiāhuta.  I reira ka rāngona ko te reo, ka kitea ko ngā tikanga e hāpaitia ana, ā, he oranga tinana, he oranga hinengaro, he oranga wairua te hua.

Ko tērā atu o ngā peka ko Ngāi Tauira, ko Ngā Rangahautira anō hoki.  Nō taku taenga mai ki te whare wānanga, he mea whakaohorere te ao hou nei, otirā, i taipakeke katoa mai au i roto i te mātotorutanga o te reo me ōna tikanga.  He uri tēnei o te Kohanga Reo, te Kura Kaupapa Māori, te wharekura hoki.  Wai hoki, ko te reo i rāngona i te kainga ko te reo rangatira.  Tata nei au te toremi i te nui o ngā ngaru o te reo, o te ao Pākeha.  Ka tika, he ao hou tēnei ki au.  He mea whakatū ngā rōpū tauira Māori nei hei hāpai i te hoe a ngā tauira i ngā wai karekare o te whare wānanga. He toka tū moana hei nohonga pāua mōku.  He whirinakitanga mo ngā tauira Māori katoa, ahakoa ihupuku mai, tautōhito mai rānei.  He oranga anō kei roto i ngā mahi whakawhanaunga, whakakorikori i te tinana me te ngākau.  Na ngā rōpū nei i āhei ai ngā mahi pērā i ngā hākinakina, te kapa haka me ngā whakangāhau whakawaiwai i te korokoro.  Mei kore ake rātou, ka totohu kē au ki te hohonutanga o te kore.

Nei au ka noho, ka whakaaro; he aha te māramatanga i tōku ao? He aha te māramatanga? He mea e puta ai koe i te pouriuritanga o te korekore, o te rangirua, o te pōrangi, kia hua ai koe ki te whai ao, ki te ao mārama! I tēnei o ōku ao, te ao whare wānanga, kāore i tua atu i taku marae, i aku rōpū Māori.  Mei kore ko rātou e kore, kore rawa au e puta ki te whai ao, ki te ao mārama e!

Hei whakakapinga kōrero māku, ka tika kia mihi au ki Te Herenga Waka marae, ki Ngai Tauira, ki Ngā Rangahautira anō hoki.  E kore e ea ki ngā kupu te whakatinana i te aroha ki a koutou mai i tēnei tauira Māori, i tae kuare mai ki te ao Pakeha nei.  Kua ora au i a koutou, otirā, na mātou anō, ngā tauira Māori, te whiwhi kua tū mai koutou hei ringa atawhai, hei pou whakawhirinaki, hei whakaruruhau mahana mō matou. Tēnā rawa atu koutou.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Your silent cries left unheard
  2. How it Works: On the Climate Change Response (Zero Carbon) Amendment Bill
  3. Is Vic Books Missing Out on the Living Wage Campaign?
  4. Jesus Christ Super-Nah, Saviour’s New Political Party May Need Miracle
  5. Issue 12 – Friendship
  6. SWAT: Friendship Column
  7. Inevitable Entanglement
  8. HOROSCOPE WEEK OF JUNE 3: FRIENDSHIP
  9. Liquid Knowledge: On Israel and Palestine
  10. An Ode to the Aunties

Editor's Pick

Burnt Honey

: First tutorial of the year. When I open the door, I underestimate my strength, thinking it to be all used up in my journey here. It swings open violently and I trip into the room where awkward gazes greet me. Frozen, my legs are lead and I’m stuck on display for too long. My ov