Viewport width =
July 26, 2015 | by  | in Opinion |
Share on FacebookShare on Google+Pin on PinterestTweet about this on Twitter

Te Herenga Waka Marae

Ko Te Herenga Waka tō tātou marae i te whare wānanga nei. He whare wānanga i ngā kaupapa katoa o te ao e noho nei tātou, he tāhūhū kōrero anō mō ngā kōrero o nehe. E kīia ana ma ngā tauira e kuhu atu ana ki tōna poho e whakaara ake ōna pou, kei reira anō te hunga e kōrerotia nei hei toko ake i tōna tāhūhū tau ake nei, tau ake nei. Anei e whai ake nei ngā kōrero mō tēnei hunga e mōhiotia ai ko wai a wai.

Whaea Te Ripowai Higgins (Tūhoe)

Kātahi anō ka whakanuia te tau rua tekau mā rima o Whaea Te Ripowai i tēnei whare wānanga. Ko ia te taurima o tō tātou marae, kua iwa tau e noho ana i tēnei o ngā tūranga. I mua atu i tēnei, ko ia te tumuaki o Te Kawa a Māui. Arā atu anō ōna pūkenga: he J.P. ia, he pūkenga reo, he pūkenga tikanga, he wānanga reo, ko ia tētahi i te whakaaratanga ake o te kaupapa o Te Ataarangi, i te taha o Ngoi mā, o Te Heikōkō mā. Ināianei, ko tāna mahi he tiaki i tō tātou marae e mau ai ngā tikanga Māori, e Māori anō ai te noho a ngā ākonga Māori e noho ana i te whare wānanga. Nā reira, kia kaha te kōrero Māori ki a ia! Me he pātai kei a koe mō te reo Māori, mō ngā tikanga Māori, mō te marae rānei, ko ia tonu te tohunga rawa o aua kaupapa katoa me patapatai e koe. Ā, mēnā e pīrangi ana koe ki te whakatū hui ki te marae, hoake ki a ia!

Kathy (Gran) Samuel (Raukawa)

Ko Kathy te Kaiārahi Matua o te marae, ā, ko tana tino mahi he tiaki manuhiri, he tiaki tauira, he whakahaere i ngā mahi a te marae. Ko Grandma, ko Gran rānei ōna ingoa kārangaranga, he mea tapa ki ēnei ingoa e tētahi tauira o mua (kāore au e whāki atu ko wai te tauira nāna te ingoa, mā koutou anō e rapu, e kimi!). I te nuinga o te wā kei te whare kai o Ngā Mokopuna a Gran e tiaki ana i ngā mahi a Tahu, he tohunga tēnei ki te taka kai. He pou tikanga anō tēnei, kua matomato te tipu mai i te ao Māori. I tua atu, ko ia te kaiwhakahaere i ngā Whare Whānau o te whare wānanga nei. Me he pātai āu mō te whakahaere hui, mō te whakatū pōhiri, mō ngā tikanga Māori, mō ngā Whare Whānau rānei, hoatu ki a ia!

Monoa Taepa (Te Arawa, Te Āti Awa, Ngāti Whātua, Te Rarawa)

Ko Moana te Mata Ahupae o te marae. Ko ia tētahi e āwhina ana i te taurima ki te whakahaere i ngā hui o te marae kia pūtahi te haere – e kore te paku aha e mahue atu i ngā whatu hōmiromiro nei! I ētahi wā kua tutū te puehu i te tini o ngā tāngata, kua ture kore, kei wīwī, kei wāwā ngā whakaaro o te hunga i tae atu – ko te reo o Monoa te reo whakatau i te katoa e tau ai te mauri o te hui. He kōrero Māori anō a Monoa, kōrero Māori atu ki a ia! He pononga tēnei o te kaupapa o Te Ataarangi – he ngākau māhaki te āhua. Nā reira, kaua e mataku ki te kōrero Māori ki tēnei wahine marae!

Pei Tamiana (Tūhoe)

Ko Pei tētahi o ngā kaiārahi o te marae. Ko ia tērā e whakapau kaha ana kia hāneanea te noho a te tangata e kuhu atu ana ki te marae – tauira mai, manuhiri mai rānei. Kia kuhu atu ana koe me te kite i te whare kua mā katoa, kua mahana, kua whakaritea te rorohiko mō te karaehe, nā ngā kaiārahi tērā! Ki te kai takakau koe i te marae, waimārie katoa koe ki te kai takakau nāna i tunu. Koia kei a ia mō tērā o ngā pūkenga! He ngākau hūmārie tēnei tangata, ā, he kōrero Māori anō hoki. Ki te hiahia whakaharatau koe i tō reo Māori, kāore i tua atu i a Pei!

Jamee Maaka (Kahungunu ki Wairoa/Rarotonga)

Ko Jamee anō tētahi o ngā kaiārahi o te marae nei. Ko ia anō tērā e whakapau ana i ōna kaha mō ngā tauira me ngā manuhiri mā te whakapaipai i te whare, i te mahau, i te aha rānei e hāneanea ai te noho a te katoa. Ko te pai o Jamee he tangata whakakata i te tangata – ahakoa ko wai, kei a ia ngā kupu ngāwari e koa ai te ngākau. Ko Jamee anō te kaiwhakaora i ngā taputapu pakaru o te marae – e kore rawa e porowhiua te paku aha mēnā kāore anō a Jamee kia kī mai “āe, kua hemo tonu atu.” Koirā te āhua, te koi o tōna hinengaro – kia puta mai te raruraru ka tere kimihia te ara whakatika. He kōrero Māori anō a Jamee, nā reira me kōrero Māori ki a ia hei whakapakari i ō pūkenga kōrero!

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge