Arohatia te reo… Pāngarau

Ko te manu kai miro, nōna te ngahere. Ko te manu kai mātauranga, nōna te ao. Heoi, ko te manu e matatau ana ki te kaute, nōna ngā mea katoa.

I te nuinga o te wā, mā te kitenga noa iho o tēnei kupu e hūiki ai te tangata. Nō reira, he mea takahi te mana o te Pāngarau i runga i te pōhēhē kei te uaua rawa atu tēnei reo, ka mutu kāore hoki ōna take. Tēnā pōhēhē tēnā e hoa mā! I runga i te ngākaunui ki te reo Pāngarau ka miramirahia he aha tātou katoa e whai atu ai i te huarahi o ngā nama. Ahakoa me uaua ka kitea te mīharo o tēnei mea te pāngarau, ko tāku e awhero ai, ko te nui haere o te rahinga e mahi pāngarau ana i tēnei ao. Nā, anei ōku nei whakaaro:

1.  He nui ngā mahi ka taea ina haere koe mā runga i tēnei ara. Hei tauira: he video game maker, he pilot, he sports statitician, he animator, he forensic scientist, he actuarist, arā nui atu ngā kōwhiringa.

2.  Tua atu i tērā, me uaua ka kitea te tangata Māori e taea ai te mahi i ngā mahi a te kaikaute. He nui te mahi kaute i te ao Māori mō te tangata hīkaka.

3.  Te hanga a te pūtea mō te kaipāngarau, inarā, ko te Māori e mahi ana mō tōna ake iwi me tōna ake whānau.

4.  Ehara i te mea me mātau rawa atu koe, anō nei ko Einstein koe kia taea ai te mahi, e hē! Mā tō hihiri kē koe e eke ai.

5.  Āe, he uaua, engari he uaua ngā mea katoa (tae rā anō ki te reo Māori). Heoi anō tā tātou he ū ki te kaupapa, kaua e haere poka noa. Me whai take, kātahi anō ka whai whakaaro.

6.  Kia maumahara ake koe ki te wā i a koe i roto i tō karaehe pāngarau, ā, nāu tētahi whārite i whakaoti? Ko taua tau o te mauri, te mākonatanga o ngā hiahia? Koia nei tō ao mō ake tonu atu mēnā ka whai koe i tēnei ara.

Whakaarohia e hoa mā! Ko tēnei te ao hou, te huarahi ki anamata. Ki te kore tātou e whakanui i tēnei reo, ka mate, ka ngaro atu ki te pō. Ākina tō hoa, ākina tō whānau, otirā, ākina ko koe anō! Mā tō hirikapo koi ka taea ngā mea katoa.