26/07/10
by

This is my story—Susan Rose

Music

Tērā pea ka maumahara koe i tēnei manu tīoriori mai i te hōtaka o Homai Te Pakipaki i te tau kua pahure. Engari, inā kāore anō koe kia mātakitaki i taua hōtaka, i tae a Susan ki te pō whakamutunga o taua whakataetae. Nā tērā, i huaina ngā kūaha o te ao pūoro ki a ia. I ngā marama whai atu, ka pukumahi a Susan kia whakataka i tōna kōpae waiata tuatahi i tēnei tau.

He tino ngākau nui a Susan Rose ki tōna kāinga a Mill Pā, Te Kapu (Frasertown), ki Te Wairoa. A ka whakaatu ia i tēnei kōingo mō tōna tūrangawaewae ki roto i te waiata Haukāinga. Ahakoa ōna haerenga ki roto i te ao whānui, kei Te Kapu tōnu tōna manawa. Nā kōnā, he tika tōnu tāna kia whakataka i tana kōpae tuatahi me tētahi konohete ki te tāone o te Wairoa.

Ko Nei Ko Au ­– This is my story te ingoa o te kōpae nei. He wheako whaiaro te āhua o ngā waiata ki runga i tēnei kōpae pūoro. Nā tēnei ka tika tōna tīmatanga me tētahi karakia whakatuwhera, hei whakatau i te hinengaro. Ka whitiwhiti haere ia i ngā reo e rua – arā te reo Māori me te reo Ingarihi.

Ka kōmitimiti a Susan i ngā momo pūoro e tāngia ki tēnei kōpae, pērā ki te āhua bluesy/jazzy o te waiata ‘This is my story’ me te waiata ‘What about our son’ ki te discoey-poppy ‘Mr. Right’, anō hoki te RnB/roots āhua o te waiata ‘Haukāinga’. Heoi, nā te kaha o te hiere o te reo o tēnei wāhine māia, he tino mahana te āhua o tēnei kōpae. Ka rongo hoki te māia, te aroha hoki, i roto i ōna waiata.

Ko tētahi o ngā mea tino pōuri o te kōpae nei ko te waiata o Goodbye. He waiata tangi tēnei ki tōna Pāpā i mate tūkino i te wā he kōtiro tōnu a Susan. Ka waiata ia mō tōna mamae me te mamae o tōna whaea me tōna whānau anō hoki.

Ki ahau nei, ko ngā waiata autaia o tēnei kōpae, ko This is my story, Mr. Right, Goodbye, anō hoki ko Haukainga. Engari, ko tāku he rawe rawa atu te katoa o tēnei kōpae. Anō hoki, te waiata whakamutunga At Last, he tāruaruatanga o te waiata aroha nā Glen Millar mai i te tau 1941.

Kaiwaiata: Susan Rose
Kōpae pūoro: Nei Ko Au—This is my story

About the Author ()

Comments are closed.