Viewport width =
July 26, 2015 | by  | in Opinion |
Share on FacebookShare on Google+Pin on PinterestTweet about this on Twitter

Nau mai ki tōku ao!

Ko te māramatanga o tōku nei ao, ko taku Māoritanga! Ko ngā waehanga matua o tōku nei ao, ko tōku tūrangawaewae, arā te tūāpapa, ko tōku whānau ngā mahurangi, ā, ko te reo Māori te hau takiwā. Nāu mai ki tōku ao!

Ko Whāngārā te pūtahitanga o te tangata, te pārekereke o te kōrero. I tipu ake au i ngā tapātai o te Tairāwhiti, ki Whāngārā, ki Māngātuna hoki. Ki reira au ako i ngā taonga o peperekōu mā, i rongo, i kite, i whakatinanahia e au te reo Māori me ngā tikanga Māori. Nā te kāinga au i whakaako kia hua ake te kōrero “kia horoia tāku porokaki ki ngā wai o tōku ake whenua!” Nā runga i te mōhio ko wai ahau, ā, i ahu mai au i hea, kua puawai te koingo o te aroha mō tōku tūrangawaewae. He tūhononga e kore e taea te karo, nā konā kua mauri tau i te kāinga, ā, koinei taku tūāpapa. He whānau ako ki te kāinga, tū ana ki te marae tau ana!

E kore e mimiti taku puna aroha mō tōku whānau.  Ko tōku whānau, tōku oranga. Kia tū au ki te kōrero, ko taku iwi kei muri! Ko ōku kāhui whakapapa, e rangitamiro ana i a au ki aku iwi, ki aku hapū me tōku whānau koinei te orangatonutanga o tōku nei ao. Koinei ngā hononga ki tōku tūrangawaewae, ki te iho matua mai i ōku tīpuna, ki tōku kōkā heke mai ki a au, kei te rere te toto kotahi. Nā reira ka ora tātou i a rātou, ka ora rātou i a tātou! Ahakoa kite mai i tōku kotahi, ko taku rahi kei muri. Āta whakaarohia mō te tū a te kahikatea i roto i te repo. Ka toro atu i ōnā pakiaka ka pupuri i tōna kāhui rākau, mā rātou e toko i tana tū. He pērā ano hoki mōku. Ka toro aku pakiaka ki ōku kāhui whakapapa kia toko i tōku tū i tēnei ao, ahakoa kāore i kite i aku pakiaka kei konei kei tōku ngākau.  Ka totoka te tū i runga i te mōhio, ko te angitu o te kotahi nō te katoa.

Whaia te iti kahurangi ki te tūohu koe ko Pukehapopo, ko Pakaurangi ngā maunga teitei! Nā tōku whānau i whakahauhau, i whakatenatena i a au kia tiakarohia te marama, kia rukuhia te ruku o matauaua i te ao mātauranga. I runga i te aronga, kia kaua e mahue ngā whiringa katoa o tēnei ao.  Āritarita ana taku waha ki te kai a te rangatira, arā te reo Māori! Nā ngā whakaakoranga o te kāinga i pērā ai, nā te reo me ngā tikanga Māori i whakahaumaru, i para hoki i te huarahi ki te ao Māori. Nōku te whiwhi i kaha tautoko tōku whānau i tēnei o ngā āhuatanga nā taua ringa tautoko i ngingiha te aroha o te reo mōku. Me kī kua titia rawatia te reo Māori ki taku whatumanawa mō ake tonu atu.

Ahakoa ngā tini āhutanga o tēnei ao mōhio pū ahau nā tōku Māoritanga au e ora ai. Pō atu, pō mai kei konei taku whānau hei pou whirinaki māku, koia i whakatau ko rātou te huia kaimanawa o tōku ao. Ā, ko te Tairawhiti tōku tūrangahakoa!

Kupu Hou:

Pārekereke – to be close together

Koingo – desire

Kahikatea – A tall tree

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. From within the fallout zone
  2. Access Denied
  3. SWAT
  4. Ngāi Tauira
  5. The Party Line
  6. Eight Things I Hate About Call of Duty
  7. Horoscope
  8. Protests against rape culture draw hundreds
  9. Capital C
  10. The Sellout — Paul Beatty

Editor's Pick

Flat out of options — what’s going on with Wellington’s rental madness?

: The words “renting crisis” have been thrown about a fair bit over the last few weeks. But do commentators and politicians get what this actually means for students and other renters struggling to find a place to live?