Viewport width =
July 10, 2016 | by  | in Opinion |
Share on FacebookShare on Google+Pin on PinterestTweet about this on Twitter

Ākina te Reo mō te ake ake!

Katahi ano a Ahorangi Rawinia Higgins ka eke ki te turanga o Deputy Vice-Chancellor (Māori) ki te whare wananga nei. Nei ra te tai o mihi te pari atu nei ki a koe, e te manukura. Kua roa nei koe e hikoi ana i te hikoinga roa mo te reo te take, mo wō tātau tikanga te take, hei aha? Hei painga anō mā tātau ngā reanga me nga whakatipuranga o nāeanei, o āpōpō hoki. Taputapu ana!

 

Nā Te Taura Whiri i te Reo Māori te kōrero ‘Ākina te Reo’ i kōwhiri hai kaupapa mō tēnei tau.  I a tātau e whakanui ana i te Wiki o te Reo Māori ki tēnei Whare Wānanga he wā pai hai whakaaro ake mō te tikanga o te ‘āki’ i te reo Māori.  He matarua tō te kupu ‘āki’, he wairua pai, he wairua whakatara hoki.  

I roto i te wiki kotahi o te tau, ka aro nui ētahi tāngata kia ākina te reo i runga i te wairua pai, ā, ka whakapau kaha ētahi ki te whakatairanga i te reo Māori me ngā tini āhuatanga katoa o taua wiki.  E hia nei ngā momo kaupapa hai whakatenatena, hai āki i te tangata i roto i taua wiki kia aro mai ki te kōrero Māori.  Kua waia tātau ki ngā mahi mō te wiki o te reo Māori i roto i ngā tau, ā, kua tangata whenua ētahi o ēnei kaupapa āki.

Engari ko tōna mata whakatara nei i ahu mai i ngā ākonga tonu o tēnei Whare Wānanga i ngā tau 70.  Nō mua noa atu tēnei i te wā o te wiki o te reo Māori.  Ko te orokohanga mai o tēnei momo kaupapa i ahu mai i tēnei Whare Wānanga, ā, nā ngā ākonga Māori tonu i āki.  Ko tō rātau ingoa ko te ‘Te Reo Māori Society’, ā, nā rātau tēnei Whare Wānanga i āki kia whakatū tētahi rā whakanui i te reo Māori.  Nā rātau hoki i āki kia reo rua ngā tūtohinga katoa o tēnei Whare Wānanga, engari kāre i whakaaehia.  Ehara i te mea i aro ēnei ākonga ki taua whakataunga a te Whare Wānanga ka ākina, ka ākina, ā, nā wai ka huri rātau ki te whakamāori anō i aua tūtohinga.  Nā tēnei ka uru ēnei ākonga ki te raruraru, ā, he mea heri rātau ki te Kaunihera matua.  Me i kore tā rātau āki kia whakanuia te reo Māori ko wai ka mōhio pēnā ka whānau mai ngā kaupapa whakarauora reo i puta nō muri ake i ā rātau āki.

Nā ngā mahi āki ā ō koutou tūākana i te whare wānanga nei ka puta ko te petihana mō te reo Māori, ka mutu, nā ngā rangahau a tākuta Richard Benton ka āta kitea he pēhea ana te ora o te reo, ā, i whakaū hoki i ngā āki a Te Reo Māori Society.  Nō konei ka whānau mai ngā kaupapa whakarauora reo e mōhiotia whānuihia e tātau i ēnei rangi, arā a Te Ataarangi, a te Kōhanga Reo, ngā Kura Kaupapa Māori, ngā Wharekura me ngā Whare Wānanga.  Tae atu ki ngā mahi pāpāoho, ā-reo irirangi nei, ā-pouka whakaata nei, ā-ipurangi hoki.  

Ehara i te mea kāre ētahi atu i pakanga mō te reo, arā ngā ākina a Ngā Kaiwhakapūmau i te Reo, nā rātau i kawe te kerēme mō te reo Māori ki te Rōpū Whakamana i te Tiriti o Waitangi.  I tū tēnei kerēme ki te marae o Waiwhetu, ki Te Herenga Waka hoki.  Nā ēnei ākina ka whānau mai te Ture Reo Māori 1987, ā, me tāna hua ko Te Taura Whiri i te Reo Māori.  

Nō te 14 o Paengawhāwhā o tēnei tau ka mana te Ture mō Te Reo Māori, ā, kai roto i taua ture te tūāpapa kia whai wāhi ai tātau te iwi Māori, i raro i te maru o Te Mātāwai, ki roto i ngā āhuatanga whakarauora reo i te taha o te Karauna.  Nā te rōpū tohutohu reo Māori i āki te Minita kia tika te whakatakoto o taua pire.  Ko au te heamana o taua rōpū, ā, ko tā mātau he āwhina, he tautoko i te Minita kia takoto pai, kia mārama, kia tika te takoto o te Pire.  Koirā ka tikina atu ko te tauira o te whare tipuna mō taua Pire, koira hoki tōna ingoa ko te Whare o te Reo Mauriora (tirohia te pūrongo ki http://www.tpk.govt.nz/en/a-matou-kaupapa/strengthening-maori-cultural-wealth/te-reo-maori/), ā, ka kitea ēnei i roto i te ture hou nei.  

Nā reira ka kitea i te hononga o ngā mahi āki mō te mana o te reo Māori me tō tātau Whare Wānanga, ā-ākonga, ā-marae, ā-kaimahi hoki. Kua whakatauira kētia e ētahi i tēnei Whare Wānanga.  Nō reira, kua takoto te mānuka ki a tātau i roto i tēnei wiki, ka pēhea tā tātau āki i tēnei wiki?  Ka āki i runga i te wairua pai, ka āki rānei i runga i te wairua whakatara ka whakatū rānei i ētahi kaupapa ka whai hua i tua atu i tēnei wiki anahe.  Nō reira, mutu ana tēnei wiki whakanui i tō tātau reo ka ahahia i ngā wiki rima tekau mā tahi e tū mai nei? Amoa ake te kaupapa o te tau, ākina te reo! Engari kaua noa iho mō tēnei wiki, engari kōrerohia tō tātau reo i ngā wā katoa, i ngā wāhi katoa mō te ake ake!

Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. Larger Than Life — Chris Rex Martin & Tainui Tukiwaho
  2. Manaia — Atamira Dance Company
  3. Philosoraptor
  4. The Basement Tapes
  5. Three Days in the Country
  6. Wonder Woman (2017)
  7. The 2017 Budget — what it means for students
  8. Interview with Gareth Morgan
  9. The Bubble
  10. The battle you never asked for: Chasing Liberty vs. First Daughter

Editor's Pick

Go Watch TV: Rick and Morty and Secular Humanism

: - SPONSORED - Writers and critics have praised Rick and Morty for its sharp character writing and absurdist take on sci-fi tropes, and I count myself in that number. But there is a mounting backlash against it that I can’t help but pick a bone with. On one of the many, many pop