Viewport width =
July 26, 2015 | by  | in Opinion |
Share on FacebookShare on Google+Pin on PinterestTweet about this on Twitter

Te Kura Reo ki te Ūpoko o te Ika

“Ko tōku reo tōku ohooho, ko tōku reo tōku māpihi mourea, ko tōku reo tōku whakakai mārihi, ko tōku reo tōku waka kawe, ko tōku reo ko au, ko au ko tōku reo”

Nō te 29 o Pīpirī karapinepine ai ētahi o ngā ngākau nui o te reo Māori ki Te Herenga Waka Marae. Ko te kaupapa, ko te reo. Nāna anō te karanga, nāna anō te tono, nāna anō mātou i whakakotahi ai ki te pātaka iringa kupu, iringa kōrero.

Tūāpapa

Ko te Kura Reo Māori he kaupapa e aro hāngai ana ki te tangata whenuatanga o te reo ki roto anō i te tangata. Ka whakaritea he mātanga reo hei whakaako i ētahi kaupapa e pā ana ki te reo me ōna tikanga, ka rua, ka whakarōpuhia ngā tāngata ki tā tō rātou reanga kōrero, ka toru, he hanga pokapū te āhua ako nō reira ka whakawhiti ia rōpu ki ia kaupapa ako tae noa te wā ka mutu ia kaupapa i a rātou. Engari, atu i ngā kaupapa me ngā pūkenga reo, ko te tino painga o te Kura Reo ko te noho rūmaki a te tangata ki roto katoa i te reo Māori ao noa, pō noa. Mā reira e noho tangata whenua te reo ki roto i a ia.

Ko ēnei Kura Reo he mea akiaki nā Te Taura Whiri i te reo Māori, ā, ka whakatūria puta noa i te motu. Ko tā rātou tino aronga ko te reo kia tika, ko te reo kia rere, ko te reo kia Māori. Nā runga i tēnei whakaaro, ka pupū ake te hiahia ki roto i a mātou te hāpori reo Māori o Wikitōria (Te Herenga Waka, Toihuarewa, Te Kawa a Maui, Ngāi Tauira) ki te whakatū i te Kura Reo tuatahi o Wikitōria.

Poutokomanawa

Me he wai karekare, i uaua te taha whakahaere mō te Kura Reo nei i te mōhio, he ruarua noa iho pea ngā ākonga, me ngā kaiako e noho tonu ana ki Pōneke i te wā o ngā hararei. Heoi anō, i te ururoa o ngā kaiwhakahaere, ka ū tonu, nā wai rā ka tū te Kura Reo tuatahi ki te Ūpoko o te Ika.

Ko ngā mātanga reo, ko Te Ripowai Higgins. Nāna te iere nuku me te iere rangi o moenga kura, o te karanga i kauhau. Ko Aunty Noti, nāna te hōhonutanga o te ao wairua i ruku ki ngā aho o te ao kiko, e hono ai ngā tikanga onamata ki ēra mohoa nei. Ko ngā tūkanga wete reo e tika ai ōna paiaka he mea whakaako nā Kārena Kelly. Ko te whānuitanga o ngā kupu ruarua o te whakataukī me te whakatauākī he mea whakaako nā te pāpā a Piri Sciascia, ā, ko ngā paetara whakairo kupu o te whaikōrero he mea tārai e te toki arero a Tu Temara, Kāti ko te whakatinanatanga o ngā puna whakaaro, me ngā kare-a-roto, arā te tito waiata he mea toha nā Kereama Wright, ā, ko ngā maramara kōrero e tuitui ai  ngā whakaaro o te ao e noho nei tātou, arā ko ngā kī waha he mea whakaako nā Petera Hakiwai.

Tāhūhū

I tīmata te hui i te ahiahi o te Mane te 29 o Pīpīrī, ā, ka mutu wawe i te ata o te Taite te 2 o Hōngongoi. I eke ngā akoranga katoa, me te mea, tōnā 30 ngā ākonga i whai māramatanga i ngā mahi. He uaua ka tohu i tētahi āhuatanga nō roto i te huhua i tino eke, engari ko tētahi e pūkana mai ana ko te pō tautohetohe i tū i taua Wenerei. Ko ngā kaupapa he mea hanga nā ngā kaiwhakahaere. Nā Ahorangi Rāwinia Higgins ngā tautohetohe i whakawā. Ko te take ka whakanuia te pō rā, i te mea i kite i ngā pūkenga o ngā ākonga ki te whiri i ngā kaupapa katoa i akona e rātou i taua wiki, ka mutu, i eke katoa.

E kī ana te kōrero, “nā ngā mahi o muri, ka pai ai a mua”. Nā te pai o te Kura Reo nei, kua kite mātou i ngā painga o roto i ēnei tūmomo kaupapa, nā whai anō ka tipu te hiahia kia whakahaere kaupapa pēnei e tangata-whenua ai i tō tātou reo ki Wikitōria, ā, ki te ao whānui hoki. Nā reira mātou e kapo ake ana i ēnei taonga kia whiua ki te ao, whiua ki te rangi, whiua ki ngā iwi katoa.

Hei kapinga kōrero, e tika ana kia whakanuia ērā i whakapau kaha ki te whakatū i tēnei kaupapa o tātou. Arā ngā mihi ki ngā pūkenga, me ngā ākonga i tae a tinana mai, ēngari me mihi hoki ki te whānau o Te Herenga Waka, nā rātou mātou i manaaki, i atawhai, hei āpititanga ko te pūtea tautoko nā te tari o Piri hoki. Tērā te kōrero, “ko te amorangi ki mua, ko te hāpai-ō ki muri”.

E kore a mihi e mū mō koutou mā ngā papa whakawhiti wai o te kaupapa nei, me he waka haurua, ko koutou mā ngā kaikawe o ēnei taonga, me tēnei onge kāmehameha a tātou.

Kupu Hou

Karapinepine – assemble, to gather together

Onge – treasure

Paiaka – root of a tree

Pokapū – centre spot

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge