Viewport width =
te aka
July 26, 2015 | by  | in Features |
Share on FacebookShare on Google+Pin on PinterestTweet about this on Twitter

Te kunenga mai i waiteika

Te kunenga mai i waiteika
Koi te tōhua, koi te ewe, koi te ika
Ka tangatatia ka puta ki waho
Ki te whai ao, ki te ao mārama
Tihē te mouri ora

I karangahia rā au ki te hora iho i ōku whakaaro mō te kaupapa e kīia nei ‘He aha te māramatanga i tō ao’. Ka noho au ka whakaaro ki te kaupapa, ā, ka hiwa ake i a au te kōrero whakaupoko o tua ake nei. Ko te matua māramatanga tēnā o tātou te tangata. Nā runga i tēnā kei te mihia taku whaene nāna au i whāngai, nāna au i tiaki i roto i tōna kōpū, otirā i waho hoki, i taku putanga mai ki te ao mārama. Me mihi hoki i taku matua nāna au i whakatupu, i roperope kia tangata mai ai au i tēnei ao. Otirā, ka huri aku whakaaro ki te pā harakeke, ki taku whānau, ki aku whanaunga, ki aku kārangarangatanga maha, tae atu ki ōku hoa. I tupu tahi mātou, i kapakapa tahi, i hāereere tahi, i aha tahi. Kia kore koutou katoa, kua kore au.

Kāti rā, ko tōku ao e noho nei au kua kaha karamuia ki ngā āhuatanga o te ao Māori. Nō tōku nohinohitanga i haere au ki te Kōhanga Reo, ki te Kura Kaupapa Māori hoki, ki reira rangona ai, kōrerotia ai hoki te reo Māori, otirā ki reira whakahaerengia ai ngā āhuatanga Māori pēnei i te kapa haka me te pōwhiri. I aua wā tonu e kaha ana taku whānau ki te haere ki ngā kaupapa Māori, ki ngā hui o te marae, ki ngā hui kapa haka, ki aua momo āhuatanga katoa. Koia aku tino maharatanga mō tōku nohinohitanga, ko te rangona o te reo Māori e iere ana i te takiwā, ko te kitea o ngā mahi Māori e whakahaerengia ana i tēnā wāhi, i tēnā wāhi. Kāore au i tino mōhio ki tētehi ao i tua atu kia puta rā anō au i te Kura Kaupapa. Nō reira, nā aua āhuatanga i whakatōkia mai ai ki roto i a au, i waia ai au ki te ao Māori, koia tēnā e noho ana hei māramatanga mōku ki tōku ao, tatū iho mai ki ēnei rangi nei.

I runga i tēnā, ka whakaaro ake au ki te kōrero ‘Ko te reo te hā, te mouri o te Māoritanga’ me te tika hoki o taua kōrero ki a au. Ko tōku reo Māori te kaikawe i tōku Māoritanga. Ehara i te mea ki te kore he reo i a au kua kore ōku Māoritanga, engari nā tōku mōhio ki te whakahaere i te reo Māori kua whai māramatanga ake tōku Māoritanga, he māramatanga e kore e taea nē i kāore kau he reo. Ko te reo Māori e hāpai ake ana i tōku tuakiritanga e kiia ai au he Māori, e kiia ai au he tangata.

Nā, koia nei te māramatanga i tōku ao. Kāore i tua atu i tōku pā harakeke, nā reira i puta mai ai au ki te ao, nā reira i whai māramatanga ai. Ka mutu, ko te ao Māori tērā e kākahu nei i ōku whakaaro e kite ai au i te māramatanga. Otirā, ko te reo Māori tērā e hāpai ake ana i tōku tuakiritanga e mārama ai ko wai au i roto i tēnei ao. Heoi anō rā, me mutu aku pahupahu i kōnei kei kiia au he kūmara. Nō reira tēnā koe i whai wāhi mai ki tēnei iti nāku. Kāti rā.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. A Tribe Called Queer
  2. Medical Anomalies: Trans and Intersex vs. Medicine
  3. chris††† — social justice whatever
  4. Issue 14
  5. We Need New Words
  6. Things to see places to be
  7. Shock Over Proposed Job Cuts at University of Otago
  8. Te Ara Tauira
  9. GENDER: THE DEATH AND REBIRTH
  10. The Party Line
lets-seeeee

Editor's Pick

Let’s See How Far We’ve Come

: - SPONSORED - As Dani and I thought about what we’d like to see in this queer edition of Salient, we reflected on the state of UniQ as it stands right now, both at Victoria University and throughout the country. As we come to the end of our time as co-presidents for 2017 we con