Viewport width =
July 10, 2016 | by  | in Opinion |
Share on FacebookShare on Google+Pin on PinterestTweet about this on Twitter

Ngā Hākinakina Tūturu o te Māori

He mihi ki ngā ringa tautoko ki a Hinemaia Takurua rātou ko Malik Priestly me Aurora Akauola.

 

Nō ngā tekau tau tata nei kua tīmata te whanake mai anō o ngā kēmu, ngā taumāhekeheke, me kī, ngā hākinakina Māori.  I tēnei wāhanga ka kōrerotia, ka whakamāramatia e rua ngā hākinakina tūturu a te Māori, arā, ko te Waka Ama me te Kiorahi.  Ka takarohia ngā hākinakina nei e ngā tauira Māori o ngā whare wānanga ki te Huinga Tauira ka tū ki Te Whanganui a Tara i tēnei tau.  Nā reira i pupū ake ai te whakaaro kia kōrerohia ngā kēmu nei i Te Ao Mārama.

 

Waka Ama

Kua rongonui a Ngāi tāua te Māori mō ngā mahi whakatere waka mai i te wā i hoe mai ō tātou tīpuna i Hawaiki ki Aotearoa nei.  Kua kaha kitea ngā waka ama i ngā tōpito katoa o te Moana Nui a Kiwa, heoi nō te taenga mai o te Pākeha, i memeha haere te hunga Māori e eke ana i ngā waka ama.  Ko tētahi take pea i pēnei ai nā te mātotoru o ngā rākau i Aotearoa nei, kāore he take mo te hanga waka whai ama.

Tae rawa ki ngā tau 1980, ko Matahi Whakataka-Brightwell i haere ki Tahiti.  I reira i kitea te hākinakina nei, arā, te whakataetae waka ama.  Ka kōrero atu te tangata whenua o te moutere rā mo ngā pūrākau kua tukuna iho ki a rātou mō te rongonui o te Māori me tōna maia ki te whakatere waka ama.  Ka pupū mai i reira he moemoeā kia whakaara ake anō i tēnei hākinakina, ā, ka whakahokia mai e ia.  Mai i taua wā, ki tēnei rā, kua piki anō te ora o tēnei hākinakina i te ao Māori, otirā, ki ngā iwi katoa puta noa i te motu.

Kua tere pūāwai mai te hākinakina nei i Aotearoa i ngā tau tata nei, ā, kua whakatūria te maha o ngā karapu waka ama puta noa i te motu.  I te rohe nei o Te Ūpoko o te Ika, kei Wharewaka tētahi karapu.  Kei Porirua te karapu rongonui, a Toa Waka Ama.

He nui anō ngā whakataetae mo ngā reanga katoa ka tū ki Karapiro i ia tau.  Mai i ngā whakataetae nei ka whiriwhiria ngā tino kaihoe kia haere ki ngā whakataetae o te ao ka tū i ia rua tau.

Heoi, ko tētahi āhuatanga whakamīharo o te ao waka ama ko te kuhunga o te hākinakina nei ki ngā taumāhekeheke o te ao.  I tēnei tau ka tū he whakataetae waka ama ki ngā Taumāhekeheke ki Rio hei whakatauira i tēnei whakataetae ki te ao.  Ki te pai te whakataetae nei, ā, ki te rata te marea ki tōna āhua ka whakaurua te hākinakina nei hei whakataetae tūturu mo ngā Taumāhekeheke e tū mai ana ki Tokyo hei te tau 2020.

 

Kiorahi

Ko te kēmu Kiorahi he taonga mai i ngā rā onamata, i mua i te taenga mai o te Pākehā.  I te wā o ō tātou tīpuna, i takarohia te kēmu nei hei hākinakina whakakoi, whakaharatau i te tinana me te hinengaro hoki. Ko tōna hanga, ko ngā pūkenga ka kitea i roto i te kēmu nei he pērā i te whutupaoro, te rīki, te whutupaoro o Ahitereiria, te karo paoro me te maha anō hoki.

E ai ki te kōrero, i ahu mai te kēmu Kiorahi i te pūrākau mō Rahi rāua ko tana wahine a Ti Ara.  Ka kāwhakina a Ti Ara e te hoariri, ā, ka tere whai atu a Rahi i a rātou kia whakahokia mai tana wahine.  He whawhai, he pakanga nui te hua o tēnei whāinga.  Ka karangatia e Rahi, e te hoariri hoki ā rātou taniwha kaitiaki mō te pakanga te take.  I te mutunga iho, ka mate ko te tohunga mākutu o te hoariri, ka kitea a Ti Ara, ā, ka whakatūria he tatau pounamu i waenga i te iwi a Rahi me tōna hoariri. Hei whakamana i te rangimārie, i waihangatia te kēmu nei kia hohou te rongo, hei whakaari hoki i te haerenga a Rahi ki te whakahoki mai i a Ti Ara.

 

Waka Ama

waka

Ngā wāhanga o te waka.

Kua whakaingoatia ngā wāhanga o te waka ki te pikitia nei.

He maha ngā whakataetae waka ama i ēnei rā, heoi ko te whakataetae hoe kōkiri te mea ka kaha whāia e te marea.  Ka tīmata ngā waka katoa i te wā ōrite, ā, ko te whāinga kia whakawhiti i te rārangi whakamutunga i mua i ērā atu waka.

E ono ngā kaihoe o te waka, ā, he rerekē ngā pūkenga me ngā mahi a ia kaihoe.

Ko te kaihoe tuatahi kei te ihu o te waka.  Ko tāna he whakatau i te taki, i te tere o te hoa a ngā kaihoe. Ahakoa te tere, te pōturi rānei o tana hoe, me whāia tana taki e te toenga o ngā kaihoe kia kotahi te waihoe o te waka.

