Viewport width =
August 5, 2013 | by  | in Features |
Share on FacebookShare on Google+Pin on PinterestTweet about this on Twitter

Pakeha mai, Hapanihi mai, Maori mai.

Tēnā rā koutou e te manawa whenua o te kī, e te hunga ū ki te kaupapa. He nui aku mihi ki a koutou ka tae mai ki te tumu herenga awhero o te reo Māori.

Ko Naoko tōku ingoa. Nō Tiapana ahau. He tauira ahau ki te whare wānanga Wikitoria. Ko aku tohu paetahi te reo Māori me “Māori Studies”. Kāore e kore kei te ohorere koutou nē? He aha i ako ai te tangata Tiapana i te reo Māori? Tika tāu. Kāore ahau i tino titiro ki tōku kare-ā-roto ki te rapu i te tino ngako – he aha ai. Heoi anō, kia kitea taku huarahi mā te tuhinga ki konei, tērā pea ka mārakerake ake taku take me te whāinga o te haerena nei.

I ahau e tauira ana i te whare wānanga i Tiapana, ko taku aronga ko te iwi taketake o tōku motu, arā, ko Ainu. He rerekē tō mātou reo, te ahurea, te tikanga hoki. Koia au i whakamīharotia, ā, ka wawata puku taku titiro ki tētahi atu iwi taketake i te ao hei whakataurite i tō mātou. Nā konei, i te tau 2005 i tae mai ahau ki konei, Aotearoa, hei tauira whakawhitinga mō te tau kotahi, ā, i ākona te reo Māori me te tikanga Māori. Ahakoa he poto te wā, he iti ngā ako, ka whakatōkia te kākano, ka āta tipu ake i muri mai o taku hokinga ki Tiapana.

Ko tāku i tino monoatia ai ko tō rātou reo me te manaakitanga. Kia mōhio koutou, he rite te whakahua o tōku reo Tiapana ki te reo Māori – a e i o u –. Kāore e kore ka āwhinahia ahau e tēnei ritenga ki te uru atu ki te reo. Waihoki, ahakoa he nui taku whakamā me te mataku ki te noho i te ao rerekē, he mahana tonu taku manawa i te manaakitanga o ngā tāngata i Te Tumu Herenga Waka Marae.

Nō reira, ka oti taku tohu i te whare wānanga i Tiapana me aku mahi i tētahi kamupene, ka hoki mai ahau ki konei, te whare wānanga o Wikitoria, ki te ako tonu i te reo Māori me ngā tikanga. Nō taku taenga mai, ka mauria mai taku mahara o te tau 2005, arā, he mea pai anake, he taha o te painga anake, i waiho ngā mea taumaha. Nō reira, ka piki ake te taumata, ka nui ake te taumaha. Ahakoa i ākona e ahau te reo Pākehā mō ngā wā roroa, he uaua rawa atu ki te whakarongo, ki te tuhi. Waihoki, ko taku tino taniwha te kōrero-ā-waha i mua o ngā tāngata. Āe, e hia kē nei ngā wā ki te tū hei kōrero-ā-waha i ngā karaihe o te reo. Ia wā, ia wā, he mataku rawa atu ahau, he wiriwiri taku tinana, he tapepe taku reo, he tupurangi taku whakaaro. I ētahi wā, i pātai mai ahau ki ahau anō, “He aha ahau i hoki mai ai?”. I ētahi wā, i puta te whakaaro kia tukua taku ako. Heoi anō, kei te ako tonu ahau i te rā nei, ā, he nui tonu taku aroha ki te reo Māori. He aha ai? Nā ōku hoa ahaui āwhina kia kaha ai. Ahakoa te taumahatanga, e tautoko ana mātou ki a mātou anō. Nā ōku kaiako taku kākano i whakapuāwai ai. Ahakoa he rerekē ō mātou motu e noho ana, ko tōku whānau e tuku ana i tō rātou aroha. Mei kore ake rātou hei ako tahi, hei whakaako mai, hei akiaki mai. He nui aku mihi ki a rātou.

Nō reira, koinei taku huarahi tae noa ki te rā nei. Kāore anō ahau kia kite i taku huarahi ā mua, heoi e mau ana i ahau te puāwai o te reo Māori mō ake tonu atu. E te hunga pua kōwhai, e ngā ngutu kākā o te ao, mā tō tātou manako kia whakakā ki te reo, kia piki ki te matamata o te reo, kia puāwai tō tātou kākano nē! Nō reira, tēnā rā koutou.

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. VUW Halls Hiking Fees By 50–80% Next Year
  2. The Stats on Gender Disparities at VUW
  3. Issue 25 – Legacy
  4. Canta Wins Bid for Editorial Independence
  5. RA Speaks Out About Victoria University Hall Death
  6. VUW Hall Death: What We Know So Far
  7. FANTA WITH NO ICE
  8. New Normal
  9. Come In, The Door’s Open.
  10. Love in the Time of Face Tattoos

Editor's Pick

Uncomfortable places: skin.

:   Where are you from?  My list was always ready: England, Ireland, Scotland, Wales, puppy dogs’ tails, a little Spanish, maybe German, and—almost as an afterthought—half Samoan. An unwanted fraction.   But you don’t seem like a Samoan. I thought you were [inser

Do you know how to read? Sign up to our Newsletter!

* indicates required