Viewport width =
July 10, 2016 | by  | in Opinion |
Share on FacebookShare on Google+Pin on PinterestTweet about this on Twitter

Wetereo

Mā te kōrero noa iho i tēnei kupu ka taea te whakamataku i te tini me te mano. Kei ia reo o te ao tēnei mea te wetereo. Kei tēnā reo, kei tēnā reo tōna ake punaha wetereo. Tē taea e tātou te whakawehe i te wetereo me te reo. Ahakoa ngā amuamu o wētehi me ngā kōrero e kī atu kāre he take o tēnei mea, nō hea te wetereo e mate. Ka ora te reo, ka ora hoki te wetereo.

Ko au tētehi o ngā pia i ako i te reo Māori hei reo tuarua (ko te reo Ingarihi taku reo tuatahi). Nā tēnei whare wānanga i poare mai aku karu ki ngā tini āhuatanga me te hōhonutanga o te ātaahua o tō tātou reo. Ehara i te mea kāre au i mōhio ki taua ātaahua i mua i taku taenga mai ki konei. Engari nā tēnei whare wānanga i akiaki i a au ki te ruku ki ngā rētōtanga o te reo, kia kite ai tōna rerehua katoa. Ka haere nā, ka haere nā ka oti i a au te mahi i ngā pepa reo Māori katoa. I tērā tau i mahi au i te pepa MAOR 322, ā, mā reira i poare anō aku karu. Engari i tēnei wā ko tō rāua aronga ko te wetereo. Kāre e kore nā taua pepa rā i whakakipakipa taku ngākaunui ki tēnei o ngā kaupapa. He tino āwhina tēnei mōhiotanga ki te āhua o taku reo ā-tuhi, ā-waha anō hoki. I te wā i tae mai te tono ki te tuhi i tētehi kōrero mō Te Ao Mārama, kia pono aku kōrero, kāre au i te paku mōhio he aha tētahi kaupapa hei tuhi māku. Nāwai rā, nāwai rā ka toko ake te whakaaro i taku hirikapo kia tuhi mō te wetereo. He mea nui te wetereo ki a au, otirā ki a tātou katoa engari i te nuinga o te wā kāre tātou e paku aro atu ki tōna hiranga. Ka whakamahia e tātou katoa te wetereo ia te wā ka whakamahia te reo. Ko te wetereo tētehi punaha e ārahi nei i ā tātou kōrero, i ā tātou tuhi anō hoki. He ture wēnei. Ahakoa kāre wētehi i te mōhio kei te whakamahi rātou i te wetereo, kei te whakamahia tonutia, ahakoa te kūware.

He maha noa atu ngā wā i whakatikaina au e tētehi atu, engari tē taea e rātou te whakamārama mai he aha i hē ai taku kōrero. Ko te whakautu i te nuinga o te wā: kāre i te pai ki aku taringa. Anā! Kei te mōhio te tangata ki te hē nā tana mōhio ki te reo me ana ture. Ko te wetereo tērā! Ko taua whakautu rā te take i hiahia au ki te piki, ā, ki te tahuai i te tihi o tēnei maunga e kīia nei ko te wetereo. I te pīrangi au ki te mōhio he aha i hē ai aku kōrero me te aha me pēhea hoki te whakatika, mā te ako i te wetereo otirā, ngā ture o te reo ka pērā.

Nā taku aroha ki te wetereo Māori i tīni te aronga o taku Tohu Paetahi ki te wetereo Pākehā. Kātahi te whakaaro pai ko tērā. I mua rā i te whai au i te mahi kaute, ā, kāre tonu au i te mōhio he aha ai. Rawe ki a au te huringa o taku aro. He kaupapa tēnei ka taea te hāngai ki te reo Māori i ngā wā katoa, ā, i pērā aku mahi. Waihoki, ki ōku nei whakaaro, i tua atu i ngā karaehe Māori ko ngā tauira o te wetereo Pākehā ko rātou te hunga manawanui ki ngā momo reo katoa o te ao. Nā whai anō ka pērā nā te mea ka whakapāpā rātou ki te maha o ngā reo, hei arohaehae, hei wewete. Nōku te māringanui kia pēnei ngā tauira, engari ki te kore rātou i pērā kāore he aha ki a au, ka hoea tonu taku waka reo Māori, ktk.

Kei te mōhio au kāre i te pai te wetereo ki ngā tāngata katoa. Engari, anei tētahi punaha, tētahi rauemi hei āwhina i te ako. He uaua i ētahi wā te kapo i ngā akoranga me ngā ture engari i te mutunga iho ka pūrangiaho. Kāre tēnei rauemi e ngaro, ka ora tonu ki tua o āke āke.

 

Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. Hello!
  2. Misc
  3. On Optimism
  4. Speak for yourself
  5. JonBenét
  6. Ten things I wish my friends knew about being Māori
  7. 2016 Statistics
  8. I Wrote for Salient for Four Years for Dick and Free Speech
  9. Stop Liking and Commenting on Your Mates’ New Facebook Friendships
  10. Victoria Takes Learning Global
pink

Editor's Pick

Ten things I wish my friends knew about being Māori

: 1). I wish my friends knew that when they ask me what “percentage” of Māori I am—half, quarter, or eighth—they make me feel like a human pie chart. I don’t know how people can ask this so nonchalantly, but they do. So I want to let you know: this is a very threatening