Kei muri i a ia ko te kaihoe tuarua, ā, ko tāna mahi he āta whai i te taki o te kaihoe tuatahi.  Ki te tika tana whai, ka āhei te toenga o ngā kaihoe te whai atu i a ia.

He mahi anō tā ngā kaihoe e rua o mua ki te huri i te waka i ngā kokona.

Ko te kaihoe tuatoru me te kaihoe tuawhā me kī, ngā pūkaha o te waka.  Ko tā rāua he aro noa kia kaha, kia tere hoki te hoe.  I te nuinga o te wā ko ngā kaihoe tino kaha, tino pakari ka noho ki ēnei wāhi.

Ko tā te kaihoe tuarima he āwhina i ngā kaihoe kei mua tonu, kei muri hoki i a ia.  Arā, ko tētahi aronga kia hāpai i ngā pūkaha o te waka heoi, he wāhi anō tāna ki te āwhina i te kaiurungi o te waka kia tika te haere o te waka.

Ko te kaihoe tuaono kei te taurapa o te waka. Ko tāna he āta arataki i te rere o te waka, kia torotika, kia kaua e kōtiti te haere.  I te nuinga o te wā he rerekē hoki te hanga o tana hoe.

 

Kiorahi

kiorahi

Kei tēna, kei tēna āna ake ture mo te kēmu nei, ā, ko te tikanga, mā te hau kāinga e whakatau ko ēhea ngā ture ka whāia.  Hei tauira, ki ētahi, kia whakahokia te paoro ki ngā Taniwha, me tango, me tihaea tētahi o ngā haki i ngā hope o te Kioma. Ki ētahi ka nui te pā (hei tauira, mo ngā tamariki nohinohi), ā, ki ētahi atu me rūtu kē.

 

Te Papa Tākaro

E toru ngā rohe matua o te kēmu nei.

Ko te rohe o waho ko Te Ao.  Kei roto i tēnei rohe ko ngā Pou e whitu, ā, i ahu mai ngā Pou i te kāhui whetu o Matariki.

Kei reira hoki ko Te Marama, ā, koia te wāhi ka tīmata te kēmu.

Ko te rohe tuarua ko Te Roto.

Kei waenga i tērā ko Te Pawero, ā, ko Te Tupu kei tōna pito.

Ko Te Ara he wāhanga e hono ai i Te Pawero ki Te Ao.

 

Ngā Rauemi

Ka whakamahia he puka (drum/barrel) mō Te Tupu.  Ko ngā Pou, ka whakamahia he pou haki rānei, he kōeko rahi rānei.  Ko te rauemi matua o te kēmu nei ko Te Kī.  I ōna wā, he paoro kua hangaia ki te harakeke, heoi i ēnei rā ka whakamahia ngā paoro inarapa.

 

Ngā Ture

E rua ngā tīma, ko tētahi ko te Kioma, ko tēra atu ko te Taniwha.  E whitu ngā kaitākaro ki ia tīma. He rerekē o rāua whāinga, heoi ka whai wāhi ngā tima e rua ki ngā taha e rua o te kēmu, arā, ka whakawhiti taha ngā tīma i te hauruatanga o te kēmu.

 

Kioma

Me noho te tīma Kioma ki te rohe o Te Pawero, Te Ara me Te Ao.

Ko te whāinga o ngā Kioma kia pā i ngā Pou ki Te Ki mā te omaoma haere, mā te pāhi rānei i Te Kī ki waenga i te tīma.  Kātahi ka oma ki te Pāwero mā Te Ara.

Ki te pā atu Te Kī ki ngā Pou e toru i mua i te kawenga ki te Pāwero, ka toru ngā piro ki te tīma Kioma.

Ki te tīhaea, ki te tangohia tētahi o ngā haki e te tima Taniwha, me timata anō.

Kei te Kioma anō te mahi tiaki i Te Tupu, kia aukati i tā te tima Taniwha whiu i Te Ki kia patu atu.  Heoi, ka whakaaea anake e toru ngā kaitakaro i roto i te rohe o te Kioma.

 

Taniwha

Me noho te tīma Taniwha ki te rohe o Te Roto me Te Ao.

Ko te whāinga o ngā Taniwha he hopu i te tīma Kioma, me te tīhae i ngā haki kei o rātou tātua, kia kaua rātou e whai piro.

Heoi, ka whai piro anō te tīma Taniwha mā te whiu i te Kī mai i Te Roto, kia pā i Te Tupu.

Ko te whāinga o ngā Taniwha kia kaua ngā Kioma e pā ki ngā Pou me te aukati i tā rātou whakawhiti i Te Roto kia whai piro.

Ka pērā mā te tango i tētahi o ngā haki.

Ka tāea hoki e ngā Taniwha te whai piro mā te whiu i te Ki ki te Tupu.

 

Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. Hello!
  2. Misc
  3. On Optimism
  4. Speak for yourself
  5. JonBenét
  6. Ten things I wish my friends knew about being Māori
  7. 2016 Statistics
  8. I Wrote for Salient for Four Years for Dick and Free Speech
  9. Stop Liking and Commenting on Your Mates’ New Facebook Friendships
  10. Victoria Takes Learning Global
pink

Editor's Pick

Ten things I wish my friends knew about being Māori

: 1). I wish my friends knew that when they ask me what “percentage” of Māori I am—half, quarter, or eighth—they make me feel like a human pie chart. I don’t know how people can ask this so nonchalantly, but they do. So I want to let you know: this is a very threatening