Viewport width =
September 9, 2019 | by  | in News Te Ao Mārama |
Share on FacebookShare on Google+Pin on PinterestTweet about this on Twitter

Te Panekiretanga o Te Reo Māori

 

“Ko te reo kia tika, ko te reo kia rere, ko te reo kia Māori”

 

He mea waihanga, whakaako hoki te Panekiretanga o Te Reo Māori nā Ahorangi Pou Tēmara, Tā Timoti Karetu, rātau ko Tākuta Wharehuia Milroy. E kīia nei rātau, ko te tokotoru a Paewhiti. Ko rātau ngā tohunga o te kōrero, te reo me ngā tikanga o te ao Māori. I noho rātau ki ngā rekereke o ngā tangata pērā i Te Rangihau mā. I reira kai ai ngā kanohi, whakarongo ngā taringa ki te rere māori o te reo e kōrerohia nei i waenganui i ngā hāpori o Tūhoe (katoa o rātou nō Tūhoe).

 

He wawata nui tā Tīmoti ki te whakawhirinaki i ngā tangata matatau ki reo, kia piki ake ki tōna kounga. Nōna i kite i ngā rangapū tauira i puta mai i ngā whare wānanga. Ki tāna i rongo ai, kāore anō tā rātau reo kia piki ki te taumata tiketike o te reo. Nā reira, nā wērā whakaaro ka puāwai ai te rautaki o te kaupapa nei. Ā, i te tau 2004, pōhiringia te rangapū tuatahi i runga i te marae o Te Ara o Tawhaki. I reira i timatahia mō te wā tuatahi.

 

Ko tāna whakatakanga, kia piki ai ngā tangata matatau ki te reo ki taumata kē. Kia pikitia te pīnakitanga ki Mātāhauariki, ki te Tihi-i-Manono, pērā ki tā Tāne piki i te aratiatia, te Toihuarewa, kia riro ngā kete o te wānanga. Ngā pūkenga, ngā māramatanga o te Ao Māori me ōna āhuatanga hohonu. I rongonui haere te kaupapa nei mō te taumata tiketike o ngā ika a Whiro me ā rātau mahi whakarauora, whakatairanga, whakaako i te reo Māori me ōna tikanga katoa.

 

Hai te wā putaina te ihu, ka riro mā ngā ika a Whiro ngā pūkenga o te reo e taea e rātau te whai wāhi ki ngā wāhi Māori kia whakamahia aua pūkenga. Ko te marae tēnā, ko te karanga me te whaikōrero. Ehara i te mea ko tērā te ara anake hai whai mā ngā kaikōrero katoa, engari, he tāpiri atu kē i ngā kōrero o aua koroua ki te tangata ki eke ake taua tangata ki te tiketiketanga o te reo. 

 

Hoi, i te whitu o Mei i te tau nei, i hinga a Wharehuia hai hoa haere mā te Atua. I muri i tēnā ka puta atu te kōrero, ka katia ngā tatau, ā, ka whakamoea te kaupapa.

 

Waimarie ana te ao kōrero Māori, otirā te Ao Māori whānui tonu, i te tokotorua nā, me ā rātou tini whakaakoranga ki te motu. I kai rātāu i ngā kai mārō o whātua mā, ā i tuku iho ki ngā tauira i noho ki ngā rekereke o ngā koroua. Rongona ana te reo i ō rātau nei tauira e whakaako ana i ngā rangapū te haramai  nei. Hai whakarongo mā te iwi nui tonu, kai mahue wēnei momo ki rāhaki, wareware ai.

 

Ahakoa ngaro ana a Te Wharehuia, moe ana hoki a Te Panekiretanga, ora tonu ana wēnei whakaakoranga i ngā ringaringa o Pānia Papa rāua ko Leon Blake hai whakaako reo ki tana karamatamata i tētahi kaupapa kē. Ka haere tēnei i raro i ngā whakahau o ngā mahuetanga iho rā o ngā koroua nā. Hai reira piki ai te taumata o te reo tiketike, ki taumata kē atu pērā ki te Panekiretanga, hoi ko te reo te tino whāinga. Hai whai orangatonutanga mo ngā whakaakoranga i hōmai ai ki a rāua e whakahaere i te kaupapa hou, otirā i ngā ika a Whiro katoa nā rātou ngā reanga hou e whakaako. 

 

Kua toru rau rima tekau ngā ika a Whiro, i ngā rangapū tekau mā whā. Hika mā, he nui rawa tana tapuwae i te mata o te Ao Whakaako Reo, otirā Te Ao Māori whānui tonu. Nā konā i kitea ai e au te hīkaka o Ngāi Pīkoko ki te ako, ki te whai i te reo Māori, me ngā tikanga e karapoti nei i a ia. Āe mārika, teretere tonu te waka o te reo i te moana, kia kauria ki ngā wai o anamata. Nā whātua mā ngā hoe me te waka i waihanga hai kawe tātau ki tana okiokinga. Ko tā tātau e hika mā, te kauria ngā wai ahakoa ngā puaheihei o Ngoikore, o Whakatakē e tarai ana te werowero i te takere o te waka. Tēnā, whakamaua te kakau o te hoe, kia kaha te rere ki anamata ki tana panekiretanga.

Share on FacebookShare on Google+Pin on PinterestTweet about this on Twitter

About the Author ()

Add Comment

You must be logged in to post a comment.

Recent posts

  1. Dirty Money, Clean Woman
  2. Dear Nathaniel
  3. The Social Lives of Group Chats
  4. We Don’t Do Vegetables
  5. Invisible Women: Exposing Data Bias in a World Designed for Men
  6. Audit – Law Revue
  7. The Last Supper: VUW and VUWSA on KJ
  8. VUW’s Own Gloria Fraser Develops Queer Mental Health Resources
  9. Issue 21 – Default
  10. Biophilic buildings— ‘The living pā’ complex

Editor's Pick

Uncomfortable places: skin.

:   Where are you from?  My list was always ready: England, Ireland, Scotland, Wales, puppy dogs’ tails, a little Spanish, maybe German, and—almost as an afterthought—half Samoan. An unwanted fraction.   But you don’t seem like a Samoan. I thought you were [inser

Do you know how to read? Sign up to our Newsletter!

* indicates required