Viewport width =
australia
July 26, 2015 | by  | in Features |
Share on FacebookShare on Google+Pin on PinterestTweet about this on Twitter

Ngāti Kangarū

Nō te Hune 2015, ka whakawhiti atu mātou ko tōku whānau ki Ahitereia.  Ko te toro atu ki ōku whanaunga te take matua me te hararei anō hoki.  Nā te ngaukino o te hotoke i Pōneke, he waimārie nō mātou te whakaputa atu ki te Takutai Kōura (ara ko te GC).  Te taenga atu ki Piripane ka rongo i te mahana, ā ka painaina te kiri i te hī a Tamanui me te pā ngawari mai o te hau angiangi e whakangaro ana te kinikini o te mātao.  Ka taraiwa ki te Takutai Koura, ruia ana ngā toimahatanga o te kāinga pēnā i ō mātou kōti nui kia hora ai ki tātahi.  Koia ka tau te mauri o te turuhi Māori nei.

Tūturu, he wāhi hihiri anō hoki te Takutai Kōura mō te tangata.  Tū atu i te pai o te huarere me te ātaahua o te taiao, kei reira ngā paaka whakangahau, whakatakahurihuri tangata, arā ko Te Ao Moemoea, Te Ao Wai Hukapapa, ko Te Ao Moana me Te Ao Kiriata, kātahi rā ngā ao whakaihiihi ko ērā mō te whānau!  Hei te pō, ka tūwhera ngā tatau o ngā karapū e paopao ana i ā ratou waiata me ngā taringa o ngā taiohi e uru atu ana.

Nā whai anō e muia nei te tini o ngā Māori ki tēnei whenua angitū.  Kāore pea he hekenga nui ake tō te iwi Māori i te whakawhitinga mai i Aotearoa ki te whenua e kīia nei Te Pāpaka a-Māui, te Whenua Moemoea!  Koia te kī, tātai whetu ki te rangi ko te ira Māori ki te Takutai Koura, e tōnui ana e pakari ana a Ngāti Kangarū!

Ki tā te kōrero he iwi Māori tonu tēnei a Ngāti Kangarū, koia ka whakahuatia ana te kupu Mozzie hei tohu i te moe tahi a te Māori me te Aussie.  Nā, koia te whakaaro i tō mātou taenga atu, ka kite i ngā mea Mozzie ka hiki ōku tukemata, me te mea nei, ‘kia ora e hoa’, engari tonu tē aro mai!  Hā!  He aha hoki tēnei tikanga?  Tēnā ka hurihuri ōku whakaaro, he whakapehapeha he whakamā rānei pea ngā Mossie ki tōna taha Māori, he kūware rānei, kāore rātou e mōhio ki ngā momo whakamihi i Aotearoa nei?  Taku pōhēhē rānei he Māori te āhua engari, nō iwi kē anō?

Nā ka tuku ēnei pātai ki tō mātou hoa a Tū e noho roa ana, e mahi tāmoko ana ki kō.  He tangata mōhio pū ia ki ngā tikanga Mozzie o taua wāhi.  Ki tāna, e toru pea ngā hapū nui o Ngāti Kangarū, ko te tuakana e whai pakiaka ana ki taua whenua e whakatangata ana i āna tamariki mokopuna ki reira, ko te teina ko te whakatupuranga hou, nāna i whānau mai i Aotearoa e ruarua ngā tau e noho ana ki reira engari kei reira ōna manako.  Ko te pōtiki piripoho ko ngā mea e noho manene ana ki taua wāhi, ahakoa te roanga o te noho, ko te tinana ki Ahitereiria ko te manawa ki te kāinga.  Ina e mihi tukemata ana te Māori ki te tuakana, e whakaaro pēnei nei “Pūrari Māori Mata!” arā, he FOB kē te Māori ki a ia i tērā whenua.  Kei te teina ka mōhio ki ngā āhuatanga o te kāinga engari ka aro kē ki ngā tikanga o tōna kāinga rua.  Ko te pōtiki ia he hikinga tukemata, he toronga ringa.  Ki a au nei ko te potiki e pūmau ana i te Kōura o taua Takutai.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Raw Collective, Jinz Moss, and Makeshift Movements
  2. Podcast: Interview with Get Your Hands Off My Dogcast
  3. Editors’ Letter
  4. Euthanasia Case Before the Courts
  5. We Can’t Take It for Granted: Academic Freedom in Hungary
  6. Free West Papua
  7. Pressured Lecturers, Cheating Students
  8. National Sexual Health Helpline Underway
  9. Tinder Surprise
  10. Populist Reaction Unlikely

Editor's Pick

Coffee Thoughts

: - SPONSORED - According to the NZ History website, “Wellington’s café culture is today an integral part of its identity as a city.” It’s true, everyone in this city seems to love coffee and we have an ample amount of cafes to keep the love brewing. I have been aware of t