Viewport width =
July 10, 2016 | by  | in Opinion |
Share on FacebookShare on Google+Pin on PinterestTweet about this on Twitter

Whaikōrero

Ko tēnei mea te whaikōrero he mea tuku iho e ō tātou mātua tīpuna. He nui ōna āhuatanga, ōna tāera, ōna momo, ōna tuku. He whānui ngā kōrero e pā ana ki te whaikōrero, heoi ka aro ahau ki ētahi kōrero kua puta i aku iho pūmanawa reo hei āta wherawhera i tēnei kaupapa. Tuatahi ake, katoa ēnei kōrero he mea whāngai mai ki a au, mēnā e taupatupatu ana ētahi o ngā whakaaro, mātāpono rānei ki a koe, kei te pai tērā. Nou ōu whakaaro, nōku ēnei.

“Kei runga i ō pakihiwi te mana o tō marae, te mana o tō hapū, te mana o tō iwi.” Tīmoti Kāretu

Ko tētahi o ngā mahi a te tangata whaikōrero he waha i ngā whakaaro o tōna marae, o tōna hapū, o tōna iwi. He mana nui tērā. E kī ana te kōrero, “hē o te kotahi, hē o te katoa.” I roto i tēnei kōrero ka kite tātou i te uaua o tēnei mahi. Ehara i te mea ko ōna whakaaro ake e whakatakotohia ana e ia, engari kē kei te whakakanohi ia i tōna ope, kei te waha ia i ō rātou whakaaro.

“Ko koe te kauwaka kōrero mō ngā whakairo o tō whare.” Te Wharehuia Milroy

Hei apiti atu ki ngā whakaaro o mua atu, ko tā te tangata whaikōrero he waha i ngā whakaaro o ōna tīpuna, he whakakanohi i ngā whakairo o tōna whare. E kore rawa te kaikorero e tū me tōna kotahi. Ko ōna tīpuna kei te ārahi i te ia o āna kōrero, koia pea te take i ētahi wā ko ngā tino whakaaro ka ahu mai i te whatumanawa, i a koe e tū ana i te mura o te ahi, ehara i te mea i āta whakaritea.

“Waiho atu te ao kōhatu ki te wāhi ngaro. E kore tātou e hoki ki tērā tohungatanga.” Matiu Eru

Kāore he wero i tua atu i tēnei kōrero mō te hunga whaikōrero o nāianei. Mā roto mai i tēnei wero he mihi ki ngā tohunga whaikōrero kua kore e kitea i ēnei rā. Te hunga pēnei i a Irirangi Tiakiawa, i a Te Kani Te Ua, i a John Rangihau, i a Tā Hemi Henare, i a wai atu, i a wai atu. He momo rātou. He mea whakapakeke rātou i te mātotorutanga o te reo me ōna tikanga. He mōhio rātou ki te ao i noho nei rātou, te taiao me ngā āhuatanga o te wā. Ka huri te ao, ka memeha te reo, ka huri te taumata o ngā whaikōrero. He toki whaikōrero e ora tonu ana engari ruarua noa iho tō tēnā iwi, tō tēnā iwi me te aha kāore e rite ki te taumata o uki. He wero tēnei ki ngā kaikōrero o nāianei ki te whai i te tauira o uki me kore noa e paku tata ki tā rātou i whakatauiratia ai.

“Ko te mahi a te tangata whaikōrero he rāweke i te mauri o ngā kaiwhakarongo.” Pou Temara

He kōrero tēnei e hāngai ana ki te pai o te tangata whaikōrero ki te mahi i tana mahi. Mai i tana kawe i a ia, ki te kiko o ana kōrero, ki tana reo tuku. Ko ngā tino o te whaikōrero e mātau ana ki te hopu i te hunga whakarongo. He maha ngā rautaki whakatinana i tēnei whakaaro. Ko ētahi whaikōrero he ngahau, ko ētahi he momo whakaari, ko ētahi atu he hohonu. Ahakoa te aha, kei tēnā kaikōrero, kei tēnā kaikōrero tōna ake taera. Ki a au nei ko te tino pūkenga o te wahapū ko tana whakawā i te hunga whakarongo.  Mā te whakawā i te hunga whakarongo e taea ana e te wahapū te rāweke i ō rātou whakaaro, i ō rātou mātāpono, i tō rātou mauri. Ki te pērā te pai o tana mahi, ka titikaha āna kōrero ki te hinengaro o te katoa, e kore rātou e wareware i a ia.

Hei whakakapi:

Ka noho te katoa o ēnei kōrero hei ārahi i a au nōku e whaikōrero ana. Hei tā Te Wharehuia “ko wheako te matua o whakaaro nui.” Kāore pea he kaiako i tua atu i ō wheako hei arataki i ō mahi, e mōhio ai koe ki te hē me te tika, te pai me te ngoikore, te ataahua me te anuanu. Māu anō ngā whaikōrero o nāianei e whakawā, ko ngā mea e whakaaetia ana e tō ngākau, whāia, ko ērā atu, parea ki rāhaki. He wā e taka mai ana ka noho ko ngā uri o nāianei hei waha kōrero mō ngā marae maha. Nō reira whakarongo ki ngā whaikōrero o te wā e rite ai koe mō ngā tau e heke mai nei, e whakahīhī ai tō marae i a koe.

Petera Hakiwai.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge