July 18, 2011
by

Te Herenga Waka Marae

“Papa te whatitiri, hikohiko te uira, ngarue te whenua ki te rauhihi, ki te rauhaha. Kumea mai kia piri, kumea kia tata ki runga ki te marae e takoto nei, i te piringa e tū nei, ko Te Herenga Waka!” -Nā Rangiāhuta Alan Herewini Ruka Broughton

Herenga Waka, e tāwharau ana, e korowai ana i ngā manu e kai ana i te mātauranga i te Whare Wānanga o te Upoko o te Ika. I te tōnga o te tau, te tuaono o Hakihea i te tau 1986 i ea, i tutuki ngā āwhero i moemoeātia e ngā ihorei, a Ahorangi Wiremu Parker rāua ko Rangiāhuta Ruka Broughton me ngā kaitautāwhi i te kaupapa. I te aranga mai o ata hāpara, i tukua e te rangatira o te maunga tītōhea, a Huirangi Waikerepuru, ngā karakia kia whakatūwheratia te whare tipuna nei.

“Te Herenga Waka I-e!
Te Herenga Waka I-e!”

Hei te tōnga o te tau nei, ka whakanuia, ka hākaritia e te Whanau o Te Herenga Waka tēnei tau whakarae mō te marae. He kaupapa ka whakanuia e te whare wānanga, e ngā tauira anō hoki. Ka huraina te waharoa hou o Te Herenga Waka marae i te tuaono o Hakihea. Nā Takirirangi Smith te waharoa i whakairo. Ko ia te kaiwhakairo matua o te whare tipuna.

“Tini whetu ki te rangi,
Ko Rangitāne ki te whenua”

Ko te mauri o te whare o Te Tumu Herenga Waka i ahu mai i Te Ahu a Tūranga i ngā tihitihi o ngā pae maunga o Ruahine. Nō reira i te hui ā-tau, arā te hākari mō Matariki i whakanuia e Te Whanau o Te Herenga Waka a Rangitāne iwi. Me mihi ka tika ki te rangatira, arā te uri o Rangitāne a Tākuta Mason Durie mō ōna kōrero i tērā pō whakahirahira.

“Ka mate kainga tahi, ka ora kainga rua”

Ko Te Herenga Waka he kainga, he taunga whakaruruhau mō ngā tauira o te whare wananga e piki ana i ngā ara tukutuku o Poutama. Inā anō te nui o ngā wā ka kitea ngā kāhui ākonga o mua e hokihoki mai ana ki te marae kia hoki-māhara ki ngā wā rātou i te whare wānanga. Ko Te Herenga Waka he āhuru mōwai mō ngā tauira, he tohu mō te aroha, mō manaaki hoki.

He aha tēnei mea te manaakitanga?

He nui ngā kōrero e rere ana mō tēnei mea te ‘manaakitanga’ engari he aha kē te tino ngako o tēnei kupu? E ai ki ētahi, ko tōna ngako he tiaki tamariki, he whāngai manuhiri, he kanohi kitea, he whakawhanaungatanga i raro i te rangimārie, he aha kē atu, he aha kē mai.

Tēnā, kia tirohia e tātou te kupu nei. Ko tōna pūtake ko te kupu ‘manaaki’, ā, ki te wetewetea tēnei kupu ka hua ko te ‘mana-aki’. Nā tēnei āhuatanga ka toko ake te whakaaro he mea akiaki te manaakitanga i te mana o te tangata. Nō reira, ka taea pea te kī, ko te manaakitanga, he mea hei tū whakahīhī ai te tangata.

I runga i ēnei whakaaro, ka tika, kei te whakatinanatia e te marae o Te Herenga Waka ngā āhuatanga o te manaakitanga.

Ka tāea e te tauira te noho ki ngā rekereke o ngā tipuna poupou, te whakakī kete ki ngā korero o te Pātaka Iringa Kōrero, te whakakī puku i te hora o te kai ki ngā tēpu.I kī mai tētahi tauira tawhito “I ngā wā o mua i haere au ki Te Herenga Waka i ngā wā i toutou ngā pēhitanga o te whare wananga i tōku ahi, koira te take kua ea tōku tohu”.

Nō reira, marika ana te rere o te reo aumihi, ngā mihi matakuikui ki Te Whanau o Te Herenga Waka. Inā te kōrero, “ko te mahi a te rangatira ko te manaaki.” Nō reira kua rangatira te Whare Wānanga o te Upoko o te Ika i a koutou ō Te Herenga Waka Marae. Ngā mihi nui mō ngā tau kua pahure me ngā tau kei te heke mai nei. Ra whanau kia koe, kia koutou, kia tātou katoa o te whanau o Te Herenga Waka.

Nā Kereru o te Kāhui Manu

About the Author ()

Comments are closed.