Viewport width =
July 10, 2016 | by  | in Opinion |
Share on FacebookShare on Google+Pin on PinterestTweet about this on Twitter

Tōku māramatanga me tōna katoa

Ki tēnā, ki tēnā o tātou he māramatanga rerekē. Ki tēnā, ki tēnā o tātou he ara rerekē ki tērā o ngā māramatanga. Koinei taku kitenga ki te māramatanga.

I  te tīmatanga o taku tohu i te whare wānanga nei i noho māhaki au ki te whakaaro kua whai au i te huarahi tika mōku. Ka tere huri tēnei whakaaro. I te tūtukitanga o taku Paetahi i te whare wānanga i kaha taka te pouritanga i te maru o tōku whare. I ahau i whare wānanga, i wetewete ōku whāinga mō ngā rā kei te heke mai nei. Ka ahu mai ngā pātai nei.  Me pēhea te raranga i aku mahi ki ngā mahi ā-iwi, ā-hapū, a-whānau? Me pēhea te tohatoha i ngā kete o te nukuroa, ngā kete o te wānanga ki te whanau?

E ngākaunui ana au ki ēnei kaupapa i whai i te kura, nā ko te reo Māori me ōna tikanga me te Kiriata. Engari ehara tērā i te huarahi mōku i tēnei wā. Ehara i te mea karekau he wāhi, he tikanga mō ēnei o ngā kaupapa. Engari mōku ake, ko te uauatanga ko te whāngai atu i ēnei o ngā momo mahi kia piki te ora o te iwi, o te hapū, o te whanau anō hoki. Nā tēnei āninitanga i hoki au ki te kāinga ki te tātari i aku aronga, i aku whēako mō ngā rā kei te heke mai nēi.

Huri te ao, huri te pō ka huri taku whāinga ki tetahi huarahi tino rerekē. I ahau i te kāinga i te Raumati, i pōkaikaha au i ngā mahi ā-hāpu. I te taenga atu ki ērā o ngā hui ka taka te kapa, nā ko te whakaaro ko tēnei: ehara tō mahi mō te takitahi anake, engari mō te takitini kē. Ā, i whakarewaina he aronga hou i te taenga ki ngā hui. I whakatū a Mana Ahuriri i tētahi hui mō ngā hapū hora ai i te Whanganui-a-Orotu. Ko te matū, ko te kiko o tēnei rōpū ko te kawe i ngā take whenua e pā ana ki te Tiriti o Waitangi ki te Karauna. I rongo au i te koekoe o ngā Tui, te ketekete o ngā Kereru me te kuku o ngā Kākā, nā koinei te tangi o ngā hapū o ngā whenua i raupatutia e te Karauna. Nā tēnei ahuatanga i āhei ki te whai huarahi i te Ture, otirā i te Ture Whenua.

Ka tere whakaputa ngā hua pai i te tironga o tōku māramatanga hou. Koinei te tohu tuarua i kitea e au kia whai tēnei huarahi ki te mātauranga o te Ture. I ngā mārama kua pahure kua aratahi tōku tuakana rāua ko tōku tungane i tēnei rōpū ‘Ngā Hapū o Tūtaekurī’. Kōinei he taura here mō te waka a Tākitumu ki te awa o Tūtaekurī. He momo rōpū, he momo pouwhiriniki kia noho ora mai ā-tinana, ā-wairua te awa. Nā tēnei i koropupū te whakaaro kia hoki atu ki te whare wānanga. Tēnā ka riro i a au taku tohu i te ao Pākehā kia noho hei kaitiaki whenua mō te ao Māori.

Tahuri mai ki te ao mārama. Kua whai māramatanga ahau, nā ko tēnei. Ko ngā mahi o te reo Māori me ōna tikanga, te mahi kiriata te tūāpapa o tōku whare anake. Ko tāku ināianei ko te waihanga i te toenga o te whare.

Ko te Ūpoko o te Ika a Māui tōku kainga rua, nā i ahau e noho ana ki tēnei takiwā ka piki ki runga i a Ahumairangi ka hoki aku mahara ki tēnei o ngā whakataukī “Hokia ki ō maunga kia purea e koe i ngā hau o Tawhirimātea”. Ka huri tōku ao, ka huri ōku whakaaro ki ngā pae maunga, ki te pae whenua i taku hau kāinga. Ka tahuri atu aku whakaaro ki ōku waewae i runga i te tihi, ki te pito o tōku maunga a Otatara. Tērā kei te matakitaki au i ngā wai marino o te awa a Tūtaekurī, te awa ka rere tōku tuakiri me te awa ka maringi hoki tōku toto. Ka tahuri tōku titiro whakamua ki tōku marae, e noho puku ana ki te onepū o Papatūānuku. Koinei te wāhi ka noho puku taku whatumanawa. E mōhio pū ana te whatumanawa ko ōna katoa he mahi nui ake i tōna kotahi.

 

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. Interview with Dr Rebecca Kiddle
  2. The Party Line
  3. Te Ara Tauira
  4. Robotic Legs, “Inspiration”, and Disability in Film
  5. VICUFO
  6. VUWSA
  7. One Ocean
  8. Steel and Sting
  9. RE: Conceptual Romance
  10. Voluntary WOF a Step in the Right Direction
redalert1

Editor's Pick

RED

: - SPONSORED - I have always thought that red was a sneaky, manipulative colour for Frank Jackson to choose in his Black and White Mary thought experiment. It is the colour of the most evocative emotions, love and hate, and symbolises some of the most intense human experiences, bi