Viewport width =
July 10, 2016 | by  | in Opinion |
Share on FacebookShare on Google+Pin on PinterestTweet about this on Twitter

Ākina te reo…i te ao ture

Inā anō te nui o ngā kōrero mo te pakanga nui kia ora to tātou reo mai i ngā tau 1970 ki ēnei rā.  Māku e kī atu, kua puta te ihu o te iwi Māori, ā, e kore te reo e takoto ki te moenga o mate.  Heoi anō, kāore anō te pakanga nui kia mutu, kei te māuiui tonu a ia i roto i ētahi horopaki.  Me whawhaia tonutia te whawhai o te ururoa kia whanake te reo, kia māori ai te noho o tō tātou reo i ngā kokona katoa o tēnei ao hurihuri.  Ko te horopaki ka kōrerohia e au ko te ao ture, arā, mai i ngā ture o te Pāremata ki te reo ka rāngona i ngā kōti.  Ko tāku whakatau, ākina te reo i te ao ture.

He maha anō ngā kōrero, ngā tatauranga e kīia ana ko Māori te hunga ka kaha kitea i ngā herenga o te Kōti.  Ko te tino wawata ka mutu tēnei tūāhuatanga mā ngā rautaki hāpai hāpori, hāpai i ngā rangatahi Māori kua tūkinotia i o rātou taipakeketanga.  Heoi anō, he hua anō tō te aro ki te whakatikatika i te pūnaha ture kia kaua te hunga kōtiti nei e ngaro ki tua o tāwauwau i roto i te reo whakarangirua a ngā kōti.  Ae, ka tāea e te tangata te kōrero Māori i a ia i roto i ngā kōti, heoi he taumata anō ka tāea ki te ākina te reo.  

I tēnei wā, ka tāea e te tangata te whakautu pātai, te tohe rānei i tōna tohe i roto i te reo Māori ki ngā kōti.  Heoi, ehara i te mea ka reo Māori te kēhi katoa, arā, ehara i te mea me Māori te whakautu a te hoariri, a te tiati rānei.  Whakaarohia te āhua o te kōti mena ka whakautua e te tiati ngā kōrero katoa ki te reo Māori.  Mo te hunga kua tipu ki te reo, ka tino mārama, ka tino tau ngā kōrero katoa ki te kōrerotia ko te reo Māori anakē.

Nōku te whiwhi, i tērā tau i whai wāhi au ki te haere ki te Hui-ā-tau o te Hunga Rōia ki Waitangi.  I reira, i whakarongo au ki a Annette Sykes e kōrero ana mo te reo i roto i ngā kōti.  Kō tāna, ae, ka taea e te tangata te tono kia reo Māori i roto i ngā kōti, heoi, ka taea e te kōti te aukati i tēnei tono inā kare he rauemi, he tangata rānei e āhei ana ki te kawe i te reo.  Ko tāna, he takahi tēnei i te mana o tō tātou reo.  Ko te reo Māori he reo motuhake ki Aotearoa nei, ā, me āhei te tangata ki te whakamahi i tēnei reo ahakoa ki hea.  Ko tāna, kei te Kāwanatanga, kei ngā kōti kē te kawenga kia whakarite rautaki e āhei ai te tangata, Māori mai, Pākeha mai rānei te whakamahi i te reo i ngā kōti, ki te hiahiatia.  

Mo te taha ki ngā ture o te Paremata, nō nā tata nei kua tūwhera mai te tatau o te ao tuhi ture ki a kuhu atu ko te reo Māori hei hoa mo te reo Pākeha. Ko te Ture Reo Māori tērā i whakarewatia i tēnei tau tonu.  Engari ko te Ture Reo Māori 2016 te ture tuatahi ki te whakamana i te taha reo Pākeha me te taha reo Māori, ā, ko te painga ake, ki te rerekē, ki te tukituki rānei te taha Māori ki te taha Pākeha, ko te tuhinga reo Māori ka whāia.  I mua i tēnei ture, i whakamāoritia ngā pire me ngā ture e te Kāwanatanga, heoi kāore he mana tō te taha Māori.  Kua tō te rā ki tērā tūmomo āhuatanga.  Ki au, me reo rua ngā ture katoa e whai hāngai ana ki te Māori, ā, me whaimana te taha reo Māori.

I tērā tau, ko tētahi o aku mahi he āwhina i te tira whakamāori i te pire reo Māori.  Ko te rautaki i whāia, i tuhia te pire Pākeha, katahi i kirimanatia tētahi mātanga reo, a Kiwa Hammond kia whakamāoritia, ā, ko au tana kaiāwhina.  Heoi, i whakaritea kia hui tahi he rōpu kia āta wherawhera i te taha Māori kia tika rawa te reo o te pire.  E toru ngā peka o te rōpu nei, ko Kiwa te mea matua.  Ko te peka tuarua ko ngā mātanga ture, arā ko Tai Ahu rāua ko David Jones, he rōia reo Māori, rātou ko Māmari Stephens, he kaiako i te kura ture ki Te Whare Wānanga o Wikitōria.  Ko Māmari rāua ko Tai anō hoki ngā kaitito i te papakupu ture reo Māori tuatahi i whakarewatia i te tau 2013.  Ko te peka tuatoru ko ngā mātanga reo, arā ko Pania Papa rāua ko Leon Blake.  Ka tika kia whai wāhi ngā taha e toru nei ki tēnei mahi kia tika te reo o te ture nei, kia hāngai anō hoki te reo Māori ki te reo o te ture.  Kei kōnei te tūāpapa, te tauira hei whāinga mā ngā whakatipuranga e whai ake nei, engari me ākina te Tari Tuhi Ture kia whakawātea mai tēnei mahi ki ngā ture Māori katoa.

Hei whakakapi ake i ngā kōrero, kua kitea kē he wāhi tō te reo Māori i te pūnaha ture, ā, he hua o roto.  Heoi, me kaha tonu te mahi tahi ā te Kāwanatanga me te iwi Māori kia noho māori tō tātou reo i roto i te pūnaha ture.  Hei aha? Hei oranga mō tātou, hei oranga anō hoki mo te reo i ngā rā anamata nei.  Whakapautia te kaha me te pūtea ki tēnei o ngā kaupapa, ākina te reo, otirā whakamanatia i roto i te ao ture.

 

Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. “It doesn’t have to be boring”: Chlöe Swarbrick vs. status quo
  2. Work
  3. Editorial—Issue 22, 2016
  4. I, Daniel Blake and the Welfare State
  5. Young Voters: Waking the Sleeping Giants
  6. The Sky Is Falling
  7. Tell us about Talis
  8. Vic group launch their Reclaim-munist Manifesto
  9. Bye Bye Little Karori (in two years time)
  10. Students seize opportunity to rant at Grant
i-daniel-blake

Editor's Pick

I, Daniel Blake and the Welfare State

: Recently at the NZIFF I was fortunate enough to see Ken Loach’s I, Daniel Blake, this year’s winner of the Palme d’Or at Cannes. By the end of the film nearly everybody seemed to be in mourning and most of the people seated around me were sniffling and wiping their eyes. I,

Viewport width =