Viewport width =
WHITE
September 11, 2017 | by  | in Features |
Share on FacebookShare on Google+Pin on PinterestTweet about this on Twitter

He uri tēnei nō Hinepūkohurangi

Nā Kahu Kutia, Ngāi Tūhoe

Whakamāori nā Migoto Eria

 

Kohukohu ana ki te rangi

Kohukohu ana ki te papa

Kohukohu ana ki te ao, kohukohu ana ki te pō,

Arā ngā kākahu a Hinepūkohurangi.

 

Kei taku kura tuatahi, ka whakaakona e rātou te whakakīngia i tō mātou pepeha. He pepa e A4 te rahi, he wāhi tuhituhi e wātea ana mō ō ake whakautu. I a au e wānangahia te whakatakoto o tōku pepeha, he rite taku reo hamumu i taku tamarikitanga, e 10 tau taku pakeke. Tōku maunga, tōku awa, tōku marae, tōku hapū, tōku iwi me tōku waka. Ki te mōhio koe i tō pepeha, e mōhio ana hoki nō hea koe ā-whenua nei: koinei tō mātou awa e kaukau nei mātou hei te Raumati, koinei tōku maunga e whakamaru i a mātou i te Takurua, koinei tōku marae, te papa kāinga o ōku tupuna. Ko tōku pepeha ko au, ko au tōku pepeha.

I tērā tau ka puta mai te māramatanga ki a au i roto i ētahi wānanga, kotahi tau te roanga o te whakapakari tangata me ētahi rangatahi Māori mai i ngā pito o te motu. I a au e wānanga ana me tēnei rōpu, ka puta mai te whakatau ki te takahi i tētahi ara me te whāinga kia riro i a au taku tā moko tuatahi. Ko tēnei ara tā moko mōku he reo karanga o tōku whakapapa, he pito arataki i a au i roto i tōku pepeha. He rangatahi tonu au, kāore i te tino kaha te kōrero Māori, he tawhiti hoki mai i tōku kāinga i a au e rangahau ana. Ahakoa he tairo tonu ēnei, e mōhio pūmau ana he ara tika tēnei mōku.

Ka waea atu au ki tōku Pāpā me taku īnoi.

Kia ora e kō,” ka whakautu a ia tōna waea.

Pāpā.” Ka rongo au i a ia e inu tī ana. “Pīrangi ana au te mau moko.

Ka pātai mai ia kei tēhea wāhi o tōku tinana, ko tāku, “Kei aku kikopuku, ringa rānei.

Ka kī au ki a ia kua rite au te kimi whakaaro, engari he paku āwhina te hiahia, “He aha rā te āhua o taku moko?

I āta whakaaro a Pāpā mō te wā poto, me tōna whakautu.

Ko tō whakapapa te kaupapa. He kāwai tupuna anō hoki. Tērā pea ko te tipuna nei a Hinepūkohurangi tētahi whakaaro, he hononga ki tō taha Tūhoe.

Ko taku waea atu ki tōku Pāpā he tuatahitanga i tēnei ara, he tīmatanga. Ko te pātai matua e pā ana ki te whakapapa. Nō te kīanga o Hinepūkohurangi e tōku pāpā, koinei te wā tuatahi e wānangahia ana mō te tipuna nei kua tā ki taku kiri. Ko Hinepūkohurangi tō mātou tipuna, ko ia te atua o te kohu. Ka whārikitia e ia i a Papatūānuku me ōna makawe mā, roroa anō hoki.

E ai ki ā mātou pūrākau, ka puta mai a Ngāi Tūhoe i te piringa a Hinepūkohurangi me Te Maunga – ko ia ko ngā puke me ngā maunga tiketike. E tika ana tēnei kaupapa mā mātou, ka whānau mai te iwi i ngā puke kua kākahutia e te kohu o Te Urewera. Ko mātou “Ngā Tamariki o te Kohu.” He mātau aku whānau ki ngā ara hīkoi ki tērā takiwā me te mahinga kai mai i te whenua.

Kua kohia hoki au i ngā whakapapa o Mataatua waka, nāna aku tipuna i kawea ki Te Moana a Toi. Tokotoru ngā tamariki a Wekanui me Irakewa, arā, ko Puhi, ko Muriwai me Toroa. Ka moe a Toroa me Kake-Pikitia, ka puta mai tā rāua tamāhine a Wairaka. Ko te tamaiti a Wairaka ko Tamatea Ki Te Huatahi, ā, i moe a ia ki a Paewhiti, te tamāhine a Taneatua. Tokotoru ā rāua tama, kotahi te tamāhine. Ko te pōtiki, ko Tūhoe-Pōtiki, nā ka puta mai ko Ngāi Tūhoe te ingoa o te iwi. Ko te whakamārama o tēnei ko “ngā uri a Tūhoe.”

Inā kīi mai taku whakapapa, he uri ahau o Hinepūkohurangi, te wahine o te kohu, ko te kūare kei roto i ahau e kīia nei he kōrero paki noa. Kāore i te whakaaetia e tērā o ngā rangahau i ahu mai mātou i te Moana nui a Kiwa, mai i Āhia me Āwherika.

Kua rongo au i a rātou e mātau ana ki ā rātou whakapapa ki ngā tipuna motuhake, tekau reanga ki muri. E mārama ana rātou ki ngā mahi whakaakoranga o ō rātou tīpuna me pēhea hoki rātou tae ki taua māramatanga. Kua rongo hoki au i ētahi e taki whakapapa ana o ngā iwi katoa o Aotearoa me ngā tātai, hononga katoa ki a Māui, Kupe me ngā atua, tērā whakapapa e kīia nei he Māori.

 

FEATURE - He Uri Tenei No Hinepukohurangi - Kahu

 

Ko tēnei te take ka tīmata au i tēnei ara o te whakapapa. Kaua mō taku taha Māori anake, e ngari mō taku taha Pākehā anō hoki. Ka taea e tōku kuia te maumahara e 15 ngā reanga ki muri o ngā hononga ki Tenemāka, Kōtarana me Ingarangi. He kaha nōna te awhi mai i a au te kohi i ngā mauhanga whānautanga, matenga hoki o ētahi o aku whānau. He nui tonu ngā mea kāore i te mōhio, he nui hoki ngā pātai kāore anō kia whakautu. Koirā te mate o te tāmitanga, whakapāwera hītori, te pūnaha whāngai tamariki me te pāmamae ki runga i ngā whānau.

Ko tātou ngā whakatipuranga o ō mātou wāhi. Ki taku nei tirohanga ka taea te kite me pēhea tōku whakaputanga mai ki te ao nei. Tāiritia ana Hinepūkohurangi i Te Urewera i te ata, whārikitia ana te riu katoa e te kohu mātotoru. E mākū ana te otaota, e puke ana te awa, ka whārikitia ana i te maunga, arā, ko tana whaiāipo. He tohu a ia mō te mea ngaro – mō tētahi ūpoko māro e tae ate ako me pēhea te piri ki te ara inā tē taea te kite te 30 henemita ki mua. Ko tōna taenga mai (a Hinepūkohurangi) he tohu mō te putanga ki waho o te whare ki tōna kohu mātotoru, noho pū ki roto rānei hei kōrero, hei wānanga rānei i te whakaaro. He akoranga ēnei mōku mai i a Hinepūkohurangi, mā te whenua hoki tātou e ako pēnei i tō tātou whānau.

He kōrero tawhito mai i a Elsdon Best mō tōna mīharo ki ō tātou whakapapa, arā, he uri whakaheke ā-toto nei mātou mai i a Hinepūkohurangi. He rite tahi ko ngā tohunga tikanga tangata, ngā kaipūtaiao rānei e kīia nei he paki noa ēnei kōrero. Ahakoa tērā, ko Hinepūkohurangi tō mātou whāea, nāna ngā tikanga me ngā whanonga o Ngāi Tūhoe i waihanga.

Kātahi anō ka riro i a au taku tā moko tuatahi, ka tīmata mai i tētahi wāhanga ātaahua ki te kawititanga o taku ringa matau. He mihi ki a Pāpā i mate atu nō muri mai i tōku haerenga i tōku ara. He nui ngā akoranga whakapapa i runga i tēnei ara, engari ki te ako tonu au, he māramatanga nōku he nui kē atu te mātauranga kei waenganui i a tātou. Māku au e whakatōkia ki roto i taua whakapapa, he āta haere, he āta mahi pēnei i te mahi raranga, ka whakakotahi te kōrero o taku tuakiritanga.

Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. ONCE: A captivating collection of solo dance works
  2. Matilda the Musical — Matthew Warchus
  3. Rant with Grant
  4. A Fairer Aotearoa
  5. VUWSA Constitutional Changes
  6. The Politics of Caring: Interview with Max Harris
  7. Yes We Care
  8. Not Enough to Begin With
  9. On the Fence
  10. Policy for Policies

Editor's Pick

FUCK ENGLISH, VOTE POEM

: - SPONSORED - The layer of mist over paddocks, delicate and cold; the layer of cows under a silver sun-bleached tree; the hills rising over them and in the distance the whole countryside demarcated by accidental hydrangeas or a gentle river.   All of these layers upon layers