Tēnā koutou e te tī, e te tā

Ko Dayna Eggeling tōhoku ikoa, he uri ahau nō Kāi Tahu, e mahi ana au ki Te Pūtahi Atawhai he tari mō kāi tauira Māori, kāi tauira nō Te Moana-Nui-a-Kiwa anō hoki. Kei te papa tuarua o te whare o te Uniana Tauira mātou e noho ana. Ko te kaupapa o tēnei wiki o te reo Māori, Ko ‘Kia Ora’. He aha te ‘Kia Ora’ māhaku? Mā kā kaimahi? Mā kā tauira i tāhaku mahi? Kei te kōrero i tōu ake reo rakatira, kia mau ai tōu ake mita, tōu ake whakapapa, hei orakā mō tātou, ā, mō kā uri ā muri ake nei. Ahakoa tōu taumata, ka kōrerotia te kōrero o ōu tīpuna e maumahara ai koe ki ā rātou mahi katoa.

Ko Te Pūtahi Atawhai tētahi tari e whāngai ana i kā reo nō Aotearoa, ā, nō kā wāhi kē. Ko te mea nui o tērā e ako ana tātou i a tātou. Tekau mā tahi kā tau i noho ai ahau i tēnei wānaka, mai i te tīmatanga ki tēnei rā he tuakana a au mō kā tauira hou i kā pepa reo Māori i te wanakā nei. Ko tēnei mahi he whakatōtika, he whakakaha te teina ki te tuakana, te tuakana ki te teina. He tino waimarie ahau ki te tūtaki ki kā tēina i aua wā ki tēnei wā nā te mea he tautoko tātou i a tātou ki te ora. Ko tāhaku tono ki a koutou te huka reo Māori, kia tuku atu i āu mātauraka Māori ki te teina hei whakamana i tōna kākau ahakoa nō hea te teina, ahakoa tōna taumata ake.

Ko te mea whakamutuka o tēnei, Ko te whakataukī nō tōhoku iwi, nō Kāi Tahu “Whakahokia mai anō tōhoku reo ki ōku kutu, au ahi, au ora, kia rere, kia pīataata me he kuru auhuka” (may my language return once again to my lips, if it is spoken it will live, that it may flow freely and shine like a precious pounamu).