Viewport width =
BLACK
September 11, 2017 | by  | in Features |
Share on FacebookShare on Google+Pin on PinterestTweet about this on Twitter

Tiakina Tangaroa!

Nā Awhina Henry, Ngāti Porou, Te Whānau a Apanui

Whakamāori nā Jamie Yeates , Te Āti Awa, Te Pae o Rangitīkei

 

qb64

 

Na Io matua kore a Tane Mahuta e tohutohu,

ka tu ahua nei rite ki a koe, ka puta mai te wahine tuatahi.

Kia tūpato kia takahi te mana o ngā wahine.

Ko ratou e kai mau te ahua o ngā atua.

Ko ratou e kai mau te ira o ngā atua.

I ngā hē, kia tiaki i ngā matou ka mate ngā whakatipuranga.

 

Io matua kore te atua/god of the universe, of everything, told Tane Mahuta the god of the forest to make someone in his image. He created the first woman from the very earth clay in which we walk. It was this creation as the first human being that gave woman great mana/prestige. Io matua said that women are created in the image of the atua/god, they are perfect, do not treat their mana. Because if this happens then the population will die.

 

d94

 

Ao mai, ao atu ka kaha ake te kumea o roto nō tōna ekenga ki te toi o ngā rangi. Ko tēnei kukume, te tākiri nei kei roto rawa i a au e karanga atu rā ki te wai, ki te kōpū kia pana, kia tō. E pūao iho nei te ahotea kia tauria te mata o te whenua e te mārama. Ka uira te tai whatiwhati i te mana o te mārama, ka kānapanapa i tōna whanake, i tōna whīroki. Ka rewa te atarau, ka kumea au i ngā wai o roto. Ka titi te atarau, ka kumea kaha ake te tai moana. Ko te mārama te kaitākiri i tēnei herenga o te waiora o te tangata me te waiora o te moana. Nā te mārama me āna pānga i honoa ai tōku kōpū ki a Tangaroa, i honoa hoki ai a Tangaroa ki te iwi nei, te iwi Māori.

He wāhine tātou, he whare tangata, he puna waiora, ko tātou te ūkaipō o te iwi. Kei a tātou te āhua o ngā atua “rātou e kai mau te āhua o te atua,” i hangaia ake ki te whenua. Ki tā te Ao Māori he tapu te wahine nā te mea ko te kōpū te tūhono o te ao kiko me te ao wairua. Kei te whare tangata te puna waiora. Ko tēnei wai koirā hei honohono i a tātou ki a Tangaroa, ki te Mārama anō hoki. Ka mōmona te mārama, ka pari te tai, ka timu te tai; ka pari hoki, ka timu hoki ko te waikura o te whare ika. Koia nei te tauhere i waenga i a tātou ko Tangaroa ko te Mārama. Ko te wāhine e rongo i tēnei āhua, ka mārama kehokeho hoki ki a ia te mauri o te ao me te whakapapa e honoa nei ngā mea katoa. He wahine ngākau-nui engari he mārohirohi tonu, nōna e whai ana i ngā tapuae o ōna tīpuna. Koinei tētehi o ngā hononga o te iwi Māori ki te moana, ko te hiringa nei ki roto i te kōpū.

Ko Tangaroa te atua o te moana, he moana nui, he moana roa, he moana.

 

IMG_0500

 

He mahi nui whakaharahara mō tō tātou reanga te tiaki i te hauora o Tangaroa. Nā te kaha whai i te hinu, i te parahitiki, i te mahi ahuwhenua ka paru noa atu te wai. Kia tohaina atu ngā kōrero Māori  me te mōhioranga Māori ki te rangatiratanga o Tangaroa. He huanui tēnei e taea ai te whakaheke i ngā paruparu, e oho ai te tangata kia manaaki i a Tangaroa.

He ika anō tā Tangaroa, he ika e hono atu nei tātou mā te mōhio ki te whakapapa o ngā ātua i te Ao Māori. Ko ngā pukapuka me te hau e pūpuhi nei, nā Tāwhiri-mātea. Nā Tāne te roro, te rua mahara. Kei a Rongo ko te ngākau me te aroha e māpuna ake nei. Nā Tangaroa te wai o roto me ngā kare ā-roto e rere nei, e whati nei. He rite te pāpaki o te ngaru ki te rere o te toto i ō tātou iaia. Nā reira e pai ana te kaukau i te moana mō te tangata kōmingo, mō te tangata hūkokikoki. Ka tau iho te kapakapa o te manawa ki te pīti e tika ana.

I whāngaihia au ki te kai o te moana nā reira au e mōhio nei ko te kai o ngā iwi noho takutai he kaimoana, he tote. Whakapono mai, he uaua te noho ki te wao nui o Tāone i te wā ka whakamomori noa rawa koe ki te tote. He mōhioranga ka whai painga te hinu ika hei whakaheke ngako, hei whakatau i te rere o te toto kei tūponohia te mate manawa me te rehu ohotata. Ina tūhonoa anōtia te iwi ki a Tangaroa, ka ora, ka pai ake te hauora manawa. He whakaaro Māori anō hoki kei roto i te kai ika, i tua atu i te hauora manawa. Ko te whakatairite i te rere o te toto ki te timu me te pari o te tai. He nui whakaharahara te hononga o te ia o roto ki a Tangaroa, he miramira i te painga o ngā uri o Tangaroa ki tēnei wāhanga o te tinana. Mā te whakamahi me te mārama anō ki ngā āhuatanga o tō tātou nei taiao ka piki ake te mauri, ka hū ake te hiringa mō tō tātou hauora ā-tinana, ā-ngākau, ā-wairua.

Nōku e tipu ake ana, i hau mai te rongo o ngā kōrero mō Waiapu o Ngāti Porou, o te taniwha rā a Horowhatu nāna i tōremi te tangata i te awa. I whakamānawatia te awa e te mahi a te minita, pīrihi me ngā tohunga i hīkoi tōtika atu mai te mātāpuna ki te wahapū. He ritenga tō Rangitikia me mahia kia pai ai te kaukau, hī ika rānei ki te wahapū nei. “I mua o te hekenga ki roto i te tiana hoki o te Kai-hao. Hei reira ra ano ka heke ai te Kai-hao ki roto i te wai. Pena tikanga i nga wa katoa. Kei te mau tonu i a Ngati Porou inaianei.” E mahia ana tēnei ritenga hei whakapanapana i ngā ika nui: ko ngā whai, ngā mangō me ērā atu uri whakawehi o Tangaroa, ka rongo i te hāunga o te tangata. Nā tēnei i māmā ake ai te hopu i ngā ika iti iho kāore e taea te rongo.

E hia kē nei ngā tikanga o te moana, o Tangaroa. Ko te matua, me manaaki te moana. He kāinga ki te tokopae o Tangaroa, me pērā te mahi: he kāinga tonu. Kia mārama ki a tātou, nā ngā matū e whakamahia ana e tātou i ngaua kino nei te taiao, otīia ki te moana me ōna uri. Ki te pēnei tonu te whakamahi o ngā matū kikino, ko te parahitiki tētehi tauira, me mātua mōhio e tātou te hiranga o te taiao, ehara i te hiranga ā-kiko anake engari ā-ahurea nei, ā-wairua nei, ā-ngākau nei, ā-hinengaro nei hoki. Nōku te wawata mō āku tamariki kia kī tonu tēnei kete kai e kore e pau, e pai ai ki a rātou te kaimoana me ōna hua mō te tinana me te hinengaro me te wairua. Nā tōku Māoritanga ka whakapono au nō te moana au, he whakapapa i heke mai i a Tangaroa. “Ko au te moana, ko te moana ko au.” Whakahuatia ai te moutere nei o runga ki te ingoa “TE IKA A MĀUI.” Ko te nuku o te whenua e takahia nei e ōku waewae, he ika.

 

TIAKINA TE TAIAO! TIAKINA TE MOANA: LOOK AFTER THE ENVIRONMENT, LOOK AFTER THE MOANA!

 

d87

 

Nā Awhina Henry

He tāwhiri hei whakapūmau i tō hono ki a Tangaroa:

  1. Ka tau te mauri i te kaukau moana.
  2. Ka tairite i te pāpaki o ngā ngaru te rere o te toto i ō tātou tinana.
  3. Whakamahia ngā tote tāpu kia pērā ki te kaukau moana.
  4. Kainga te kaimoana!
  5. Ka whakapaingia te wairua, te tinana me te hinengaro.
  6. Manaaktia te moana! Tiakina ōna uri!
Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. An (im)possible dream: Living Wage for Vic Books
  2. Salient and VUW tussle over Official Information Act requests
  3. One Ocean
  4. Orphanage voluntourism a harmful exercise
  5. Interview with Grayson Gilmour
  6. Political Round Up
  7. A Town Like Alice — Nevil Shute
  8. Presidential Address
  9. Do You Ever Feel Like a Plastic Bag?
  10. Sport
1

Editor's Pick

In Which a Boy Leaves

: - SPONSORED - I’ve always been a fairly lucky kid. I essentially lucked out at birth, being born white, male, heterosexual, to a well off family. My life was never going to be particularly hard. And so my tale begins, with another stroke of sheer luck. After my girlfriend sugge