Viewport width =
jamie
July 26, 2015 | by  | in Features |
Share on FacebookShare on Google+Pin on PinterestTweet about this on Twitter

Mai i te pūmotomoto o Taranaki

Mai i te pūmotomoto o Taranaki,
Tahe atu ngā wai mātao ki Waitara
Rere tonu te wai ki Tangaroa
Hoki anō ki ngā Kāhui Maunga,
Ko te puhi nei, ko Ruapehu
Nā Rangi i mārena ki a Tongariro,
Puta hikuwai, puta wairere
Tere mai rā te ipukarea ko Whangaehu
E pā rā ki ngā wai pāpa o Rangitīkei
i noho ai te kaitangata, Tūtaeporoporo e.

 

Ahakoa te aha, he haerenga tōu oranga. He tira tōu. Koia tōu whānau, ōu hoa me ngā tāngata katoa e pā ana i a koe.  Tērā pea kāore koe e haere ki wāhi kē. Hei aha, he haerenga tonu tōu oranga. He haerenga ngā wheako, ngā kare-a-roto, ngā awhero, ngā tūmanako, te mea, te mea, hei whakatupu i a koe, hei whakapakeke. Heoi, ko te āhuatanga o tāu haerenga nui, mā tēnei haerenga e mārama ai tōu ao. Ahakoa kāore anō tāku haerenga kia mutu (ko te tūmanako, he maha ngā tau e toe tonu mai ana!), ka mārama haere tōku ake ao. Ehara i te mea kotahi noa iho tāu mahi, ā, ka mutu tāu haerenga, kua mārama ngā mea katoa. Kao. He tukanga tēnei, he tukanga rere tonu mō āke, ake ake. Anei tētehi o tāku turuki i whakamārama i tōku ao.

Ko tāku turuki hei kōrerotanga i te korero nei, ko tōku hōkakatanga me te whanaketanga o te mea nei.

Mai i tōku tamarikitanga tae rā anō ki te tīmatanga o tōku pakeketanga, he mea huna tōku hōkakatanga e au. Ka kī mai te marea, “kia kaua e whakamā ki taua āhuatanga! Me whakahīhī!,” i a rātou e whakaparahako ana i ngā mea e hāngai ana ki ngā hōkakatanga kē atu. He wahine me he tāne e kihi ana ki runga i te tīwī? Pai tēnā. Te tāne me te tāne? Te wahine me te wahine? Ko te manawarau tā rātou tauhohe.

I te wā i tīmata ai ōku hoa ki te rapu whaiāipo, i noho tonu au ki te kāinga. Kāore au i tae atu ki ngā kiriata ki te taha o tētehi tāne i ratatia e au. Te whāwhā ringa? Kao. Kihi? Kao. I ngaro ētehi wheako e kore au e whiwhi. I aua wā i whanake haere ai ngā wheako o ōku hoa, i ngaro aua wheako i a au. Ehara i te mea koinei te mea kino ake, engari, ki au, he matapōrehu tonu. Kei a rātou te āheinga ki te whakapuaki i ō rātou kare-a-roto, ō rātou awhero, me ō rātou wawata. He pungarehu tāku i taua wā.  He pungarehu tā te nuinga o ngā tāngata whai hōkaka kē atu. Kāore tēnei porihanga i te taupuhi. Hei aha. Me mātua whakaaro mōku!

He uaua te whākinga atu i tōū ake hōkakatanga ki ētehi atu tangata. Whakaarohia tēnei: me whāki tōū hōkakatanga ki te kore koe e takatāpui? Māmā noa iho te whakautu, nē? Kao. E kore koe e whāki atu i tēnei mēnā kāore koe i te takatāpui. Heoi anō, ko tāku whākinga, he mea hātakēhi ki au.

Marama tonu ana tōku maumaharatanga o te whāki ki ōku mātua. I te wā i whakapuakina ai tōku hōkakatanga ki ōku nei mātua, ehara au i te tangata tuatahi ki te kōrero mō taua kaupapa. Ko tōku whaea kē. I tunu māua i te kai o te pō, ā, ka horoi au i te raihi hei kīnaki mō te heihei namunamuā. Me mātua mōhio koutou, he whakapōrearea rawa atu taua mahi. I ūmere au ki te raihi, “Ngotea te ure!” Ko tōku whaea i kī mai: “Aw, bub, me tāne kē, nē?” I taka te kauae ki te papa. Kāore anō au kia whāki atu ki a ia. Ae, he āhua tīahoaho au engari, i tāku rongo i ngā kupu rā, ohorere katoa au. Kāore he raru ki a ia. Kāore he raru ki tōku matua. Whai muri i te hapa, i haere mātou ki te pāpara kauta inu waipiro ai. Ehara i te mea he mātua whakahīhī rāua. Kao. Ko te mea nui, ki ō rāua tirohanga, he mea māori te takatāpuitanga, kāore i te rerekē. Haere tonu te ao, ahakoa tāu whaiāipo.

Kia kaua au e whakaingoingo enagri ko te mea whakamutunga o te turuki nei, ko tōku hoa rangatira. Ko Robert tōna ingoa. Ko te tūmanako, ka tūtaki koe i a ia. He tangata pai. Hei aha tērā! Koinei tōku kōrero, ehara i tōna. Nā,  kāore e kore, nāna au i akiaki kia tū takatāpui, kia tū Taranaki, kia tū Whanganui i te wā kōtahi. Kia aumangea, kia tū whakahīhī. Koinei ōna tāhuhu korero. Waihoki, koinei ōku kupu whakamutunga mōu. Hei aha ngā kai hamuti i tōu ao. Kia tū te māpere ki a rātou. Kua pūrangiaho tētehi āhuatanga o tōku ao. Ka haere tonu te haerenga. Pai tērā. Hei tohu kei te ora tonu koe.

Kupu:

Hōkakatanga – sexuality
Turuki – stage (of a journey)
Whakaingoingo – romantic

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge