Viewport width =
anthony
July 26, 2015 | by  | in Features |
Share on FacebookShare on Google+Pin on PinterestTweet about this on Twitter

Pea Mā

Kō hea rā, ko hea rā, kō hea rā taku huarahi hei whainga? Ko te kete mātauranga? Ko te kete aronui? Ko te kete mō aku hū rānei? Ko ēnei ngā pātai i pātaihia e au ki a au anō i te mutunga o taku akoranga i te kura tuarua. Titiro kau ana ki ngā hau āwhiowhio o Tāwhirimatea, neke ki te taha mauī, nuku ki te taha matau, ko mātou tērā e hūnuku ana i te mata o te whenua. Tēnā karanga mai rā e te whenua Karauna,

Ka tangi ngā tēkehi, ka haruru ngā pahi, ka paopao te karaka rangatira ko Pene-nui. Ko te iwa o ngā rā o Maramatahi tērā. Ko tōku wā tuatahi ki te whenua nei, nā rātou i whanako ngā whenua Māori, ā ko Ingarangi te ingoa.

Ko te take i haere au ki reira ko te tū hei kaiako i te kura o Aysgarth. He kura tērā mō ngā tama anake, pērā i tōku kura o Hato Pāora – Whaia te tika. Ahakoa he kura mō ngā tama anake he kura tuatahi hoki. E kore au e wareware i tōku rā tuatahi nā te mea he rā tino makariri. He kura toa a Aysgarth i roto i te ao whutūporo ki Ingarangi. Kotahi rau tekau mā toru ngā tama e kuraina ana ki taua kura.

Ka hoki aku mahara ki taku wiki tuatahi i reira. Kua kī katoa tōku hirikapo i ngā maumaharatanga o taua wā. Ko tētahi o ērā ko te wā uiui mō ngā mātua me ngā kaiako.  I kī mai tōku kaiwhakahaere ki a au, “E tama, me haere koe ki te tiki i ngā pēke o te matua rā, te pāpā o tētahi o ngā tama’. I taua wā kāore au i te tino mōhio ki te tino matū o te mahi hari pēke. Engari ka tatari au ki waho i te kura, i te tūnga waka mō te pāpā rā. Rua tekau miniti au e tatari ana ki a ia engāri kāore kau he waka i tae mai. Ka hoki au ki taku tari kātahi ka rongo au ki te tangi o tētahi waka topatopa. Kāore au i te mōhio te take o te waka topatopa engari i kī mai tōku kaiwhakahaere, “E tama, haere ki te papa tākaro”. Ka heke iho te waka topatopa. Ko te tangata i heke ko Matua Hanson, te poumatua o Gucci.  He mirionaea ia. I tērā wā tonu ka whai māramatanga au, he kura whai rawa tēnei.

I ia wīkeni, ka haere ngā kaiako o te kura ki te pāparakāuta. I tētahi pō ka haere mātou ki te pāparakauta ko te Pea Mā (ara ko te “White Bear”).  Nā te matua o tētahi o ngā tama te pāparakāuta rā. Ka tirohia e au ngā pikitia i te pakitara o ngā tūmomo kēmu ka tākarohia  ki te pāparakāuta nei. Ka kite au i te hākinakina tauronarona (tug of war) i roto i ia pikitia. Kātahi ka pātai atu au ki te ūpoko o te pāpara – “he aha te tikanga o ngā pikitia?”  Ko tāna whakautu, “I ia tau, i ia tau ka haramai ngā tāngata haurangi o tērā pāpara, o tērā pāpara mō te whakataetae tauronarona. Kei te pīrangi koe ki te tū hei tumu hei kaitātaki mō te pāparakāuta Pea Mā?” Taku waimarie i taua tono nā te mea e torutoru noa iho ngā tāngata e whai wāhi ki taua tima, ā, tokomaha ngā tāngata e pīrangi ana ki te uru. Tino harawene ētahi o ngā tāngata i te hau kāinga nā te mea kua roa rātou e tatari ana ki te eke. Kāore he aha ki ahau nā te mea nā ō rātou tīpuna ōku whenua i tāhae.

Ka taka te wā, ka tū te whakataetae. Ka tae mai te katoa o te tāone ki te mātakitaki i te whakataetae nei.  E ono rau pea ngā tāngata i tatū mai. Ka tae te wā ka eke mātou te rōpū Pea Mā ki te papa, ka ūmere te katoa o ngā tāngata, ā, karanga ana rātou “White Bear! White Bear!”  I ngā tau o mua, kīhai rātou i toa i te whakataetae nā tō rātou haurangi. I te rauna tuatahi ka toa mātou. I te rauna tuarua nā mātou anō i toa. Ka eke ki te whiringa whakamutunga, ki kōnei ka tohua ko wai ka toa hei tino pāpara. Hīkaka ana tōku rōpū, koia nei te wā tuatahi kua piki mātou ki tēnei taumata. Ko Te Taniwha Kākāriki (e kiia nei ko te ‘Green Dragon’) tā mātou tino hoariri. I ia tau, ko rātou te mea e whakaihuwaka.

Ahakoa te nunui, te rarahi o ngā tāne o ‘Te Taniwha Kākāriki’ kei a mātou ngā pūkenga me te hinengaro o Māui-pōtiki. I te whakapau werawera te rōpū, kātahi ka hakaina tōku rōpū, kī ana te Pākehā “Ana…HĪ…Anā…HĪ!” Tau mai ana te kaha o Tūmatauenga ki a mātou, ā, ka tangatanga te mau o te hoariri. Tutū ana te puehu ka taki atu au “Kia kaha…ANĀ…HĪ!” Ānana! Whati ana te hoariri, ka eke pānuku mātou! Ka ūmere te katoa o ngā tāngata me te hāparangi anō “White Bear! White Bear!”  Ka hīkoi te katoa ki te pāparakāuta o Pea Mā mō te pō whakangāhau. Kāore mātou o te tima tauronarona Pea Mā i utu mō ngā inu waipiro, i tukua kētia mai hei koha.

Ahakoa kāore au i te paku maumahara ki taua pō, ka mōhio pū au he tino pai. Ko te mea tino nui ki au, i te pāparakāuta Pea Mā, ka iri te pikitia o tō mātou rōpū toa i te pakitara.  Āpiti atu anō hoki, i te mea ko mātou ngā toa o taua tau, ka whakairi tā mātou pikitia ki ngā pakitara o ngā pāparakāuta katoa i taua tāone i Ingarangi.

Koinei tētahi paku wāhanga o tōku haeranga ki Ingarangi. Kei te Whare Wānanga o Wikitōria au ināianei e whai mātauranga ana. I te pōhēhē te nuingā o ngā tāngata, he tama pōhara au nā taku kore mau hū. Engari i mahue kē i au aku hū ki Hingapoa (Singapore) – heoi, he pakiwaitara anō tērā.

Kupu Hou:

Harawene – Jelous

Whakaihuwaka – succeed, champions

Tangatanga – loosen

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge