nā Sterling Maxwell | Ngāti Porou, Ngāti Konohi, Ngāpuhi, Ngāti Hine
Ko wai au?
Ina ngā tini whakatau kua whakatauria e au i ōku nei rā. Rua tekau mā rua ngā tau, te huhua o ngā whiringa. Te tini o ngā hapa, iti rānei, nui rānei, ērā katoa e taumaru ana i te ara kei mua i te aroaro. Anō nei he mapi nui ōku hapa, ia te hapa e pātahi ana ki te ara kei mua. Kua kōtiti taku haere. Kua pēnei, atu i tēnā. Kua takahia e au ngā ara pahū, kua wāwāhia ngā tahā. Kua hē te tūāpapa o tōku whare, kua hapa te rere o tōku waka. Kua huakina e au te tatau o te pō, ā, kua taka hoki te pōro. Kua tawhiti anō te pae tata. Nā wai i hē, kua tino hē rawa atu. Kua ngere. Kua ngere. Kua ngere.
Ko wai au? He mūhore.
Ka titiro mai rātou, ā, ka mene atu au. He aha atu māku? Me he tuahangata ahau ki a rātou, heoi e rongo ana au i a Whiro e pupū ake ana i roto i au. E rangona ana te taumaha o aku hē i ētahi wā. Me ko te ao kei aku pokohiwi - tē tāea te whakataha. Me he huakore aku whakatutukinga. Me he whakatutukinga hāpua kua korowaitia e te ngere e kitea ana e au, i ō rātou karu. Ko ngā kupu, “Na te waimarie noa”, “Tō hamuti” E noho ana i te mata o ō rātou arero. I taea te whanake, me whanake. He taunga kore. He taunga kore. He taunga kore.
Ko wai au? Ko hua kore.
E mauheretia ana au e ōku ake whakaaro. He wāhi e kore e kitea, e kore hoki e rerea. Ko ngā here, tē motukia. Kua hangaia e tōku ake hopo, ā, ka whakakahatia e ōku ake whakaaro whakaparahako mōku anō. Mea rawa ake ka āta whakapono ki aua kupu whakaparahako. Ka tumu te wā. Ka pōturi te hāere. He mutunga kore. Ka tau mai ko Hinepūkohurangi, e rehurehu ai te whakakitenga ki te āpōpō. Tōna matatorutanga e kikī ana i tōku ake whakatakē.
Ko wai au? He taurekareka ki ōkū ake whakaaro.
Ko wai koe?
E kore koe e kite i tā rātou e kite ai. E aro noa ana ki ngā hara, kaua ki ngā hua nui o roto. Nō to rātou whānautanga mai, kua kitea tō katoa. Nāu rātou i whakaako, heoi e kore tonu koe e mārama ki tō ake mīharo. Kua kāpō i ōu ake whakaaro e tāmi ana i te kitenga o te pono. Tē aro i a koe te kimo i ō rātou karu, te nui o te whakamānawa rānei o rātou, mōu. Kua kitea koe i te tihi o te maunga, heoi kua kitea hoki koe ki raro e putu ana. Kua mātaki rātou i a koe e totitoti haere ana, e whara ana i tō takahitanga i tō huarahi. E kore rawa rātou e mārama ki te pōuritanga o tō āo, ā, ko te wawata e kore rawa rātou e mārama.
Ko wai koe? He tuahangata tonu ki a rātou.
Ko tā rātou, he manako ka kite koe i tērā.
E mataara ana, e kite ana rātou i te pono. Tō manawa roa, tō rerehua, me tō manawa tītī e whiti tonu ana ahakoa te taraongaonga. Kua kitea tō whakaaro nui, me te aroha nui ki te tangata ahakoa ko wai. Me he kākāno koe i āta poipoia, i āta arohaina, i kitea tō tipu, tō puawai ki tō momo o ināianei. I kitea tō takitū ahakoa ngā karawhiunga o te wā. Ka arohaina koe ahakoa ngā tini hapa o tō ao. He aroha i hua mai i tō momo, kōrero pono, ngākau motuhenga. Ā, i a rātou ka whakaaro mō tō rātou apōpō, ka whakaarohia ngā tini whēako ka pā ki a rātou, ā, ka whakaarohia koe hei whakakitenga mō rātou.
Ko wai koe? Ko koe ko rātou, ko rātou ko koe.
Ko wai tātou?
He kākāno ka puāwai. Ko tātou ngā hua o ō tātou ake wheako, he whāranu o ngā piki me ngā heke. Ia hapa, ia hopo, he akoranga o roto hei māramatanga mā tātou. Ko tātou ngā kākano o te whanaketanga kua whakatōkia ki a Papatuanuku. Ko ngā wheako pai me ngā mea kino, ngā wheako e āhei ai tō tātou tipu. E kore tātou e whakawātia e ō tātou hē, engari kē mā tō tātou manawa roa ki te kaupapa. Ka tipu, ka whanake mō āke tonu atu.
Ko wai tātou? He kaha. He tautōhito.
Ko tātou ngā whakatinanatanga o ngā moemoeā o ō tātou tūpuna, ā, ko tātou hoki ngā tauira mō te hunga ka whai i a tātou. Me tapatahi te haere, kei taka ki te hē. Ko ngā uauatanga i pā ki ō tātou tūpuna, me ngā whakatutukinga hoki, e pā tonu ana ki a tātou, ngā uri whakahere. I a tātou e tipu ana, e puāwai ana, ka whakamānawa atu ki a rātou me ā rātou mahi e āhei ai tā tātou tū.
Ko wai tātou? Ko ō rātou manako, ō rātou moemoeā.
Ki te whakaarohia te horopaki whānui, kua tuituia tātou pērā i ngā akaaka o ngā rākau e tūhonohono ana i roto o Papatūānuku. Tātou katoa he motuhake, he nui te whakapapa. Nā o tātou katoa whēako tātou e mōhio ai, e mārama ai. Mā te kotahitanga tātou e ora ai kia hipa anō te ua. E tautoko ana, e whakamaru ana, e manaaki ana i a tātou anō. I a tātou ka puāwai, ka whakatō anō i ētehi atu kākano kia tipu anō he hua, ā, ko ā tātou mahi, ā tātou kōwhiringa, me tō tātou manawaroa, katoa ēnei he tūāpapa mō ngā uri whakaheke kei tua. Ka titiro rātou ki a mātou, kaua mo ngā whakautu katoa, heoi mō te kaha, ki te ako, kia mōhio ki te manawa kaha, ahakoa ngā uauatanga. I tēnei haerenga ā tātou, ko a tātou whēako katoa he mea Ko tātou ngā whakatinanatanga o ō tātou moemoea, kua kitea, kua mārama. Ko to tātou puawai, he mea i hua i te manawa roa, me te ngākau Nō reira i te wā ka tukuna te urupounamu - ko wai tātou?
Ko te urupare atu; he kākano, kua puawai.
Comments