Viewport width =
September 10, 2018 | by  | in Opinion Te Ao Mārama |
Share on FacebookShare on Google+Pin on PinterestTweet about this on Twitter

He Ara Hou

Kei aku whakatiketike ki te rangi, kei aku whakatamarahi ki te whenua e kai ana I te mātauranga kai raro i te pūāhurutanga o Tāne whakapiripiri, o te Herenga Waka, otirā, Te Whare Wānanga o Te Upoko O Te Ika a Māui, tēnei te whakamānawa atu nei I a koutou. Ko tāku, he whakatewhatewha āke i ngā huarahi I whāia e ō tātau nei tīpuna hai māmā āke i mamae o te mate pouritanga.

Taku rākau e

Tau rawa ki te whare

Ka ngaro a Takahi e

Te whare o te kahikatoa

Hei ngau whakapae

He whakapae ururoa e hau mai nei

Kei waho kei te moana

Kāore aku mihi e

Aku tangi mō koutou

Mau puku ko te iwi

Ka mōwai tonu te whenua

E takoto nei e…

He mea tito tēnei nā te tohunga tito waiata, a Mihi-ki-te-kapua, nō roto mai o Ngāi Tūhoe. He waiata tangi ki tōna tāne a Hikawai i mate i te riri ki Te Rahui o Mahia. I rongonuitia whānuitia a Mihi-ki-te-kapua mō āna titonga waiata. Ko te kaupapa o te nuinga ērā he kōrero mō tōna mokemoke me te pouritanga i pā ki a ia. I wehe atu āna tamariki, i mate tōna tāne. Nā te pākira o te whenua ia e whakamokemoke.

Anō nei te hāngai ki te reanga nei.

Ko te nuinga o ngā moteatea e mōhiotia ana, he waiata tangi. Koinei he huarahi, e kore rawa e whāia e te hunga taiohi hei whakaputa i ngā whakaaro, e hika mā, he ara tēnei e mahia e ngā tīpuna o nehe hei whakakupu, kia māmā āke ai i te mamae i pā ki a rātou e noho I raro iho I te kāpua pōuri.

E hika mā, inā te huhua o ngā tini aituā kei runga i a tātou i tēnei wā tonu, ngā tore kai huruhuru kua taka ki tua o Tāwauwau i te tau nei, inā te tuatinitini, te tuamanomano o rātau mā. Nā te taniwha e mōhiotia whānuitia ana, ko te mate whakamomori. Ko te mate pāpōuri tētahi whatitoka me kī, e taea ai te taniwha te hou mai i roto I tō hinengaro. Ko au tētahi o ngā tauira e whawhai tonu ana i tēnei mate. He mate e kore e kitea e te āo, he mate kei roto i te hinengaro, i te wairua anō hoki. Ka whawhai anō i te āo i te pō, tē taea te aha. Ehara I te mea ko ngā rongoā pākehā i te huarahi anake hei whainga mōu. Kāore au i te tākuta hinengaro, hoi, he wheako whaiaro maku tēnei.

Nā tāku nei rangahau I ngā ara hei tūtuki I tēnei, kua kite au I te āhua o waiata moteatea.

He mana, he tapu tō te kupu o ngā moteatea pērā. Kei pōhēhē tātau mā, kāhore ngā tohunga, tangata mōhio, aha noa atu rānei ngā kaitito anake I wēnei moteatea. Tēnā pea he kare-ā-roto tō te tangata, ka taea e ia te tito mō wērā kare-ā-roto. Korekau he ārai, kei tō hinengaro ngā ārai o tōu pohewatatanga. Pēnei I ahau, ehara ahau I te tangata tohunga ki te hohonutanga o te reo rangatira, engari, ka tito tonu ahau I wēnei tūmomo āhua.

E kī ana te Pākehā, he ‘poetic’ me kī, kei huri ki tā te Pākehā whakaaro mō tēnei tino momo taonga taketake. Ko ngā waiata e pēnei ana, he matapihi kē ki te wairua o te tangata. He pakupaku iho ngā kupu, hoi, he nui tō te kōrero o roto rā. Mehemea ka rongo koe I tētahi waiata tangi kei runga I tō marae, I te papawhakatūwaewae rānei, ka tino rongo koe I te kaupapa e waiatatia, e tangihia. Anō nei te ātaahua o te iwi Māori. Tē hiahia rānei ki te tino mōhio ki te reo hei whakamārama I te kaupapa o te reo, ka mārama ai koe i te rerehua o ngā waiata koroua.

Nā Mason Lawlor

Ngāti Kahungunu, Ngāti Maru

Share on FacebookShare on Google+Pin on PinterestTweet about this on Twitter

About the Author ()

Comments are closed.

Recent posts

  1. The Social Lives of Group Chats
  2. We Don’t Do Vegetables
  3. Invisible Women: Exposing Data Bias in a World Designed for Men
  4. Audit – Law Revue
  5. The Last Supper: VUW and VUWSA on KJ
  6. VUW’s Own Gloria Fraser Develops Queer Mental Health Resources
  7. Issue 21 – Default
  8. Biophilic buildings— ‘The living pā’ complex
  9. Te Panekiretanga o Te Reo Māori
  10. Toitū te Whenua, Toitū te Tangata

Editor's Pick

Uncomfortable places: skin.

:   Where are you from?  My list was always ready: England, Ireland, Scotland, Wales, puppy dogs’ tails, a little Spanish, maybe German, and—almost as an afterthought—half Samoan. An unwanted fraction.   But you don’t seem like a Samoan. I thought you were [inser

Do you know how to read? Sign up to our Newsletter!

* indicates required